మాయలమారి కరోనా.. కొత్త లక్షణాలతో విజృంభణ

ప్రపంచాన్ని బెంబేలెత్తిస్తున్న కరోనా మహమ్మారి ఎప్పటికప్పుడు తన రూపాన్ని మార్చుకుంటోంది. ఫలితంగా దాని ఇంకుంబెన్సీ పిరియడ్ పెరగడమే కాకుండా లక్షణాలు కూడా మారుతున్నాయి. తొలుత ఇది కణాలను పొదిగే కాలం 14 రోజులు ఉండగా.. అది ఇప్పుడు 28 రోజులకు పెరిగిపోయింది. ఇంతకుముందు 14 రోజుల్లో ఈ వ్యాధి లక్షణాలు బయటపడేవి. ఒకవేళ 14 రోజులు దాటినా లక్షణాలు లేకుంటే కరోనా లేనట్టే. కానీ ఇప్పుడు ఆ సమయం 28 రోజులకు పెరగడంతో ఆ మేరకు క్వారంటైన్ సమయం కూడా పెంచాల్సి వచ్చింది.

పొడి దగ్గు, జ్వరం, తుమ్ముల వంటి ప్రాథమిక లక్షణాలు తొలుత కనిపించగా.. అనంతరం వీటిలోనూ పలు మార్పులు చోటుచేసుకున్నాయి. రుచి, వాసన కూడా తెలియకపోవడం కరోనా లక్షణాల్లో కొత్తగా చేరాయి. తాజాగా చలి, వణుకు, తలనొప్పి కూడా వీటిలో చేరినట్టు తేలింది. అలాగే గాలిద్వారా ఈ వైరస్ వ్యాపించే అవకాశం లేదని ఇన్నాళ్లూ భావించారు. కానీ తాజా పరిశోధనల్లో అది కూడా తప్పని వెల్లడైంది. గాలిలో నుంచి కూడా వైరస్ వ్యాపిస్తోందనడానికి ఆధారాలు దొరికినట్టు శాస్త్రవేత్తలు చెబుతున్నారు.

గాలి తుంపర్లలో వైరస్ కు చెందిన జన్యు ఉనికిని గుర్తించినట్టు పేర్కొంటున్నారు. కరోనా వైరస్ పుట్టిన వూహాన్ లోని రెండు ఆస్పత్రుల పరిసరాల్లో గాలిలో పరిశోధనలు జరిపి ఈ మేరకు నిర్ధారణకు వచ్చినట్టు వెల్లడించారు. అయితే, దీనిపై మరిన్ని పరిశోధనలు జరిపిన తర్వాతే పూర్తిస్థాయి నిర్ధారణకు రాగలమని చెబుతున్నారు.

గతంలో ల్యాబ్ లో జరిపిన పరిశోధనల్లోనూ ఈ విషయం చూచాయగా వెల్లడైందని.. తాజాగా నేరుగా నిర్వహించిన పరిశోధనలో ఈ విషయంలో స్పష్టత వచ్చిందని వివరించారు. మొత్తానికి మాయలమారి కరోనా ఎప్పటికప్పుడు కొత్త లక్షణాలతో విజృంభించడం ఆందోళన కలిగిస్తోంది.

ఇప్పటికే దీనిని నియంత్రించేందుకు మందులు తయారీలో పలు దేశాలు నిమగ్నమై ఉన్నాయి. అలాగే వాక్సిన్ రూపకల్పనకూ కసరత్తు చేస్తున్నాయి. ఒకవేళ కరోనా మహమ్మారి ఇలాగే తనను ఎప్పటికప్పుడు మార్చుకుంటూ వెళితే మందులు, వాక్సిన్ లోనూ ఎప్పటికప్పుడు మార్పులు చేయాల్సిన పరిస్థితి వస్తుందని అంటున్నారు. అసలు ఈ మహమ్మారి ప్రతాపానికి ముగింపు ఎప్పుడు పడుతుందో చూడాలి.