కరోనా కేసుల్లో చైనాను దాటేశాం – డేంజర్ జోన్లో ఇండియా.!

భారత్ లో కరోనా వైరస్ విజృంభణ కొనసాగుతోంది. ప్రస్తుతం మన దేశంలో కేసుల సంఖ్య చైనాను దాటేసింది. అయితే, మరణాలు మాత్రం ఆ స్థాయిలో లేకపోవడం కాస్త ఊరటనిచ్చే అంశం. దేశంలో మూడో విడత లాక్ డౌన్ ఆదివారంతో ముగియనుంది. దానిని పొడిగిస్తున్నట్టు ఇప్పటికే ప్రధాని నరేంద్ర మోదీ ప్రకటించారు. దీనికి సంబంధించిన విధివిధానాలు, సడలింపులు నేడో, రేపో కేంద్రం ప్రకటించనుంది. లాక్ డౌన్ ప్రకటించి 54 రోజులవుతున్నా.. వైరస్ వ్యాప్తి మాత్రం తగ్గుముఖం పట్టడంలేదు.

ఇప్పటివరకు దేశవ్యాప్తంగా 85,784 కేసులు నమోదు కాగా, దాదాపు 2700 మంది ప్రాణాలు కోల్పోయారు. అదే ఈ వైరస్ పుట్టిన చైనాలో ఇప్పటివరకు 82,933 కేసులు నమోదు కాగా, 4,633 మరణాలు చోటుచేసుకున్నాయి. ప్రస్తుతం చైనాలో కొత్తగా నాలుగు కేసులు నమోదు కాగా, మొత్తం 91 యాక్టివ్ కేసులు మాత్రమే ఉన్నాయి. దాదాపు 78వేల మందికి పైగా కరోనా బాధితులు కోలుకున్నారు. మనదేశంలో మాత్రం ఇప్పటివరకు దాదాపు 30వేల మంది మాత్రమే కోలుకున్నారు. ఏప్రిల్ 30 నాటికి భారత్ లో దాదాపు 35వేల కేసులు ఉండగా.. 11 రోజుల్లో అవి రెట్టింపయ్యాయి.

ప్రస్తుతం రోజుకు మూడు నుంచి నాలుగువేల మధ్య కేసులు నమోదవుతున్నాయి. లాక్ డౌన్ సడలింపులతో ఇవి మరింత పెరిగే ప్రమాదం ఉందనే ఆందోళన వ్యక్తమవుతోంది. ప్రస్తుతం ప్రపంచంలో అత్యధిక కరోనా కేసులున్న దేశాల్లో భారత్ 11వ స్థానంలో ఉండగా.. చైనా 13వ స్థానంలో ఉంది. ఇక ప్రపంచవ్యాప్తంగా మొత్తం కేసుల్లో మూడింట ఒక వంతు నమోదైన అమెరికా తొలి స్థానంలో ఉంది. అక్కడ కేసులు 15 లక్షలకు సమీపిస్తున్నాయి. మరణాలు కూడా 90వేలకు చేరుతున్నాయి. ఈ నేపథ్యంలోనే అమెరికా అధ్యక్షుడు ట్రంప్ చైనాపై ఆగ్రహంతో రగిలిపోతున్నారు. ఇక 2.74 లక్షల కేసులతో స్పెయిన్ రెండో స్థానంలో ఉండగా.. 2,63 లక్షల కేసులతో రష్యా మూడో స్థానంలో ఉంది. తర్వాతి స్థానాల్లో బ్రిటన్, ఇటలీ, బ్రెజిల్, ఫ్రాన్స్, జర్మనీ, టర్కీ, ఇరాన్ ఉన్నాయి.