‘మగతనాన్ని’ చేతికి మొలిపించారు!

వైద్యులు తలుచుకుంటే కానిది ఏముంటుంది? భూలోకంలో ఉండే అపర బ్రహ్మలు వారు. వైద్య విజ్ఞానం అభివృద్ధి చెందిన తర్వాత ఎలాంటి విప్లవ మార్పులు చోటుచేసుకున్నాయో చూస్తున్నాం. ఏ అవయవాన్నైనా అవలీలగా మార్పిడి చేసేస్తున్నారు. ఒకప్పుడు గుండె మార్పిడి అంటే ఔరా అనిపించేది. అది ఇప్పుడు చాలా సాధారణమైపోయింది. అయితే, బ్రిటన్ లో చోటుచేసుకున్న ఈ సంఘటన మాత్రం నిజంగా అద్భుతం అనే చెప్పొచ్చు. ఇలాంటి ప్రక్రియ ప్రపంచంలోనే తొలిసారి అనడంలో ఎలాంటి సందేహం లేదు.

ఇన్ ఫెక్షన్ కారణంగా ఓ వ్యక్తికి అంగం ఊడిపోగా.. వైద్యులు అత్యంత క్లిష్టతరమైన ప్రక్రియతో అతడి చేతికే కొత్త అంగాన్ని మొలిపించి చరిత్ర సృష్టించారు. బ్రిటన్ కు చెందిన మాల్కోలమ్ మెక్ డోనాల్డ్ ఓ మెకానిక్. 2014లో అతడికి ఇన్ ఫెక్షన్ సోకింది. దీంతో అతడి చేతి వేళ్లు, పాదాలు పాడైపోయాయి. క్రమంగా అది అతడి అంగానికి కూడా వ్యాపించింది. కొన్నాళ్ల తర్వాత అది ఊడి కింద పడిపోయింది. కొన్నాళ్లపాటు డోనాల్డ్ అది లేకుండానే జీవించాల్సి వచ్చింది. ఈ క్రమంలో తాగుడుకు బాగా బానిసయ్యాడు. ఈ నేపథ్యంలో అంగం లేకుండా జన్మించిన ఓ బాలుడికి బయోపెనిస్ ఏర్పాటు చేశారనే సంగతి డోనాల్డ్ కి తెలిసింది.

దీంలో లండన్ యూనివర్సిటీ కాలేజ్ హాస్పటల్ లో పెనిస్ మాస్టర్ గా పేరు పొందిన ప్రొఫెసర్ డేవిడ్ రాల్ఫ్ ని సంప్రదించాడు. డోనాల్డ్ కి కొత్త అంగం సృష్టించడం సాధ్యమేనని.. దానిని తొలుత చేతికి మొలిపించాలని.. అనంతరం దాని స్థానంలో ఏర్పాటు చేయొచ్చని రాల్ఫ్ వివరించారు. ఇందుకు దాదాపు రెండేళ్ల సమయం పడుతుందని చెప్పారు. అలాగే ఈ ప్రక్రియకు దాదాపు 50వేల పౌండ్లు అవుతుందని తెలిపారు. మెకానిక్ అయిన డోనాల్డ్ కి ఎన్ హెచ్ ఎస్ నుంచి ఆ మొత్తం సమకూరింది.

దీంతో రాల్ఫ్ ఈ ప్రక్రియ ప్రారంభించారు. అతడి చర్మాన్ని కొంతమేర తీసుకుని చేతిలో కృత్రిమ అంగాన్ని రూపొందించారు. అది క్రమంగా బయటకు పెరిగేలా ఏర్పాటు చేశారు. దీంతో అది చేతి నుంచి బయటకు మొలిచింది. ఈ ప్రక్రియ పూర్తయిపోయిన తర్వాత 2018లో డోనాల్డ్ కి శస్త్రచికిత్స చేసి దానిని ఆ స్థానంలో అతికించాలి. అయితే, ఆ సమయంలో డోనాల్డ్ కి కాస్త అనారోగ్యం రావడంతో శస్త్రచికిత్స వాయిదా పడింది. అప్పటినుంచి ఏదో ఒక కారణంతో వాయిదా పడుతూ వస్తోంది. తాజాగా కరోనా కారణంగా ఆ శస్త్రచికిత్స ఇంకా పెండింగ్ లోనే ఉంది. ప్రస్తుతం డోనాల్డ్ చేతిలో మొలిచిన అంగంతోనే ఉన్నారు. అది బయటకు కనిపించకుండా ఉండేందుకు ఫుల్ హ్యాండ్ షర్ట్ వేసుకుంటారు. ఈ కరోనా కలకలం తగ్గిన తర్వాత కానీ తనకు శస్త్రచికిత్స జరిగే పరిస్థితి లేదని పేర్కొన్నారు. ఆ ప్రక్రియ పూర్తయిపోతే అతడి పేరు రికార్డుల్లోకి ఎక్కుతుంది.