తెలుగుకు అరుదైన గౌరవం ఇచ్చిన ఆస్ట్రేలియా

మాతృభాషలో బోధనకు సంబంధించి ఆంధ్రప్రదేశ్ లో పెద్ద ప్రహసనమే జరుగుతోంది. తెలుగు మాధ్యమాన్ని పూర్తిగా తీసేసి, ఆంగ్ల మాధ్యమంలో మాత్రమే బోధించాలనే సర్కారు ప్రయత్నాలకు ప్రస్తుతానికి కోర్టు అడ్డుకట్ట వేసినా.. ఆ దిశగా ప్రయత్నాలు మాత్రం జరుగుతూనే ఉన్నాయి. దీనిని పలువురు భాషాభిమానులు తీవ్రంగా వ్యతిరేకిస్తున్నా.. ఏపీ సర్కారు మాత్రం తన పట్టు వీడటంలేదు. ప్రజాభిప్రాయ సేకరణలో దాదాపు 97 శాతం మంది తల్లిదండ్రులు ఆంగ్ల మాధ్యమానికే మొగ్గు చూపించారని పేర్కొంది.

తాజాగా తెలుగు విషయంలో ఎక్కడో ఉన్న ఆస్ట్రేలియా ప్రభుత్వం తీసుకున్న నిర్ణయం పట్ల తెలుగు భాషాభిమానులు హర్షం వ్యక్తంచేస్తున్నారు. ఆస్ట్రేలియాలోని స్కూళ్లలో తెలుగు భాషను ఆప్షనల్ సబ్జెక్టుగా ఎంచుకునే అవకాశం కల్పించింది. ఒకటి నుంచి 12వ తరగతి వరకు విద్యార్థులు తెలుగును ఐచ్చిక సబ్జెక్టుగా ఎంచుకోవచ్చు. పైగా తెలుగును ఎంచుకున్నవారికి ఉత్తీర్ణతలో 5 పాయింట్లు అదనంగా కేటాయిస్తారు. అంతేకాకుండా అక్కడ ఉద్యోగాలు చేసేవాళ్లు శాశ్వత నివాసం కోసం తెలుగు భాష ఆధారంగా దరఖాస్తు చేసుకోవచ్చు. ఇది నిజంగా మన తెలుగు భాషకు ఆస్ట్రేలియా ప్రభుత్వం కల్పించిన అరుదైన గౌరవం అనడంలో ఎంతమాత్రం సందేహం అక్కర్లేదు.

మన మాతృభాషకు ఆంధ్రప్రదేశ్ లో దక్కని గౌరవం ఎక్కడో సుదూరంలో ఉన్న దేశంలో దక్కడం విశేషం. నిజానికి ప్రాథమిక స్థాయిలో మాతృభాషలో బోధిస్తేనే వారికి సులభంగా అర్ధమవుతుందని నిపుణులు కూడా స్పష్టంచేస్తున్నారు. ఎవరికైనా సరే మాతృభాష తర్వాతే ఇతర భాషల అవసరం ఉంటుందని.. కానీ దురదృష్టవశాత్తు తెలుగు విషయానికి వచ్చేసరికి అందరూ చిన్నచూపు చూస్తున్నారని పలువురు భాషాభిమానులు ఆవేదన వ్యక్తంచేస్తున్నారు.

చాలామంది తల్లిదండ్రులు సైతం తమ పిల్లలు ఆంగ్లంలో అనర్గళంగా మాట్లాడాలని కోరుకుంటున్నారే తప్ప.. మాతృభాషలో చదవాలని మాత్రం కోరుకోవడంలేదని పేర్కొంటున్నారు. బీహార్, యూపీ, ఒడిశా తదితర రాష్ట్రాల్లో సివిల్స్ కూడా మాతృభాషలో రాసి ఉద్యోగాలు పొందినవారు చాలామంది ఉన్నారు. రష్యా, జపాన్, ఇటలీ, స్వీడన్, స్విట్జర్లాండ్ సహా ప్రపంచంలోని దాదాపు 75 శాతం దేశాల్లో మాతృభాషలోనే విద్యాబోధన సాగుతోంది. ఈ నేపథ్యంలో మన దగ్గర కూడా అదే కొనసాగితే బాగుంటుందనేది పలువురి మాట.

మన తెలుగు భాషకు ఆస్ట్రేలియా అరుదైన గౌరవం ఇచ్చిన నేపథ్యంలో మన భాషను మనం కాపాడుకోవాల్సిన అవసరం ఎంతైనా ఉందని పేర్కొంటున్నారు. మరి ఇప్పటికైనా ఏపీలో తెలుగు మాధ్యమంలో బోధన విషయంలో సర్కారు నిర్ణయం మారుతుందేమో చూడాలి.