గొడుగులతో కరోనాకు చెక్?

ప్రాణాంతక కరోనా మహమ్మారిని గొడుగులతో అడ్డుకోవచ్చా? అసలు మందే లేదని ప్రపంచం గగ్గోలు పెడుతున్న తరుణంలో గొడుగుతో ఈ వైరస్ ను ఎలా అడ్డుకుంటాం అని అనుకుంటున్నారా? నిజమే ప్రస్తుతానికి కరోనాకు మందు లేదు.. వాక్సినూ లేదు. ఇది సోకకుండా చూసుకోవడమే ఏకైక మార్గం. అందుకు భౌతికదూరం పాటించడం తప్ప మరో ఆప్షన్ లేదు.

స్వీయ గృహనిర్బంధం పాటించడం, ఒకవేళ బయటకు వస్తే భౌతికదూరం ఉండేలా చూసుకోవడం తప్పనిసరి. కానీ ప్రస్తుతం నిత్యావసరాల కొనుగోలులో గానీ, బ్యాంకులకు వచ్చినప్పుడు గానీ చాలామంది సోషల్ డిస్టెన్స్ పాటించడంలేదు. కొన్నిచోట్ల ఎంతదూరంలో ఉండాలో మార్కింగ్ గీస్తున్నారు. కానీ అన్నిచోట్లా ఇది కుదరడంలేదు.

ముఖ్యంగా జన్ ధన్ ఖాతాల్లో కేంద్ర ప్రభుత్వం వేసిన రూ.500 నగదు తీసుకోవడానికి గురువారం పెద్ద సంఖ్యలో మహిళలు బ్యాంకుల ముందు బారులు తీరారు. ఎక్కడా భౌతికదూరం పాటించలేదు. దీంతో వైరస్ వ్యాప్తిపై ఆందోళన నెలకొంది. ఈ పరిస్థితుల్లో ‘అంబరిల్లా ప్రిన్సిపల్‘ అక్కరకొస్తుందని విశాఖపట్టణానికి చెందిన డాక్టర్ కూటికుప్పల సూర్యారావు చెబుతున్నారు.

బయటకు వచ్చిన ప్రతి ఒక్కరూ గొడుగు వేసుకుంటే, ఆటోమేటిగ్గా మనిషికీ మనిషికీ మధ్య కనీసం మూడు అడుగుల దూరం ఉంటుందని.. తద్వారా భౌతికదూరం పాటించినట్టేనని పేర్కొంటున్నారు. భౌతికదూరం పాటించడం ద్వారా 75 శాతం మేర కరోనాను నియంత్రించవచ్చనే సంగతి అధ్యయనాల్లో తేలిందని.. ఈ మహమ్మారిని ఎదుర్కోవడానికి ఇంతకు మించిన ఔషధం లేదని చెప్పారు.

కరోనా కనీసం ఏడాది పాటు ఉండే అవకాశం కనిపిస్తోందని.. ఈ నేపథ్యంలో ఈ గొడుగు చిట్కా తప్పకుండా పనిచేస్తుందని ఆయన ధీమాగా చెబుతున్నారు. ప్రస్తుతం ఎండలు కూడా పెరుగుతున్న నేపథ్యంలో బయటకు వచ్చే ప్రతి ఒక్కరూ గొడుగు వేసుకుంటే అటు ఎండ నుంచి, ఇటు కరోనా నుంచి కూడా రక్షణ పొందొచ్చని స్పష్టంచేస్తున్నారు. ఈ చిట్కా వర్కవుట్ అయ్యేలాగే కనిపిస్తోంది.