కరోనా కేసులు దాచిపెడుతున్నారా?

ప్రపంచవ్యాప్తంగా కరోనా మహమ్మారి విజృంభిస్తోంది. మన దేశంలోనూ ఈ కేసుల సంఖ్యల క్రమంగా పెరుగుతోంది. తెలంగాణలో ఒక్కరోజే ఐదు కరోనా మరణాలు చోటుచేసుకోవడంతో రాష్ట్రంలో మృతుల సంఖ్య ఆరుకి చేరింది. ఇక ఏపీలోనూ ఒక్కరోజే 17 కేసులు నమోదు కావడంతో రాష్ట్రంలో కరోనా కేసులు 40కి చేరాయి.

ఏపీతో పోలిస్తే తెలంగాణలో కరోనా కేసుల విషయంలో స్పష్టత ఉండటంలేదు. మొదట్లో రోజుకు రెండు మూడు సార్లు వైద్య, ఆరోగ్య శాఖ బులెటిన్ విడుదల చేసేది. కానీ ప్రస్తుతం దానికి స్వస్తి పలికినట్టు కనపడుతోంది. తెలంగాణలో ఎన్ని పాజిటివ్ కేసులు ఎక్కడ నమోదయ్యాయి, వారి వివరాలేంటి అనే విషయాలు తెలుసుకోవడానికి మీడియా ప్రతినిధులు నానా పాట్లు పడుతున్నారు. సంబంధిత అధికారులు ఈ విషయాలను వెల్లడించడానికి ముందుకు రావడంలేదు. చివరకు సోమవారం రాత్రి రాష్ట్రంలో ఇప్పటివరకు ఆరు మరణాలు చోటుచేసుకున్నాయంటూ సీఎం కార్యాలయం నోట్ విడుదల చేసింది. దీంతో అప్పటివరకు రాష్ట్రంలో కరోనా మృతుల సంఖ్యపై ఎవరికీ ఎలాంటి సమాచారం లేదు.

కరోనా కేసులు, మరణాల విషయంలో ఎప్పటికప్పుడు సమాచారాన్ని విడుదల చేస్తే జనం భయాందోళనళలకు గురయ్యే అవకాశం ఉందనే భావనతోనే ఇలా తక్కువ చేసి చూపిస్తున్నారని అంటున్నారు. అయితే, ఇది సరికాదనే అభిప్రాయాలు వ్యక్తమవుతున్నాయి. కరోనాను ఎదుర్కొనేందుకు లాక్ డౌన్ ప్రకటించినా పలు ఉల్లంఘనలు చోటుచేసుకుంటున్నాయి. వీటిని అరికట్టాలంటే కరోనా మహమ్మారి ఎంతటి భయంకరమైనదో జనాలకు తెలియజేయాల్సిందేనంటున్నారు.

ఎప్పటికప్పుడు నమోదవుతున్న కేసులు, మరణాల లెక్కను కచ్చితంగా బయటపెడితే అప్పుడు అందరూ ఇళ్లకే పరిమితమయ్యే అవకాశం ఉంటుందని, తద్వారా లాక్ డౌన్ ప్రయోజనం నెరవేరుతుందని పేర్కొంటున్నారు. ముఖ్యంగా తెలంగాణ ప్రభుత్వం ఈ విషయంలో ఎప్పటికప్పుడు బులెటిన్ విడుదల చేయాలని సూచిస్తున్నారు. కరోనా కారణంగా గద్వాలలో ఈనెల 27న ఓ వ్యక్తి మరణిస్తే.. ఆ విషయాన్ని 30వ తేదీ రాత్రి ప్రకటించడాన్ని ఈ సందర్భంగా గుర్తు చేస్తున్నారు. ఏపీలో బులెటిన్లు తగిన వివరాలతో విడుదల చేస్తున్నారని, అదే తరహాలో తెలంగాణ అధికార యంత్రాంగం కూడా చర్యలు చేపట్టాలని పేర్కొంటున్నారు.