2012 లో వచ్చిన లైఫ్ ఈజ్ బ్యూటిఫుల్‌ సినిమాలో చిన్న పాత్రలో కనిపించిన విజయ్ దేవరకొండ 2015 లో మొదటి సారి మెయిన్ లీడ్‌ రోల్‌ ను ఎవడే సుబ్రహ్మణ్యంలో చేశాడు. ఆ సినిమాకు మంచి పేరు రావడంతో ఆ తదుపరి ఏడాది పెళ్లి చూపులు సినిమా ఛాన్స్ వచ్చింది. చిన్న సినిమాగా విడుదల అయిన పెళ్లి చూపులు పెద్ద విజయాన్ని సొంతం చేసుకుంది. ఆ సినిమాలో విజయ్ దేవరకొండ యొక్క డైలాగ్‌ డెలివరీ మరియు బాడీ లాంగ్వేజ్ కు యూత్‌ లో మంచి స్పందన వచ్చింది.
పెళ్లి చూపులు సినిమా తర్వాత బ్యాక్ టు బ్యాక్ ద్వారక మరియు అర్జున్ రెడ్డి సినిమాలకు కమిట్ అయ్యాడు. అర్జున్ రెడ్డి సినిమా విజయ్ దేవరకొండ స్థాయిని, క్రేజ్ ను పూర్తిగా మార్చేసింది. అప్పటి వరకు కొద్ది మందికి మాత్రమే తెలిసిన విజయ్ దేవరకొండ రౌడీ స్టార్ గా తెలుగు రాష్ట్రాల్లో స్టార్ గా మారిపోయాడు. అదృష్టం కొద్ది ఆ వెంటనే గీతా గోవిందం సినిమాతో మరో విజయాన్ని సొంతం చేసుకుని అమ్మాయిల్లో విపరీతమైన అభిమానం సొంతం చేసుకున్నాడు.
నాగార్జున, మహేష్ బాబుల తర్వాత ఆ స్థాయిలో లేడీ ఫాలోయింగ్‌ ను దక్కించుకున్న స్టార్ గా రౌడీ స్టార్ విజయ్ దేవరకొండ నిలిచాడు. గీత గోవిందం తర్వాత నోటా, డియర్‌ కామ్రేడ్‌, టాక్సీవాలా, వరల్డ్‌ ఫేమస్ లవర్‌, లైగర్‌ సినిమాలు విజయ్ దేవరకొండ కెరీర్‌ లో మళ్లీ పుంజుకోవడం కష్టమే అన్నట్లుగా నిలిచాయి. పట్టుదలతో సినిమాల్లో ఆఫర్లు దక్కించుకుని స్టార్ అయిన విజయ్ దేవరకొండ అదే పట్టుదలను కొనసాగించాడు.
ఖుషి సినిమాతో చాలా కాలంకు ఓ డీసెంట్‌ హిట్‌ అందుకున్న విజయ్ దేవరకొండ కు మళ్లీ ఫ్యామిలీ స్టార్ నిరాశ పరిచింది. సక్సెస్ ఫ్లాప్ లతో సంబందం లేకుండా సినిమా సినిమాకి తన క్రేజ్ ను పెంచుకుంటూ పోతున్న విజయ్ దేవరకొండ తాజాగా దిల్‌ రాజు బ్యానర్‌ లో మరో సినిమాకు కమిట్ అయ్యాడు. రాజావారు రాణిగారు సినిమాతో దర్శకుడిగా విమర్శకుల ప్రశంసలు దక్కించుకున్న రవి కిరణ్‌ దర్శకత్వంలో విజయ్ దేవరకొండ తదుపరి సినిమా ఉండబోతుంది.
శ్రీలీల హీరోయిన్ గా నటించబోతున్నట్లుగా వార్తలు వస్తున్నాయి. ఈసారి ఖచ్చితంగా మరో విజయాన్ని తన ఖాతాలో వేసుకునేందుకు గాను రౌడీ స్టార్ ప్రయత్నాలు చేస్తున్నాడు. వచ్చే ఏడాది సంక్రాంతికి ప్రేక్షకుల ముందుకు వచ్చే విధంగా రౌడీ స్టార్ ప్లాన్‌ చేస్తున్నాడు. రౌడీ స్టార్ నుంచి ఫ్యామిలీ స్టార్ ఇమేజ్ కోసం ప్రయత్నిస్తున్న విజయ్ దేవరకొండకు రవి కిరణ్‌ అయినా సక్సెస్ ఇస్తాడని ఆశిద్దాం.