శబరిమల రగడ: మహిళలకు ఎంట్రీ.. వుందా? లేదా?

శబరిమల వివాదం మళ్ళీ మొదటికొచ్చింది. ఆలయంలోకి మహిళల ప్రవేశం సబబేనా.? కాదా.? అన్నదానిపై సర్వోన్నత న్యాయస్థానంలో విచారణ కొనసాగుతున్న విషయం విదితమే. ఐదుగురు సభ్యుల ధర్మాసనం ఈ మేరకు తాజాగా తీర్పునిచ్చింది. అయితే, ఆ తీర్పులో ఈ విషయాన్ని ఏడుగురు సభ్యుల ధర్మాసనానికి బదిలీ చేయాలని వుండడమే విశేషం.

శబరిమల అయ్యప్ప దేవస్థానం మరో రెండు రోజుల్లోనే తెరుచుకోన్నున దరిమిలా, ఈ సమయంలో సుప్రీంకోర్టు తాజా తీర్పుతో కొంత గందరగోళం కన్పిస్తోంది. గతంలో సర్వోన్నత న్యాయస్థానం శబరిమలలోకి మహిళల్ని వయసుతో నిమిత్తం లేకుండా అనుమతించాలని తీర్పునిచ్చిన విషయం విదితమే.

ఆ తీర్పుని పునఃసమీక్షించాలంటూ పెద్దయెత్తున సుప్రీంకోర్టులో పిటిషన్లు దాఖలయ్యాయి. వాటిపై విచారణ జరిపిన ఐదుగురు సభ్యుల ధర్మాసనం, ఏడుగురు సభ్యుల ధర్మాసనానికి ఈ కేసు విచారణను బదిలీ చేసింది. ఈ క్రమంలో గతంలో ఇచ్చిన తీర్పుపై స్టే విధించాలన్న అభ్యర్థనను తిరస్కరించింది. అంటే, శబరిమల అయ్యప్పస్వామి ఆలయంలోకి మహిళలకు అనుమతి వున్నట్టే లెక్క.

గత ఏడాది, కొందరు మహిళలు అయ్యప్పస్వామిని శబరిమల ఆలయంలో దర్శించుకునేందుకు ప్రయత్నించడం, ఒకరిద్దరికి మాత్రమే దర్శనం లభించడం, ఆ తర్వాత ఆలయ సంప్రోక్షణ జరపడం తెల్సిన విషయాలే. కాగా, సుప్రీంకోర్టు తీర్పుని అడ్డంపెట్టుకుని, అన్యమనస్తులు ఆలయ పవిత్రతను దెబ్బతీసేందుకు ప్రయత్నించారంటూ ఆరోపణలు వెల్లువెత్తాయి.

ఈ మేరకు కొందరు అన్యమతస్తులైన మహిళల్ని శబరిమల పరిసరాల్లో అయ్యప్ప స్వామి భక్తులు అడ్డుకుని, పోలీసులకు అప్పగించారు కూడా. మరి, ఈసారి పరిస్థితులు ఎలా వుండబోతున్నాయో వేచి చూడాల్సిందే.