Ram : మాటల మాంత్రికుడు ఈ సంక్రాంతికి గుంటూరు కారం సినిమాతో ప్రేక్షకుల ముందుకు వచ్చాడు. మహేష్ బాబు, శ్రీలీల జంటగా నటించిన ఆ సినిమా బాక్సాఫీస్ వద్ద ఆశించిన స్థాయిలో ఫలితాన్ని అందుకోవడంలో విఫలం అయ్యింది. దాంతో త్రివిక్రమ్ తదుపరి సినిమా ఏంటా అంటూ అంతా ఆసక్తిగా ఎదురు చూస్తున్నారు.
కొన్నాళ్ల క్రితం అల్లు అర్జున్ హీరోగా త్రివిక్రమ్ దర్శకత్వంలో మరో సినిమా రాబోతుంది అంటూ వార్తలు వచ్చాయి. జులాయి, సన్నాఫ్ సత్యమూర్తి, అల వైకుంఠపురంలో సినిమాలు వీరి కాంబోలో వచ్చి హ్యాట్రిక్ గా నిలిచిన విషయం తెల్సిందే. ఈ ఏడాదిలోనే వీరి కాంబోలో మరో సినిమా మొదలయ్యే అవకాశాలు ఉన్నాయని ప్రచారం జరిగింది.
బన్నీతో త్రివిక్రమ్ మూవీ నిజమే కానీ, అంతకు ముందు రామ్ హీరోగా ఒక సినిమాను రూపొందించేందుకు గాను త్రివిక్రమ్ ఏర్పాట్లు చేస్తున్నాడట. ప్రస్తుతం డబుల్ ఇస్మార్ట్ సినిమాను పూరి జగన్నాధ్ దర్శకత్వంలో చేస్తున్న రామ్ ఆ వెంటనే త్రివిక్రమ్ దర్శకత్వంలో సినిమాను చేయబోతున్నాడు.
చాలా ఏళ్లుగా రామ్, త్రివిక్రమ్ మూవీ వాయిదా పడుతూ వస్తుంది. స్రవంతి రవి కిషోర్ వీరి కాంబో మూవీని నిర్మించేందుకు ఏర్పాట్లు చేస్తున్నాడు. ఈ ఏడాది లోనే షూటింగ్ ను ప్రారంభించి వచ్చే ఏడాది ఆరంభంలో విడుదల చేసే విధంగా ప్లాన్ చేస్తున్నారు. ఆ తర్వాత బన్నీ తో త్రివిక్రమ్ మూవీ ఉండే అవకాశాలు ఉన్నాయి. అప్పటి వరకు బన్నీ ‘పుష్ప 2’ వర్క్ ను పూర్తి చేస్తాడు.