నవ మోసాల పాలన అంటూ లోకేశ్ ట్వీట్

సందు దొరికితే చాలు ట్విట్టర్లో చెలరేగిపోయే టీడీపీ జాతీయ ప్రధాన కార్యదర్శి నారా లోకేశ్ మరోసారి ఏపీ సీఎం జగన్ పై విరుచుకుపడ్డారు. ఆయన గద్దెనెక్కి తొమ్మిది నెలలు పూర్తవుతున్న సందర్భంగా.. తొమ్మిది రద్దులు, తొమ్మిది భారాలు, తొమ్మిది మోసాలు అంటూ లోకేశ్ ఓ భారీ జాబితానే విడుదల చేశారు.

అన్న క్యాంటీన్లు, రంజాన్, క్రిస్మస్, సంక్రాంతి కానుకలు, రైతురుణ మాఫీ, బీసీ కార్పొరేషన్ రుణాలు, కాపు రిజర్వేషన్లు, నిరుద్యోగ భృతి, చంద్రన్న బీమా, అమరావతి పనులు తదితరాలను రద్దు చేశారని విమర్శించారు.

ఇసుక, సిమెంటు, విద్యుత్, ఆర్టీసీ చార్జీల పెంపుతోపాటు పెట్రోల్ ఉత్పత్తులపై భారం, యూనివర్సిటీ ఫీజుల పెంపు, మద్యం రేట్ల పెంపును భారాల జాబితాలో పేర్కొన్నారు. ఆశ్చర్యకరంగా ఉల్లిగడ్డల పెంపు కూడా జగన్ ప్రభుత్వానికే ముడిపెట్టారు. పలు పథకాల కోతలను మోసాల జాబితాలో చేర్చారు.

అయితే, లోకేశ్ చేసిన ట్వీట్ కామెడీ అయిపోయింది. మీరు ఎన్నికల్లో ఇచ్చిన హామీలు నెరవేర్చలేదు కాబట్టే జనం మిమ్మిల్ని ఓడించి ప్రతిపక్షంలో కూర్చోబెట్టారంటూ నెటిజన్లు ఏకిపారేస్తున్నారు. నిజానికి చంద్రబాబు ఎన్నికల సమయంలో ఇచ్చిన చాలా హామీలను తన ఐదేళ్ల పాలనలో పూర్తిగా నెరవేర్చలేకపోయారు. రైతు రుణమాపీ దగ్గర నుంచి డ్వాక్రా మహిళల రుణాలు పూర్తిగా మాఫీ కాలేదు. నిరుద్యోగ భృతి పథకాన్ని ఎన్నికలకు ఏడాది ఉన్న సమయంలో అమలు చేశారు. అది కూడా అనేక పరిమితులు విధించి లబ్ధిదారుల సంఖ్యను భారీగా తగ్గించేశారు.

పసుపు కుంకుమ పేరుతో ఎన్నికలకు వారం రోజుల ముందు డబ్బులు వేశారు. ఇవన్నీ జనం గమనించారు కాబట్టే ఎన్నికల్లో దారుణంగా ఓడించారని వైసీపీ శ్రేణులు దుయ్యబడుతున్నాయి. జగన్ అధికారంలోకి వచ్చిన వెంటనే సంక్షేమ పథకాల అమలుపై దృష్టి పెట్టి ఒక్కో పథకం అమలు చేస్తున్న సంగతి మీకు కనిపించడంలేదా అని ప్రశ్నిస్తున్నాయి.

ఉల్లిపాయల పెంపునకు ప్రభుత్వానికి సంబంధం ఏమిటో చెప్పాలని నిలదీస్తున్నాయి. ఉల్లి కొరత కారణంగా దేశవ్యాప్తంగా వాటి ధర పెరిగిందని, ఆ సమయంలో సబ్సిడీపై ఉల్లి సరఫరాకు ప్రభుత్వం చర్యలు తీసుకున్న సంగతిని గుర్తు చేస్తున్నారు. మొత్తానికి లోకేశ్ ట్వీట్ వారికే ఎదురుతన్నిందనే అభిప్రాయాలు వ్యక్తమవుతున్నాయి.

నవ మోసాల పాలన#PrajaChaitanyaYatra#APDeservesBetter pic.twitter.com/MoyCTwHJo0

— Lokesh Nara (@naralokesh) February 18, 2020