Ram Charan: ఒక్కడిగా వచ్చి.. ఒక్కటి నుంచి మొదలెట్టి.. ఒక్కోటి సాధించుకుంటూ వెళ్లింది చిరంజీవి (Chiranjeevi). సాధించిన కీర్తి మెగాస్టార్ (Mega Star). ఆయన వారసుడిగా తెరంగేట్రం చేసింది తనయుడు రామ్ చరణ్ (Ram Charan). పోషించాల్సింది తెరపై హీరో పాత్ర మాత్రమే కాదు.. ప్రేక్షకుల్ని మెప్పించడం, అశేష మెగాభిమానుల అంచనాలు అందుకోవడం, పోటీని తట్టుకుని రేసులో దూసుకెళ్లడం. 17ఏళ్ల క్రితం ‘చిరు’తతో మొదలైన రామ్ చరణ్ వేగం అంతకంతకూ రెట్టింపు అయింది. అలుపెరుగని పరుగులో అనితరసాధ్యమైన విజయాలెన్నో వచ్చాయి. అపజయాలెదురైనా ఆగని.. అలసిపోని వేగం అది. ఆ కష్టానికి దక్కిన ప్రతిఫలం రాష్ట్రం దాటి దేశం.. దేశం దాటి అంతర్జాతీయస్థాయి ఖ్యాతి.. పేరు ప్రఖ్యాతులు. ఇన్నేళ్లలో చేసింది 14 సినిమాలు. అందులో 3 ఇండస్ట్రీ హిట్లు. రామ్ చరణ్ జనరేషన్ హీరోల్లో మరే హీరోకీ లేని అద్భుతమైన రికార్డు ఇది.
తొలి సినిమా నుంచే..
చిరుత సినిమాతో తన మార్క్ మాస్ ఇమేజ్ తోనే తనయుడినీ తెరంగేట్రం చేయించడం రామ్ చరణ్ కు కలిసొచ్చింది. ఓ ప్రేమ కథ.. కాలేజీ నేపథ్యంలో సినిమా చేసి తర్వాత మాస్ ఇమేజ్ కోసం ప్రయత్నించకుండా తొలి అడుగే రామ్ చరణ్ లోని పవర్ చూపించారు. డాషింగ్ డైరక్టర్ గా.. హీరోలకు మాస్ ఎలివేషన్స్ ఇచ్చే పూరి జగన్నాధ్ తన పవర్ ను పూర్తిగా రామ్ చరణ్ లో చూపించారు. చిరంజీవి కొడుకు ఎలా ఉంటాడో.. ఎలా నటిస్తాడో.. డ్యాన్స్, ఫైట్స్ లో చిరంజీవిని మెప్పిస్తాడా.. అనే యావత్ తెలుగు ప్రేక్షకులు అందరికీ సరైన సమాధానం చెప్పి 100శాతం మెప్పించేశాడు. ఫస్ట్ ఫైట్ చూడగానే చరణే కనిపించేంతలా.. ఫస్ట్ సాంగ్ చూడగానే చిరంజీవి పేరు నిలబెట్టాడనేలా.. నటన చూడగానే తన మార్క్ పడేలా చేసి తొలి విజయాన్ని.. తొలి మెట్టుతోనే ఘనంగా ఎక్కేశాడు రామ్ చరణ్.
అదిరిపోయే లుక్స్..
నటుల్లో ఎవరికైనా తొలి సినిమా నుంచి సినిమా సినిమాకీ.. లుక్స్ మారడం సహజం. కానీ.. రామ్ చరణ్ చిరుతలో ఎంతటి పవర్ ఫుల్ మాస్ లుక్ లో ఉన్నాడో అదే దాదాపుగా ఇప్పటికీ ఉంది. తొలి సినిమా నుంచీ అదే చార్మ్. ఫిట్ నెస్ లో ఖచ్చితత్వం.. చేసే పనిలో నిబద్ధత. క్రమశిక్షణకు మారు పేరు. నటనలో చిరంజీవి నేర్పింది ఏదీ లేదు.. ఇండస్ట్రీలో ఎలా ఉండాలనే క్రమశిక్షణ తప్ప. అదే మనకి నడవడిక నేర్పిస్తుందని చిరంజీవి చెప్పిన మాటల్ని తూ.చ తప్పకుండా పాటించాడు. ఆ దీక్షా ఫలితమే మెగా పవర్ స్టార్ టు గ్లోబల్ స్టార్ కీర్తి. అభిమానుల పరవశమూ ఇదే. ఎందరికో ఆదర్శమైన చిరంజీవి.. తనయుడికీ ఆదర్శమయ్యారు. రామ్ చరణ్ ద్వారా పుత్రోత్సాహాన్ని పొందుతున్నారు.