ముదిరి పాకాన పడ్తున్న వైఎస్సార్సీపీ ‘రంగుల పిచ్చి’.!

రాచరికం నాటి పరిస్థితుల్ని గుర్తు చేస్తూ గ్రామ వాలంటీర్లు వైఎస్‌ జగన్‌ మోహన్‌రెడ్డి ఫొటో ముందు మోకరిల్లాలట. ఉత్తరాంధ్రలో ఓ వైసీపీ నేత అరాచకం ఇది. గ్రామ వాలంటీర్లు మోకరిల్లలేదుగానీ, ఆ స్థాయిలో వైఎస్‌ జగన్‌ ఫొటోకి వంగి వంగి దండాలు పెట్టారు. ‘పిచ్చి ముదిరిపోవడం’ అంటే ఇదే మరి.! తాము ప్రజాస్వామ్యంలో వున్నామనే విషయాన్ని మరచి, రాచరిక వ్యవస్థ తాలూకు పైత్యాన్ని వైసీపీ నేతలు వంటబట్టించుకున్నారనడానికి ఇంతకన్నా నిదర్శనం ఇంకేం కావాలి.? ఇక, వైఎస్సార్సీపీ ‘రంగుల పిచ్చి’ గురించి ఎంత చెప్పుకున్నా తక్కువే.

దేవాలయాలకీ వైసీపీ రంగులేసే ప్రయత్నం చేశారు కొందరు దుర్మార్గులు. స్మశానాలు, టాయ్‌లెట్ల సంగతి సరే సరి. ప్రభుత్వ కార్యాలయాలకొచ్చేసరికి న్యాయస్థానం మొట్టికాయలు తప్పలేదు. పోనీ, న్యాయస్థానం మొట్టికాయలేశాక అయినా వైఎస్‌ జగన్‌ ప్రభుత్వానికి ‘రంగుల పైత్యం’ తగ్గిందా.? అంటే అదీ లేదు. ఆ వైసీపీ రంగులకు వక్రభాష్యం చెబుతూ, అదనంగా ఇంకో రంగుని ‘యాడ్‌’ చేశారు. అసలంటూ పార్టీ రంగుల్ని గుర్తుకు తెచ్చేలా ఎలాంటి రంగుల్నీ ప్రభుత్వ కార్యాలయాలకు వేయొద్దన్నది హైకోర్టు ఆదేశం. న్యాయస్థానం ఇచ్చిన ఆదేశాల్ని ప్రభుత్వం బేఖాతరు చేయడాన్ని ఎలా అర్థం చేసుకోవాలి.? న్యాయస్థానాల్ని ప్రభుత్వాలు లెక్క చేయకపోతే, ప్రభుత్వాల్ని ప్రజలు లెక్క చేయని రోజులు వచ్చి తీరతాయ్‌. ఆ తర్వాత జరిగే అనర్ధాలకి వైఎస్‌ జగన్‌ ప్రభుత్వమే బాధ్యత వహించాలి.

దేశంలో చాలా రాజకీయ పార్టీలున్నాయి. వాటిల్లో కొన్నిటికి రంగుల పిచ్చి వున్న మాట వాస్తవం. కానీ, మరీ ఇంతలానా.? ఆంధ్రప్రదేశ్‌లో అధికార పార్టీకి వున్నంత రంగుల పిచ్చి బహుశా ఇంకెక్కడా వుండదేమో. అధికారంలోకి వచ్చి ఏడాది కాకుండానే 50 సార్లకు పైగా న్యాయస్థానాలతో మొట్టికాయలేయించుకున్న ఘనత కూడా వైఎస్‌ జగన్‌ ప్రభుత్వానికే దక్కుతుందేమో. వైసీపీ రంగుల పిచ్చిపై కేంద్రం జోక్యం చేసుకోవాలేమో.! లేదంటే, రాష్ట్రంలో ఇంకే ఇతర రంగులూ లేకుండా ప్రభుత్వ, ప్రైవేటు భవనాలన్నిటికీ వైసీపీ రంగులు వేయించేసినా ఆశ్చర్యపోవాల్సిన పనిలేదు.

ప్రభుత్వ కార్యాలయాలకు మాత్రమే ఎందుకు.? ముఖ్యమంత్రి ప్రయాణిస్తున్న కార్లకీ వైసీపీ రంగులు వేయించేస్తే పోలా.? ఏమో, ఆ దిశగా కూడా సన్నాహాలు జరిగినా వింతేముంది.? ఈ రంగుల పైత్యం అక్కడితో అయినా ఆగుతుందా.!