న్యూయార్క్ లో 33ఏళ్ల సీఈవో దారుణ హత్య.. ముక్కలు ముక్కలుగా చేసి..

గుర్తు తెలియని దుండగులు చేసిన దాడిలో 33ఏళ్ల ఓ యువ వ్యాపారవేత్త దారుణ హత్యకు గురయ్యాడు. న్యూయార్క్ లో ఈ దారుణ ఘటన జరిగింది. బంగ్లాదేశ్ కు చెందిన ఫాహిమ్ సలేహ్ తన విలాసవంతమైన ఫ్లాట్ లోనే హత్యకు గురయ్యాడు. ఫాహిమ్ రవాణా, ఫుడ్ డెలివరీ సేవలు అందించే సంస్థకు సహ వ్యవస్థాపకుడిగా ఉన్నాడు. ఫాహిమ్ సోదరి ఫ్లాట్ కు వచ్చి చూసేసరికి అతడి మృతదేహం ముక్కలుగా పడి ఉంది. విషయం పోలీసులకు చేరవేయడంతో అక్కడికి చేరుకున్నారు.

ఈ దాడిలో అనుభవం ఉన్న హంతకులే పాల్పడి ఉంటారని ప్రాధమిక నిర్ణయానికి వచ్చారు. ఫాహిమ్ సోదరి వచ్చే వరకూ దుండగులు అక్కడే ఉండి ఉంటారని.. ఆమె వచ్చిన అలికిడికి వారు పారిపోయి ఉంటారని పోలీసులు అంచనా వేస్తున్నారు. సీసీటీవీ ఫుటేజీని పరిశీలించిన పోలీసులకు ఓ నిందితుడు ఫాహిమ్ సోదరి వెనుకే వచ్చినట్టు గుర్తించారు.

ఫాహిమ్ సౌదీ అరేబియాలో జన్మించాడు. పెరిగిందంతా న్యూయార్క్ లోనే. ఫాహిమ్ స్ధాపించిన సంస్థ బంగ్లాదేశ్ లో కార్యకలాపాలు సాగిస్తుంది. అక్కడ ఫుడ్ డెలివరీ, రవాణా రంగాల్లో ఈ సంస్థ సేవలు అందిస్తోంది. చిన్న వయసులోనే 100 మిలియన్ డాలర్ల స్థాయికి వ్యాపారాన్ని విస్తరించాడు. నైజీరియాలో కూడా ‘గోకడ’ అనే వ్యాపార సంస్థను ప్రారంభించాడు ఫాహిమ్. అక్కడ 6.9 మిలియన్ డాలర్లు పెట్టుబడి పెట్టాడు. ఫాహిమ్ హత్యకు కారణాలు తెలియాల్సి ఉంది. హత్య ఎవరు చేశారనేదానిపై పోలీసులు విచారణ చేపట్టారు.