ఆంధ్రపదేశ్‌లో కరోనా కేసులు నిజంగానే తగ్గుతున్నాయా.?

కొత్తగా నిన్న (మే 27న) ఆంధ్రపదేశ్‌లో కొత్తగా 16,167 కరోనా పాజిటివ్ కేసులు నమోదయ్యాయి. 104 మంది ప్రాణాలు కోల్పోయారు. జరిగిన టెస్టుల సంఖ్య 84 వేలు మాత్రమే. లక్షకు పైగా టెస్టులు జరిగితే, 20 వేల పైన కరోనా పాజిటివ్ కేసులు వెలుగు చూసేవేమోనన్న చర్చ సర్వత్రా జరుగుతోంది. మరోపక్క, ప్రభుత్వం చెబుతున్న మాటలు ఇందుకు భిన్నంగా కనిపిస్తున్నాయి. మొత్తం 10 జిల్లాల్లో కరోనా తగ్గుముఖం పడుతోందన్నది రాష్ట్ర ప్రభుత్వం వాదన. నిజమేనా.? అలాంటి సానుకూల వాతావరణం రాష్ట్రంలో కరోనా విషయంలో వుందా.? అంటే, లేదనే చెప్పాలి. కరోనా బాధితులు చాలామంది బయటకు రావడంలేదు. అంటే, అధికారికంగా టెస్టులు చేయించుకోవడంలేదు.

గ్రామ స్థాయిలో ఈ పరిస్థితి చాలా ఎక్కువగా కనిపిస్తోంది. ఆర్ఎంపీలు తమకు అందుబాటులో వున్న కిట్స్ ద్వారా పరీక్షలు నిర్వహించేసి, మందులు కూడా తామే విక్రయించేస్తున్నారు. పరిస్థితి ప్రమాదకరంగా మారితే తప్ప, బాధితులు ఆసుపత్రులకు వెళ్ళడంలేదు. మరోపక్క, ప్రాణాలు కోల్పోతున్నా.. ఆ విషయాన్ని బయటకు చెప్పుకోలేని పరిస్థితి బాధితుల కుటుంబ సభ్యుల పరిస్థితి. కరోనా అంటే సవాలక్ష ఆంక్షలు.. పదిహేను రోజుల పాటు ఐసోలేషన్‌లో వుండిపోవాలన్న భయంతో చాలామంది కరోనా విషయాన్ని బయటపెట్టడంలేదు. ఈ పరిస్థితి దేశవ్యాప్తంగానూ వుంది. అయితే, అధికారిక లెక్కల ప్రకారంగా చూసుకున్నా, ఆంధ్రపదేశ్ రాష్ట్రంలో కరోనా తీవ్రత ఇంకా ఆందోళనకరంగానే వుంది. కర్ఫ్యూ మరింత పకడ్బందీగా అమలు చేయాలన్న డిమాండ్లు వినిపిస్తున్నా, రాష్ట్ర ప్రభుత్వం తగు రీతిలో నిర్ణయాలు తీసుకోలేకపోతోందన్న వాదన వినిపిస్తోంది.

తెలంగాణలో రోజువారీ కరోనా పాజిటివ్ కేసుల సంఖ్య 4 వేల లోపే వుంది. కానీ, తెలంగాణలో లాక్ డౌన్ పకడ్బందీగా అమలవుతోంది. కేవలం 4 గంటల పాటు మాత్రమే, ప్రజలు రోడ్లపైకి వచ్చేందుకు.. అదీ నిత్యావసర వస్తువుల కొనుగోళ్ళ కోసం అనుమతిస్తున్నారు. మొత్తమ్మీద, కరోనా తగ్గుముఖం పడుతోందంటూ ప్రభుత్వం చెప్పుకున్నా, అధికార పార్టీ అనుకూల మీడియాలో కథనాలొస్తున్నా.. అది సమస్యను పక్కదారి పట్టించినట్లేనని విమర్శిస్తోన్న విపక్షాల వాదనలోనూ వాస్తవం లేకపోలేదు. రోజువారీ మరణాల సంఖ్య 100కి పైగా నమోదవుతుండడం మరింత ఆందోళనకరం.