వడ్డించేవాడు మనవాడైతే.! వైసీపీ వాలంటీర్ల సాక్షిగా ఐదు కోట్ల దోపిడీ.!

‘వాలంటీర్ పోస్టులు ఎవరికి ఇచ్చుకున్నాం.? వైసీపీ కార్యకర్తలకే కదా.? వాళ్ళెవరైనా పార్టీకి వ్యతిరేకంగా పని చేస్తే, పీకి పారెయ్యండి..’ ఇది తాజాగా ఓ మంత్రిగారు సెలవిచ్చిన వైనం.

కొన్నాళ్ళ క్రితం, ‘వాలంటీర్ పోస్టులన్నీ మన పార్టీ కార్యకర్తలకే ఇచ్చుకున్నాం..’ అని వైసీపీకి చెందిన ఓ కీలక నేత ప్రకటించేసుకున్నారు. సదరు మంత్రిగారి పేరు అంబటి రాంబాబు అయితే.. సదరు కీలక నేతగారి పేరు విజయసాయిరెడ్డి.

సో, ఆంధ్రప్రదేశ్ రాష్ట్రంలో వాలంటీర్లంతా వైసీపీ కార్యకర్తలేనని స్పష్టమయిపోయిందన్నమాట. ఆ వాలంటీర్లకు గౌరవ వేతనం అందుతోంది. అంటే, వైసీపీ అధికారంలోకి వచ్చిన దరిమిలా, వైసీపీ కార్యకర్తలకు ‘వాలంటీర్లు’ అనే ముసుగు వేసి, ప్రజా ధనాన్ని నెలనెలా దోచిపెడుతున్నట్టే కదా.?

ఇది చాలదన్నట్టు, వాలంటీర్లకు ప్రతి నెలా న్యూస్ పేపర్ ఖర్చు కింద రెండు వందల రూపాయలు చెల్లించే దిశగా ఆదేశాలు జారీ అయ్యాయి. రెండున్నర లక్షల మందికి పైగా వాలంటీర్లున్నారు. వాళ్ళందరికీ ‘ప్రముఖ దినపత్రిక’ కొనుక్కునేందుకు ఈ రెండొందల రూపాయలు ఇస్తారట.

వైసీపీ దృష్టిలో, వైసీపీ ప్రభుత్వ దృష్టిలో ప్రముఖ పత్రిక అంటే అది సాక్షి మాత్రమే. సాక్షి పత్రిక కొనుక్కోవడానికి ఇస్తోన్న ఆ సొమ్ములు మళ్ళీ ప్రభుత్వ ఖజానా నుంచే వెళతాయి. వైసీపీ కార్యకర్తలే వాలంటీర్లయినప్పుడు వాళ్ళకి జీతాలెందుకు.? వైసీపీ కార్యకర్తలే అయినప్పుడు, వాళ్ళకి సాక్షి పత్రిక కొనుక్కునేందుకు డబ్బులెందుకు.?

పైగా, ఇదంతా వైసీపీ పార్టీ సొమ్ములతో చేస్తున్నదైతే ఎవరికీ ఎలాంటి ఇబ్బందీ లేదు. కానీ, ప్రజాధనాన్ని వైసీపీ కార్యకర్తలకు దోచి పెడుతున్నారు. వాలంటీర్లకు సాక్షి పత్రిక నెల నెలా ఇవ్వడమంటే.. సాక్షి పత్రిక సర్క్యులేషన్, ప్రభుత్వ ఖర్చుతో పెంచుతున్నారనే కదా అర్థం.?

వడ్డించేవాడు మనవాడైతే.. అన్న సామెత ఇక్కడ సరిగ్గా సూటవుతుంది. టీడీపీ హయాంలో టీడీపీ అనుకూల మీడియా లాభపడింది గనుక, వైసీపీ హయాంలో వైసీపీ అనుకూల మీడియా బాగుపడొద్దూ.? ఇంతకీ, ప్రజలెప్పుడు బాగుపడతారు.? ఆ ఒక్కటీ అడక్కూడదు.! ఎందుకంటే, ఓటర్లను కొనేసి కదా, అధికారంలోకి వచ్చేది ఎవరైనాగానీ.?