‘బింబిసార’ హిట్ ఎంజాయ్ చేయక.. పక్కోళ్ల మీద ఏడుపెందుకు వీళ్లకు..?

తెలుగులో సినిమా అభిమానం.. హీరో వర్షిప్ ఎక్కువ. తమిళనాడు తరహాలో గుళ్లు కట్టరేమో కానీ.. గుండెల్లో అభిమానం గూళ్లు కట్టుకుంటారు. తమ హీరో కోసం త్యాగాలకు సైతం సిద్ధమవుతారు. అరచేతుల్లో హారతులు, కటౌట్లకు పాలాభిషేకాలు, రక్త తిలకాలు, తెర ముందు గుమ్మడికాయ దిష్టి తీయడం వంటివి ఎందరో తెలుగు హీరోలకు జరిగాయి.

తమ హీరోలపై ఈ తరహా అభిమానం సమర్ధనీయమే. అయితే.. తమ హీరో కోసం పక్క హీరోను చులకన చేయడం తగనిది. ఒక స్థాయిలో ఉన్న హీరోల మధ్య పోటీ పెట్టుకోవడం సహజమే. కానీ.. ఎంతో సాధించి, ఎందరికో స్ఫూర్తిగా నిలుస్తున్న దిగ్గజాలను ఈతరం కుర్రకారు వయసు, హోదా, స్థాయి మరచి తమ హీరోలతో పోల్చి తక్కువ చేస్తూ శునకానందాన్నే పొందుతున్నారు.

నందమూరి కల్యాణ్ రామ్ స్వీయ నిర్మాణంలో కొత్త దర్శకుడు వశిష్ట్ తో చేసిన ‘బింబిసార’ నిన్న విడుదలై హిట్ టాక్ సొంతం చేసుకుంది. ప్రస్తుత పరిస్థితుల్లో ఓ సినిమా హిట్ అయితే పరిశ్రమకు మేలు. ఈ విషయాన్ని మరచిన నందమూరి అభిమానులు కొందరు ఏకంగా సినిమా రిజల్ట్ ను మెగాస్టార్ చిరంజీవి ఆచార్యతో పోల్చి తక్కువ చేయడం వారి అతికి నిదర్శనంగా నిలుస్తుంది. ఆచార్యతో మూసిన ధియేటర్లు బింబిసారతో ఓపెన్ అయ్యాయి అనటం వారి అవివేకానికి నిదర్శనం.

చిరంజీవి ఫ్లాప్ సినిమా కలెక్షన్లు ఓ సూపర్ హిట్ సినిమా కలెక్షన్లకు సరిపోలవు అనేది తెలుగు సినిమా ట్రేడ్ మాట. అటువంటి చిరంజీవి చరిష్మాను ఓ హిట్ అందుకున్న కల్యాణ్ రామ్ కు ఎలా పోలుస్తున్నారో అర్ధం కానిది. నందమూరి హీరోల్లో ఎవరికి హిట్ వస్తే అటు పోయే ఓ వర్గం ఈ తరహా చీప్ ట్రిక్స్ కు పాల్పడుతున్నారు.

కల్యాణ్ రామ్ ను చిరంజీవితో పోల్చే పిల్ల బ్యాచ్ మరచిపోయింది ఏంటంటే.. బింబిసార ప్రమోషనల్ ఈవెంట్లో కల్యాణ్ రామ్ మాట్లాడుతూ.. చిరంజీవి గారి జగదేకవీరుడు అతిలోక సుందరి, రామ్ చరణ్ మగధీర’ తరహాలో తమ బింబిసార ఉంచేలా ప్రయత్నించామని ఓ స్టేట్మెంట్ ఇచ్చారు.

ఊళ్లో పెళ్లికి కుక్స్ హడావిడి అన్నట్టు.. ఇన్నాళ్లూ కల్యాణ్ రామ్ పై లేని అభిమానం ఒక్క హిట్ తో తెచ్చుకుని.. అదే హీరో చిరంజీవి, రామ్ చరణ్ సినిమాలను ఉదహరించిన వైనం ఈ పిల్ల బ్యాచ్ మరచిపోవడం నిజంగా అవివేకమే. తెలుగు సినిమా శ్రేయస్సును, కొత్తవారిని ఎప్పుడూ ప్రోత్సహించే చిరంజీవిని తక్కువ చేయడం కంటే వారికో హిట్ వచ్చిందనే ఆనందం.. అభిమానంలో తమ ఐక్యత చాటుకుంటే ఆ తరహా అభిమానులకు.. అందరికీ మంచిది..!