ఓటు ఎవరికి వెయ్యాలి.? ఎందుకు వెయ్యాలి.?

స్వాతంత్ర్య దినోత్సవం.. గణతంత్ర దినోత్సవం.. ఓటర్ల దినోత్సవం.. ఇలాంటి సందర్భాల్లో స్వాతంత్ర్యం సిద్ధించడం గురించీ, ప్రజాస్వామ్యం గురించీ, గణతంత్రం గురించీ మాట్లాడుకుంటుంటాం. ఇదొక నిరంతర ప్రక్రియ.

అసలు దేశంలో ప్రజాస్వామ్యం ఎదుర్కొంటున్న సవాళ్ళు ఏంటి.? ఎన్నికల వ్యవస్థ ఎలా తయారైంది.? రాజకీయం ఎలా భ్రష్టుపట్టిపోయింది.? వంటి అంశాలపై చర్చ జరగాల్సి వుంది. చర్చ అయితే జరుగుతూనే వుంది.. కానీ, జరగాల్సిన రీతిలో జరగకపోవడమే అసలు సమస్య.

ఎన్నికలు వస్తున్నాయ్.. వెళుతున్నాయ్.! ప్రభుత్వాలు మారుతూనే వున్నాయ్. పాత నీరు పోతోంది, కొత్త నీరు వస్తోంది. రాజకీయం మరింతగా భ్రష్ట్టుపట్టిపోతోంది. ఎన్నికల బరిలో నిలిచినవారిలో ఎవరికి ఓటెయ్యాలో తెలియని అయోమయం ఓటర్లలో నెలకొంటోంది. ఎవరికీ ఓటెయ్యలేని పరిస్థితి వస్తున్న దరిమిలా, ఏం చేయాలి.? అన్న అయోమయం నుంచి ఎవరో ఒకరికి గుద్దేసి చేతులు దులిపేసుకోవాల్సి వస్తోంది.

‘నోటా’ అనే ఆప్షన్ వున్నా, దానికి అస్సలు విలువ లేదు. చదువుకున్నోడు, మంచోడు ఎన్నికల బరిలో నిలవడం అనేది కనాకష్టంగా తయారైంది. ఒకటో, రెండో కేసులు కాదు.. పదో పదిహేనో కేసులు, అందులో హత్య కేసులు, అత్యాచార, హత్యాచార కేసులున్నోళ్ళు కూడా రాజకీయ నాయకులుగా చెలామణీ అయిపోతున్నారు.

అక్రమాస్తుల కేసులో జైళ్ళకు వెళ్ళినోళ్ళు ముఖ్యమంత్రులు అవుతోంటే, వాళ్ళని ఏ పోలీసు అధికారులైతే అరెస్టు చేస్తున్నారో, అదే పోలీసులు.. ఆ తర్వాత వాళ్ళకి సెల్యూట్ చేయాల్సిన దుస్థితి దాపురిస్తోంది. ఇది ప్రజాస్వామ్య వ్యవస్థ తాలూకు గొప్పతనమనాలా.? పతనమనాలా.? ఆ పార్టీ, ఈ పార్టీ, ఆ నాయకుడు, ఈ నాయకుడు అన్న తేడాల్లేవు.! అంతా ఒకటే కథ. కొంచెం ఎక్కువ, ఇంకొంచెం ఎక్కువ భ్రష్టత్వం.. అంతే తేడా.!

చదువుకున్న వ్యక్తి మీద కేసు నమోదైతే, ఉద్యోగానికి అనర్హుడన్న భావన వుంది. అలాంటప్పుడు, రాజకీయ నాయకుల మీద కేసులుంటే, ఎన్నికల్లో పోటీ చేయడానికే అనర్హులవ్వాలి కదా.? అన్న ప్రశ్న సామాన్యుల్లో బలంగా వినిపిస్తోంది.

ఓ పార్టీ నుంచి గెలిచి, ఇంకో పార్టీలోకి దూకెయ్యడం సర్వసాధారణమైపోయింది ఈ రోజుల్లో. అలాంటప్పుడు, ఓటర్లు ఎవరికి ఓటెయ్యాలి. ఎన్నికల సమయంలో ఓటర్లు దేవుళ్ళుగా కనిపిస్తారు.. ఆ తర్వాత మాత్రం, తమను గెలిపించిన ఓటర్లతో బంతాట ఆడేసుకుంటారు రాజకీయ నాయకులు.

ఇదీ ప్రజాస్వామ్యం కానే కాదు, రాజకీయ స్వామ్యమనాలి. కానీ, పిల్లి మెడలో గంట కట్టేదెవరు.? ప్రశ్నించాల్సిన మేధావి వర్గం మౌనం దాల్చడమో, లేదంటే రాజకీయ పార్టీలకు.. నాయకులకు బానిసత్వం చేయడం వల్లనే ఈ దుస్థితి.

ఏదిఏమైనా ఓటుకి రేటు కట్టేసిన రాజకీయం ఇప్పుడు వికటాట్టహాసం చేస్తోంది. ఇంకా ప్రజాస్వామ్యంలోనే వున్నామంటూ అమాయకత్వంలో బతికేస్తున్నాం మనం.! కాదంటారా.?