ఎలుక.! అమ్మో భయం.! కానీ, ఈ ఎలుకనీ దేవుడిగా పూజిస్తాం మనం.! ఔను, మహా గణపతికి వాహనం ఎలుకే కదా.!
అసలు విషయంలోకి వస్తే, మనిషి జీవిత కాలాన్ని పెంచడానికి ఎన్నో ఏళ్ళుగా పరిశోధనలు జరుగుతూనే వున్నాయి. ఒకప్పుడు వందేళ్ళు.. ఆ పైన.. మనుషులు జీవించేవారు. అది కూడా, ఎలాంటి అనారోగ్య సమస్యలూ లేకుండా.
కానీ, ఇప్పుడు పరిస్థితి వేరు. వందేళ్ళు బతకడం అనేది ఓ పెద్ద టాస్క్. అది కూడా, నానా రకాల మందులు, శస్త్ర చికిత్సలు.. ఇలాంటి వాటి సాయంతో ఎలాగోలా ఓ డెబ్భయ్, ఎనభై ఏళ్ళు బతికేస్తున్నాం. అదృష్టం కలిసొస్తే ఇంకో పదేళ్ళు అదనంగా బతుకుతున్నాం.!
అయితే, ఇకపై ఇంకాస్త ఎక్కువ కాలం జీవించడానికి మార్గం సుగమం కాబోతోంది. అది కూడా ఓ ఎలుక సాయంతో.! ఎలుక అంటే, కేవలం ఎలుక కాదు.! అందులో చాలా జాతులున్నాయ్. ఇంట్లో కనిపించే చిట్టెలుక, సాధారణ ఎలుకలే కాదు.. పంది కొక్కుల్లాంటివి కూడా వుంటాయ్.
అలాగే, నేక్‌డ్ మోల్ ర్యాట్ అనే ఎలుక ఒకటి వుంది. అంతరించిపోతున్న జీవుల్లో ఇది కూడా ఒకటి.! అత్యంత వేగంగా అంతరించిపోతోందిది.! దీన్ని ప్రత్యేకంగా సంరక్షించే చర్చలూ చేపట్టారు. ఎందుకంటే, ఇది మనిషి జీవిత కాలాన్ని పెంచబోతోందిట. ఆఫ్రికా దేశాల్లో అరుదుగా కనిపిస్తుందిది. దీన్ని స్యాండ్ పప్పీ అని కూడా అంటారు.
ఈ సాండ్ పప్పీ లేదా నేక్‌డ్ మోల్ ర్యాట్‌లో ప్రత్యేకమైన జన్యు నిర్మాణం వుంది. ఆ కారణంగా, తన సైజులో వుండే, సాధారణ ఎలుకల కంటే పది రెట్లు ఎక్కువ కాలం జీవిస్తుందిది. క్యాన్సర్ వంటి రోగాలు దీనికి రావు. సాధారణ ఎలుకల్లో కనిపించే చాలా రకాల అనారోగ్య సమస్యలు ఈ సాండ్ పప్పీల్లో కనిపంచవట.
నేక్‌డ్ మోల్ ర్యాట్ లేదా సాండ్ పప్పీలపై పరిశోధనలు చేసిన వెరా గొరుబునోవా అనే బయాలజీ ప్రొఫెసర్, దీంట్లోని ఓ ప్రత్యేక జన్వువుని సాధారణ ఎలుకల్లోకి మార్చడం ద్వారా వాటి జీవిత కాలాన్ని పెంచవచ్చునని అంటున్నారు. ‘హెచ్ఎండబ్ల్యు-హెచ్’ అనే మెకానిజం వల్లనే, ఈ నేక్‌డ్ మోల్ ర్యాట్‌కి ఈ ప్రత్యేకత అట.
తన పరిశోధనల ారాంశాన్ని వెరా గొరుబునోవా మెడికల్ జర్నల్స్‌ ద్వారా ప్రపంచానికి చాటి చెబుతున్నారు. ప్రస్తుతానికి ఎలకల మీద ప్రయోగాలు జరుగుతున్నాయనీ, ముందు ముందు మనుషుల మీద కూడా ప్రయోగాలు చేస్తామని అంటున్నారు వెరా గొరుబునోవా. ఓ బృందం ఈ మేరకు సాధ్యాసాధ్యాల్ని పరిశీలిస్తోంది.
క్యాన్సర్ సహా అనేక అనారోగ్య సమస్యల నుంచి మనిషికి ఈ ప్రయోగాల ద్వారా కొంత ఉపశమనం లభించే అవకాశం వుందట. మనిషి ఎక్కువ కాలం జీవించడం, అది కూడా తక్కువ అనారోగ్య సమస్యలతో జీవించడం అనేది తమ ప్రయోగాల్లో అత్యంత ప్రయార్టీతో కూడిన అంశమని వెరా గురుబునోవా బృందం చెబుతోంది.
కాగా, నేక్‌డ్ మోల్ ర్యాట్ నుంచి, ‘హెచ్ఎండబ్ల్యు-హెచ్ఎ’ అనే జీన్‌ని తొలగించి చూస్తే, దాంట్లో కణితులు పెరగడాన్ని వెరా గురుబునోవా మరియు ఆయన సహచరుల బృందం తమ పరిశోధనల్లో గుర్తించింది. అదే సమయంలో, సాధారణ ఎలుకల్లో ఆ జీన్‌ని ప్రవేశపెట్టినప్పుడు, వాటి జీవిత కాలం పెరిగింది.
సాధారణ ఇమ్యూన్ సిస్టమ్ ఈ జీన్ ప్రవేశంతో మరింత పెరిగిన దరిమిలా, ఎలుకలకే కాదు.. మానవులకీ ఈ జీన్ వల్ల ఎంతో ప్రయోజనం వుంటుందని వెరా బృందం పేర్కొంది. ముందు ముందు చేయబోయే ప్రయోగాలు కూడా సఫలమైతే, తక్కువ కాలంలోనే, మనిషికి అత్యద్భుతమైన ఉపశమనం దొరకనుందన్నది ఆ బృందం వ్యక్తం చేస్తున్న అభిప్రాయం.