బిగ్‌ షాక్‌: ఏపీలో ఈ రోజు సెంచరీ కొట్టిన కరోనా.!

ఆంధ్రప్రదేశ్‌లో ఈ రోజు నమోదైన కరోనా పాజిటివ్‌ కేసుల సంఖ్య సెంచరీ దాటేసింది. మొత్తంగా 102 కొత్త కరోనా పాజిటివ్‌ కేసులు రాష్ట్రంలో నమోదయ్యాయి. అయితే, రాష్ట్ర ప్రభుత్వం.. రాష్ట్రంలో నమోదైన కేసుల సంఖ్యను 57గా చూపిస్తోంది. అదే సమయంలో, ఇతర రాష్ట్రాలకు చెందిన కేసులు 45 అని విడిగా పేర్కొంటుండడం గమనార్హం. నిన్నటినుంచే ఈ విధానం అమలు చేస్తోంది రాష్ట్ర ప్రభుత్వం.

దేశంలోని వివిద రాష్ట్రాల నుంచి రాకపోకలు ప్రారంభమయిన దరిమిలా, ఆయా రాష్ట్రాల్లో కరోనా పాజిటివ్‌ కేసుల సంఖ్య పెరుగుతూ వస్తోంది. కొన్ని రాష్ట్రాలు ‘మైగ్రెంట్స్‌’ పేరుతో ప్రత్యేకంగా కేసుల వివరాల్ని ప్రకటిస్తున్నా, వాటి వివరాల్ని మొత్తం కేసులతో కలిపే చూపిస్తున్నాయి. ఆంధ్రప్రదేశ్‌ మాత్రం అందుకు భిన్నంగా వ్యవహరిస్తుండడం గమనార్హం. ఇదిలా వుంటే, తమిళనాడు కోయంబేడు మార్కెట్‌ తాలూకు ఎఫెక్ట్‌తో ఆంధ్రప్రదేశ్‌లో కేసుల సంఖ్య గణనీయంగా పెరుగుతోంది. ఈ కేసుల్ని కూడా ప్రత్యేకంగా ప్రస్తావిస్తున్నా, ఏపీ కేటగిరీలోనే వేస్తోంది ఆంధ్రప్రదేశ్‌ వైద్య ఆరోగ్య శాఖ.

రాష్ట్రానికి సంబంధించి మొత్తం లెక్కలో ‘మైగ్రెంట్స్‌’ని పేర్కొనకపోతే, ఆ కేసులు దేశానికి చెందిన మొత్తం లెక్కలో కలుస్తాయా.? లేదా.? అన్నది మిలియన్‌ డాలర్ల ప్రశ్న. ఏ రాష్ట్రానికి ఆ రాష్ట్రం ఇదే నిర్ణయం తీసుకుంటే.. లెక్కలు పూర్తిగా తప్పేస్తాయి. తెలంగాణలోనూ, ఇతర పొరుగు రాష్ట్రాల్లోనూ లేని విధానం ఆంధ్రప్రదేశ్‌ ఎందుకు ఫాలో అవుతోందో ఏమో.. అధికార యంత్రాంగం వివరణ ఇవ్వాల్సి వుంది. ఇక, ఈ రోజు రాష్ట్రం చెబుతున్నదాన్నిబట్టి 57 కేసులు నమోదవడాన్ని పరిగణనలోకి తీసుకున్నా.. కేసుల సంఖ్య మళ్ళీ గణనీయంగా పెరుగుతున్నట్లే భావించాలేమో.

కర్నూలు జిల్లాలో నిన్న కొత్త కేసులు నమోదు కాకపోగా, ఈ రోజు నమోదవడం ఆందోళన కలిగిస్తోంది. విజయనగరం జిల్లాలోనూ కొత్త కేసులు (3) నమోదయ్యాయి. గుంటూరు జిల్లాలో మాత్రం కొత్త కేసులు నమోదు కాకపోవడం గమనార్హం. విశాఖపట్నంలో 2 కొత్త కేసులు నమోదయ్యాయి. కోయంబేడు ఎఫెక్ట్‌తో చిత్తూరు జిల్లాలో కేసులు పెరుగుతుండడం ఆందోళన కలిగిస్తోంది. ఏదిఏమైనా, మైగ్రెంట్స్‌ని కలుపుకుని రాష్ట్రంలో ఈ రోజు 102 కేసులు నమోదు కాగా.. కరోనా వైరస్‌కి సంబంధించి రాష్ట్రంలో ఒకే రోజు నమోదైన అతి ఎక్కువ కేసులు ఇవే.