మీడియాని కడిగేసిన ‘వైరల్‌’ వనిత రీనా ద్వివేదీ

సోషల్‌ మీడియాలో ఎప్పుడు ఎవరు ఎలా వైరల్‌గా మారతారో చెప్పలేం. అలా అనుకోకుండా పాపులర్‌ అయ్యిందో మహిళ. ఆమె పేరు రీనా ద్వివేదీ. సార్వత్రిక ఎన్నికల్లో రీనా ద్వివేదీ గురించి జరుగుతోన్న చర్చ బహుశా ఇంకెవరి గురించీ జరగడంలేదనడం అతిశయోక్తి కాకపోవచ్చు. లఖ్‌నవూలో ఓ సాధారణ ఉద్యోగిని ఆమె. ఎన్నికల విధుల్లో పాల్గొన్న ఆమె వస్త్ర ధారణ చాలామందిని ఆకర్షించింది. ఆమె కట్టుకున్న చీర, పెదాలకు వేసుకున్న లిప్‌స్టిక్‌, చేతిలో ఈవీఎం బాక్స్‌.. అన్నిటికీ మించి ఆమె స్టైలింగ్‌.. సోషల్‌ మీడియాలో వైరల్‌గా మారాయి.

‘ప్రపంచ అందగత్తె’ అనదగ్గ స్థాయిలో రీనా ద్వివేదీ గురించి మీడియా కూడా ‘కోడై’ కూసేసింది. ఓ మహిళా ఉద్యోగి విషయంలో మీడియా ఇంత అత్యుత్సాహం చూపడం సహజమేనా? అన్న చర్చ కొన్ని చోట్ల జరిగినాసరే, ఆమె పేరుని హైలైట్‌ చేయడంలో మీడియా సంస్థలు పోటీ పడ్డాయి. చివరికి ఆమె జరుగుతున్న ప్రసహనంపై స్పందించక తప్పలేదు. ‘గతంలో కూడా నేను ఎన్నికల విధుల్లా పాల్గొన్నాను. కానీ, ఇప్పుడే ఎందుకో నా ఫొటోల్ని వైరల్‌ చేసేశారు. నేను సాధారణ మహిళను మాత్రమే’ అని స్పష్టం చేశారామె.

‘నా ఫొటోల్ని వైరల్‌ చేయడం వల్ల గతంలో ఎన్నడూ లేనంత బిజీగా మారిపోయింది నా జీవితం. ఎక్కడికైనా వెళితే చాలు, అందరూ నన్ను గుర్తు పట్టేస్తున్నారు. ఇది కొంత ఇబ్బందిగా మారింది’ అని ఆమె ఆవేదన వ్యక్తం చేశారు. ‘ఈ అందమే ఎన్నికల్లో అదనంగా పోలింగ్‌ జరిగేలా చేసింది’ అంటూ మీడియాలో జరుగుతున్న చర్చ పట్ల ఆమె సీరియస్‌గా స్పందించారు. ప్రజల్లో చైతన్యంతోనే ఓటింగ్‌ పెరుగుతుంది తప్ప, ఎన్నికల విధులు నిర్వహించేవారి అందచందాల మీద అది ఆధారపడి వుండదని రీనా ద్వివేదీ స్పష్టం చేశారు.

తాను పనిచేసిన పోలింగ్‌ బూత్‌లో 70 శాతం పోలింగ్‌ నమోదయ్యిందని రీనా ద్వివేదీ వ్యాఖ్యానించారు. అయితే, ఇప్పటిదాకా జరుగుతున్న ప్రచారమేంటంటే, రీనా ద్వివేదీ గ్లామర్‌ కారణంగా 100 శాతం పోలింగ్‌ ఆమె విధులు నిర్వహించిన బూత్‌లో జరిగిందని. రీనా ద్వివేదీ మాత్రమే కాదు, మరో మహిళ విషయంలో కూడా మీడియా ఇలానే అత్యుత్సాహం ప్రదర్శించింది. ‘సోషల్‌ మీడియాని కంట్రోల్‌ చేయలేం, అందులో విజ్ఞులు వుండాలని ఆశించలేం. కానీ, సాధారణ మీడియా పరిస్థితి అది కాదు’ అని రీనా ద్వివేదీ అభిప్రాయపడ్డారంటే, ఆమె ఈ తతంగంతో ఎంతగా అసహనంతో వున్నారో అర్థం చేసుకోవచ్చు.