గ్రేటర్ మటన్.. సేఫ్టీ ఎంత?

దేశంలో కరోనాతోపాటు బర్డ్ ఫ్లూ ప్రమాద ఘంటికలు మోగిస్తున్న తరుణంలో మటన్ కి డిమాండ్ పెరిగింది. చికెన్ కంటే అది మంచిదనే ఉద్దేశంతో పలువురు మటన్ వైపు మొగ్గు చూపుతున్నారు. మరి ప్రస్తుతం హోటళ్లలో వినియోగిస్తున్న మటన్ ఎంతవరకు సురక్షితం? అంటే కచ్చితంగా మంచిదే అని చెప్పలేని పరిస్థితి నెలకొంది. హైదరాబాద్ లోని పలు హోటళ్లలో తనిఖీలు చేసిన అధికారులు.. అధికారిక ముద్ర లేని మాంసాన్ని వినియోగిస్తున్నట్టు గుర్తించి జరిమానాలు వేశారు. చిన్నాచితకా హోటళ్లు అలాంటి పనులకు పాల్పడ్డాయంటే పెద్దగా పట్టించుకోనక్కర్లేదు.

కానీ పేరున్న హోటళ్లు సైతం నిబంధనలను తోసిరాజని ఇష్టారాజ్యంగా వ్యవహరిస్తూ ప్రజల ప్రాణాలతో చెలగాటమాడుతున్న విషయం ఈ తనిఖీల్లో బయటపడింది. గ్రేటర్ హైదరాబాద్ పరిధిలో వేల సంఖ్యలో ఉన్న హోటళ్లు, మాంసం విక్రయ కేంద్రాలూ వేల సంఖ్యలో ఉన్నాయి. వాటన్నింటికీ నగరంలోని పలు ప్రాంతాల్లో ఉన్న కబేళాల నుంచి మటన్ సరఫరా అవుతుంది. అక్కడ నుంచి మటన్ సరఫరా చేసే ముందు వెటర్నరీ డాక్టర్లు ఆ గొర్రెలు, మేకలను పరిశీలించాలి. అవి ఆరోగ్యంగానే ఉన్నాయా లేదా అన్నది ధ్రువీకరించాలి.

ఆ తర్వాతే వాటిని కోసి, ఆ మాంసాన్ని సరఫరా చేయాలి. కానీ ఇదేదీ సరిగా జరగడంలేదు. దీంతో నాణ్యత లేని మాంసం హోటళ్లకు సరఫరా అవుతోంది. తనిఖీలు నిర్వహించాల్సిన అధికారులు మూడు నెలలకో లేదా ఆరు నెలలకో ఒకటి అరా తనిఖీలు చేసి చేతులు దులుపుకొంటున్నారు. దీంతో నాణ్యత లేని మాంసాన్ని ప్రజలు తినాల్సి వస్తోంది.