‘ఓడిపోయాడు, నియోజకవర్గం మార్చేస్తాడు..’ అంటూ నారా లోకేష్ గురించి నానా రకాల ప్రచారమూ జరిగింది. 2019 ఎన్నికల్లో నారా లోకేష్ రిస్క్ తీసుకుని మరీ, మంగళగిరి నియోజకవర్గాన్ని ఎంచుకున్నారని టీడీపీ చెబుతుంటుంది. అందులో కొంత నిజం లేకపోలేదు కూడా.
సర్వేల్లో నెగెటివ్ రిపోర్ట్స్ వచ్చినాగానీ, నారా లోకేష్ నిజంగానే రిస్క్ చేసి మంగళగిరి నియోజకవర్గాన్ని ఎంచుకున్నారు. చాలా తక్కువ ఓట్లతో.. అంటే, కేవలం 5 వేల ఓట్లతోనే నారా లోకేష్ మంగళగిరిలో ఓడిపోయారు. వైసీపీ అభ్యర్థి ఆళ్ళ రామకృష్ణారెడ్డి గెలిచారిక్కడ. 2014 ఎన్నికల్లోనూ ఆయనే గెలిచారు.
రాజధాని అమరావతి పరిధిలో వుంటుంది మంగళగిరి నియోజకవర్గం. భూ సమీకరణ విషయమై రైతులు కొంత అసహనంతో వుండడం సహా అనేక కారణాలు వైసీపీకి అప్పట్లో ఈ నియోజకవర్గంలో కలిసొచ్చాయి. కానీ, ఇప్పుడు పరిస్థితులు అందుకు పూర్తి భిన్నం. కుల సమీకరణాల్లాంటివి ఈసారి మంగళగిరి నియోజకవర్గంలో పెద్దగా ప్రభావం చూపే అవకాశం లేదు.
టీడీపీ – బీజేపీ – జనసేన కూటమిగా ఏర్పడటం, మంగళగిరిలో ఈ కూటమికి అడ్వాంటేజ్. పైగా, నారా లోకేష్ చాలా చాలా స్పెషల్ ఫోకస్ పెట్టి, గ్రౌండ్ లెవల్‌‌లో బాగానే వర్క్ చేశారు. ఐదేళ్ళుగా రాజధాని అమరావతిని రాచి రంపాన పెడుతున్న వైసీపీ పట్ల విపరీతమైన నెగెటివిటీ ఈ నియోజకవర్గంలో వుంది. అదే నారా లోకేష్‌కి కలిసొస్తోంది.
‘మంగళగిరిలో నారా లోకేష్ గెలుపుపై ఎలాంటి అనుమానాల్లేవ్. మెజార్టీ గురించిన చర్చే ఇక్కడ..’ అని వైసీపీ అంతర్గత సర్వేల్లోనే తేలింది. అందుకే, టీడీపీ నుంచి పలువురు నేతల్ని వైసీపీలోకి లాగేయడంలో వైసీపీ అధినాయకత్వం ప్రయత్నాలు కొంతవరకు సఫలమయ్యాయి కూడా.
పలుమార్లు మంగళగిరి అభ్యర్థుల్ని మార్చిన వైసీపీ, చివరికి మురుగుడు లావణ్యను రంగంలోకి దించింది. మహిళా అభ్యర్థి.. అన్న అంశమైనా కలిసొస్తుందన్నది వైసీపీ ఉద్దేశ్యం కావొచ్చు. కానీ, ఆ ఫ్యాక్టర్ కూడా వర్కవుట్ అయ్యే అవకాశాలు కనిపించడలేదు.
చేనేత కార్మికుల ఓట్లు, దళిత ఓటు బ్యాంకు.. ఇలా లెక్కలేసుకునే అవసరమే లేకుండా నారా లోకేష్, చాలా తేలిగ్గా మంగళగిరి నియోజకవర్గంలో గెలవబోతున్నారన్నది దాదాపు అన్ని సర్వేలూ చెబుతున్న అంశం. ‘కుప్పంలో చంద్రబాబు ఓడిపోతారు.. మంగళగిరిలో నారా లోకేష్ గెలుస్తారు..’ అని కొన్నాళ్ళ క్రితం లోకేష్ గెలుపు గురించి వైసీపీ నాయకులే కామెంట్ చేసిన విషయాన్ని ఇక్కడ ప్రస్తావించుకోవాలి.
అన్నట్టు, సిట్టింగ్ ఎమ్మెల్యే ఆళ్ళ రామకృష్ణారెడ్డి కొన్నాళ్ళ క్రితం వైసీపీకి రాజీనామా చేసి, కాంగ్రెస్ పార్టీలో చేరి, కొన్ని రోజుల తర్వాత తిరిగి వైసీపీలోకి వచ్చేశారు. ఆయనే తిరిగి పోటీ చేసినా, మంగళగిరిలో నారా లోకేష్‌కి కొంత పోటీ వుండేది. ఇప్పుడైతే, లోకేష్ ప్రత్యర్థి పూర్తిగా చేతులెత్తేసిన వైనం కనిపిస్తోంది.