హైదరాబాద్ నుంచే కేరళ గోల్డ్ స్మగ్లింగ్ సొమ్ము

దేశవ్యాప్తంగా సంచలనం సృష్టించిన కేరళ గోల్డ్ స్మగ్లింగ్ కేసు లింకులు హైదరాబాద్ లో తేలాయి. దీనికి సంబంధించిన సొమ్ము హవాలా మార్గంలో హైదరాబాద్ నుంచే దుబాయ్ కు వెళ్లినట్టు దర్యాప్తులో తేలింది. దీంతో ఇప్పటివరకు కేరళకు మాత్రమే పరిమితమైన వ్యవహారం ఇప్పుడు హైదరాబాద్ కు ముడిపడటంతో కలకలం రేగుతోంది. కేరళ ప్రభుత్వానికి చెందిన ఐటీ విభాగంలో పనిచేస్తున్న స్వప్నా సురేశ్.. త్రివేండ్రంలోని యూఏఈ కాన్సులేట్ ఆఫీసును అడ్డం పెట్టుకుని బంగారం అక్రమ రవాణాకు పాల్పడిన సంగతి తెలిసిందే. ఈమె లింకులు కేరళ సీఎంఓలో కూడా బయటపడటంతో దేశవ్యాప్తంగా సంచలనమైంది.

ఈ క్రమంలో ఆమెతోపాటు ఆమెకు సహకరిస్తున్న ఐఏఎస్ అధికారిని కూడా కేరళ సర్కారు వేటు వేసింది. అనంతరం దర్యాప్తు చేపట్టిన కస్టమ్స్ అధికారులు స్వప్నా సురేశ్ తోపాటు ఈ రాకెట్ లో ప్రమేయం ఉన్న సందీప్ నాయర్ లను అరెస్టు చేసి విచారించగా.. కీలక విషయాలు బయటపడ్డాయి. 30 కిలోల బంగారానికి సంబంధించిన సొమ్మును హవాలా మార్గంలో హైదరాబాద్ నుంచి దుబాయ్ పంపించినట్టు తేలింది. రూ.15 కోట్లు ఒక విడతలో, రూ.35 కోట్లు మరో విడతలో అక్కడకు పంపించినట్టు గుర్తించారు.

దీంతో కస్టమ్స్ అధికారులు ఈ సమాచారాన్ని జాతీయ దర్యాప్తు సంస్థ (ఎన్ఐఏ) అధికారులకు అందజేయడంతో వారు రంగంలోకి దిగి విచారణ జరిపారు. అనంతరం ఆ వివరాలను హైదరాబాద్ లోని ఎన్ఐఏ విభాగానికి అందజేశారు. స్వప్నా సురేశ్ కూడా నాలుగైదు సార్లు హైదరాబాద్ వచ్చి వెళ్లినట్టు వెల్లడైంది. హవాలా మార్గంలో సొమ్ము పంపించే విషయం గురించి చర్చించడానికి ఆమె హైదరాబాద్ వచ్చినట్టు తెలుస్తోంది.

అంతేకాకుండా విచారణలో ఆమె హైదరాబాద్ కు చెందిన కొంతమంది వ్యాపారుల పేర్లు కూడా చెప్పినట్టు సమాచారం. దీంతో హైదరాబాద్ ఎన్ఐఏ అధికారులు బేగంబజార్ కు చెందిన బంగారం వర్తకులపై దృష్టి సారించినట్టు సమాచారం. ముఖ్యంగా గతంలో బంగారం అక్రమ రవాణాలో ప్రమేయం ఉన్నవారి వివరాలు సేకరిస్టున్నట్టు తెలిసింది. మరి వీరి దర్యాప్తులో ఎలాంటి విషయాలు వెల్లడవుతాయో చూడాలి.