చిరంజీవి ఒరిగిపోలేదు, ఒధిగిపోయారు: కళ్యాణ్ దిలీప్ సుంకర

‘‘మెగాస్టార్ చిరంజీవి, ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి ముందర ఒరిగిపోయారు. తన స్థాయిని తగ్గించేసుకుని మరీ, ముఖ్యమంత్రిని పరిశ్రమ సమస్యలపై సానుకూలంగా స్పందించాలని దేబిరించారు, చేతులు జోడించి మరీ వేడుకున్నారు..’’ అంటూ సోషల్ మీడియా వేదికగా మొసలి కన్నీరు కార్చుతున్నారు చాలామంది.

ఈ విషయమై కళ్యాణ్ దిలీప్ సుంకర, తన యూ ట్యూబ్ ఛానల్ ద్వారా ఆసక్తికరమైన వ్యాఖ్యలు చేశారు. మంచు విష్ణు ఎలా గుర్తింపు కోసం దేబిరించేదీ తనదైన ఛమక్కులతో వివరించారు, సెటైర్లు దంచేశారు. చిరంజీవి ఎందుకు వైఎస్ జగన్ మోహన్ రెడ్డి దగ్గర అలా ‘ఒదిగిపోయి’ వ్యవహరించారో చెప్పుకొచ్చారు.

నిజానికి, చాలామంది చిరంజీవి అభిమానులు కూడా, తమ అభిమాన నటుడు అలా వైఎస్ జగన్ మోహన్ రెడ్డి దగ్గర చేతులు జోడించడాన్ని జీర్ణించుకోలేకపోయారు. అయితే, కార్యసాధకుడు తాను వెళ్ళిన పనిని సజావుగా పూర్తి చేసుకోవాలనుకునే క్రమంలో ఎలా ఒదిగి వుండాలో, అదే చిరంజీవి చేశారన్నది కళ్యాణ్ దిలీప్ సుంకర అభిప్రాయం.

నిజమే, చిరంజీవి తన సమస్య గురించి చెప్పుకోవడానికి ముఖ్యమంత్రి దగ్గరకు వెళ్ళలేదు. సినీ కళామతల్లి బిడ్డగా, పరిశ్రమ ఎదుర్కొంటున్న సమస్యల్ని ఆంధ్రప్రదేశ్ ముఖ్యమంత్రికి వివరించడానికి వెళ్ళారు. అక్కడ జగన్మోహన్ రెడ్డి ముందు చిరంజీవి ఒరిగిపోయారనడం కంటే, ముఖ్యమంత్రి అనే పదవి ముందు ఆయన ఒదిగి వ్యవహరించారన్నది సరైన పోలిక. అదే విషయాన్ని కళ్యాణ్ దిలీప్ సుంకర స్పష్టంగా పేర్కొన్నారు.

చిరంజీవిని అలా చూడటం కేవలం ఆయన అభిమానుల్నే కాదు, చిరంజీవి వెంట వెళ్ళిన మహేష్, ప్రభాస్ తదితరులకూ ఒకింత బాధగా అనిపించినట్టుంది. అందుకే, చిరంజీవి చొరవ వల్లనే పరిశ్రమ పట్ల ఆంధ్రప్రదేశ్ ప్రభుత్వం సానుకూలంగా స్పందించిందన్న అభిప్రాయాన్ని వ్యక్తం చేశారు. చిరంజీవి అలా చొరవ చూపించేందుకు ఎంత కష్టపడిందీ మహేష్, ప్రభాస్ తమ మాటల్లో పేర్కొన్నారు.

కాగా, తన వీడియోలో కళ్యాణ్ దిలీప్ సుంకర, ముఖ్యమంత్రి వైఎస్ జగన్ మోహన్ రెడ్డి వ్యవహారశైలి పట్ల కూడా సెటైర్లు వేశారు. ఆయన్ను కలిసేందుకు వెళ్ళిన వ్యక్తుల పట్ల ఒకింత నిర్లక్ష్యంగా, వెకిలిగా వైఎస్ జగన్ కనిపించారనీ, అయితే అది అతని సహజ వ్యవహార శైలి అయి వుండొచ్చని కళ్యాణ్ దిలీప్ పేర్కొన్నారు. ‘బహుశా అది అభద్రతాభావంతో అయి వుండొచ్చు..’ అన్న భావన సర్వత్రా వ్యక్తమవుతోందనుకోండి.. అది వేరే విషయం.