జనసేన అధినేత పవన్ కళ్యాణ్ పోటీ చేస్తున్న నియోజకవర్గమది. ‘ఆ నియోజకవర్గం నాదే..’ అని చెప్పుకుంటున్నారు టీడీపీ నేత వర్మ. ఆయన గత ఎన్నికల్లో ఓడిపోయిన నియోజకవర్గం అది. సరే, రాజకీయాల్లో గెలుపోటములు సహజం.. అది వేరే సంగతి. ఇండిపెండెంట్‌గా వర్మ పిఠాపురం నుంచి ఓసారి గెలిచారు.!
అంతమాత్రాన, ‘పిఠాపురం నాది’ అంటే ఎలా కుదురుతుంది.? పొత్తుల నేపథ్యంలో జరిగిన సీట్ల పంపకాల్లో పిఠాపురం నియోజకవర్గం జనసేనకు దక్కింది. అలాగే, కాకినాడ లోక్ సభ నియోజకవర్గం కూడా. పిఠాపురం నుంచి పవన్ కళ్యాణ్ పోటీ చేసినా, తంగెళ్ళ ఉదయ్ శ్రీనివాస్ పోటీ చేసినా.. అది జనసేన అంతర్గత వ్యవహారం.
కుప్పం నుంచి చంద్రబాబు, మంగళగిరి నుంచి లోకేష్ పోటీ చేస్తోంటే, స్థానిక జనసేన నేతలు సహకరిస్తున్నారా.? లేదా.? తెనాలిలో సమస్య లేదు, తాడేపల్లి గూడెంలో ఇబ్బంది లేదు.. టీడీపీ – జనసేన పంపకాల్లో భాగంగా ప్రకటితమైన చాలా సీట్లలో పరిస్థితులు ప్రశాంతంగానే వున్నాయి.
కానీ, పిఠాపురంలోనే టీడీపీ నేత వర్మ ఎగిరెగిరి పడుతున్నారు. ‘పవన్ కళ్యాణ్ పోటీ చేయకపోతే, ఆ సీటు నాది’ అంటున్నారు వర్మ. పవన్ పోటీ చేయకపోతే, తంగెళ్ళ ఉదయ్‌కి దక్కుతుంది ఆ సీటు. అయినా, ‘లక్ష మెజార్టీతో గెలుస్తాం.. పిఠాపురంలో నేనే పోటీ చేస్తున్నా..’ అని పవన్ కళ్యాణ్ చెప్పాక, వివాదం ఏముంది.?
ఒకవేళ లోక్ సభకు పోటీ చేయాల్సి వస్తే.. అన్న ప్రస్తావన పవన్ కళ్యాణ్ వ్యూహాత్మకంగా తెరపైకి తెచ్చారు. దాన్ని అవకాశంగా తీసుకుని వర్మ ఆడుతున్న డ్రామాలు చూస్తోంటే, ఇది పచ్చ కామెర్ల రోగం అనాలా.? లేదంటే, నీలి పైత్యం అనాలా.?
టీడీపీ – జనసేన మధ్య పిఠాపురం నియోజకవర్గానికి సంబంధించి సోషల్ మీడియా వేదికగా రచ్చ జరుగుతోందంటే, దానిక్కారణం వర్మ. పిఠాపురం నియోజకవర్గంలోనూ కూటమి అభ్యర్థి విషయమై గందరగోళానికి కారణం వర్మే. వున్నపళంగా వర్మని కంట్రోల్ చేయాల్సిన బాధ్యత తన భుజాల మీదే వుందని టీడీపీ అధినేత నారా చంద్రబాబునాయుడు గుర్తెరగాలి.
‘సాక్షిలో తప్పుడు వార్తలు రాస్తున్నారు’ అంటూ టీడీపీ అధికారిక హ్యాండిల్‌తో ట్వీటేస్తే సరిపోదు, వర్మ గలాటాకి సంబంధించి. ‘అదుపులో వుంటావా.? బయటకు పోతావా.?’ అనే స్థాయిలో వర్మకి, టీడీపీ వార్నింగ్ ఇవ్వాల్సిందే. నారా లోకేష్, చంద్రబాబు మీద ఆ స్థాయిలో వర్మ తన అనుచరులతో బూతులు తిట్టించారు మరి.
వర్మ ఎంత ఎగిరినా పిఠాపురంలో జనసేనకు వచ్చిన ఇబ్బందేమీ లేదు. కాకపోతే, జనసైనికులు గుస్సా అయితే, టీడీపీ అభ్యర్థులు ఇతర నియోజకవర్గాల్లో ఇబ్బందులు ఎదుర్కోవాల్సి వస్తుంది. ఇంతకీ, వర్మ వెనకాల వున్నదెవరు.? పచ్చ మాఫియానా.? నీలి మాఫియానా.?