కరోనా ప్రపంచ మహమ్మారి.. వైఎస్‌ జగన్‌కి అర్థమవుతోందా.?

కరోనా వైరస్‌ కరాళ నృత్యం చేస్తోంది. ప్రపంచం చిగురుటాకులా వణికిపోతోంది ఈ వైరస్‌ దెబ్బకి. ‘సార్స్‌ వైరస్‌ కంటే ప్రమాదకరమేమీ కాదు..’ అని కొందరు మేధావులు చెబుతున్నా, ‘పారాసిటమాల్‌, బ్లీచింగ్‌ పౌడర్‌తో కరోనా తరిమేయొచ్చని’ కొందరు స్వయం ప్రకటిత మేధావులు కథలు చెబుతున్నా, వాస్తవ పరిస్థితి చాలా భయానకంగా వుంది. చైనాలో తొలుత వెలుగు చూసిన ఈ వైరస్‌, అక్కడ పెను ఉత్పాతమే సృష్టించింది.

ప్రస్తుతం ప్రపంచమంతా విస్తరించింది. దాదాపు అన్ని దేశాలూ ఈ వైరస్‌ బారిన పడ్డాయి. చాలా దేశాల ఆర్థిక వ్యవస్థలు కుప్ప కూలిపోయాయి. పలు దేశాలు తమ సరిహద్దుల్ని మూసేశాయి. వాటికన్‌ సిటీ లాంటి పవిత్ర పుణ్యక్షేత్రానికీ కరోనా వైరస్‌ సెగ తగిలింది. కేంద్రం, ఇప్పటికే రాష్ట్రాలకి మార్గదర్శకాలు జారీ చేసింది. చాలా రాష్ట్రాల్లో సినిమా ది¸యేటర్లు మూతపడ్డాయి. 50 మంది కంటే ఎక్కువగా ఎక్కడా గుమికూడవద్దన్న హెచ్చరికలూ కన్పిస్తున్నాయి. అత్యవసర పనులుంటే తప్ప, బయటకు రావొద్దంటూ హెచ్చరికలు జారీ అవుతున్న పరిస్థితినీ చూస్తున్నాం. అయినాగానీ, రాష్ట్రంలో స్థానిక ఎన్నికలు జరగాల్సిందేనని వైఎస్‌ జగన్‌ ప్రభుత్వం అంటోంది.

చిత్రమేంటంటే, ఈ విషయమై సుప్రీంకోర్టుని రాష్ట్ర ప్రభుత్వం ఆశ్రయిస్తే, ఆ సుప్రీం కోర్టు కూడా కరోనా వైరస్‌ తీవ్రత కారణంగా ఈ రోజు ఎలాంటి కేసుల విచారణా చేపట్టడంలేదు. పైగా, సర్వోన్నత న్యాయస్థానం, కొన్ని రోజులపాటు అత్యవసర కేసులు మినహా, ఇతర కేసుల విచారణ కుదరదని తేల్చేసింది. వివిధ హైకోర్టుల పరిస్థితీ ఇదే. ‘ఆంధ్రప్రదేశ్‌లో కరోనా వైరస్‌ ప్రభావం పెద్దగా లేదు..’ అన్న మాట వినడానికి బాగానే వున్నా, వాస్తవిక కోణంలో అది హాస్యాస్పదమైన బుకాయింపే అవుతుంది.

ఎందుకంటే, పొరుగు రాష్ట్రం తెలంగాణలో నాలుగు కరోనా పాజిటివ్‌ కేసులు నమోదయ్యాయి. కర్నాటకలో ఈ సంఖ్య 10. తమిళనాడులోనూ కేసులు పెరుగుతున్నాయి. పరిస్థిత ఇంత తీవ్రంగా వుంటే, బాధ్యతగల అధికార పక్షం.. బాధ్యతారాహిత్యంగా వ్యవహరించడమేంటి.? ముఖ్యమంత్రి వ్యవహరిస్తున్న తీరు, ముందు ముందు అధికార పార్టీకి రాజకీయంగా పెను ముప్పుని తీసుకొచ్చేలా వుంది. ప్రభుత్వంపై ప్రజల్లో వ్యతిరేకత పెరిగిపోతోంది. పొరుగు రాష్ట్రాలు కరోనా వైరస్‌పై తీవ్రమైన చర్యలు తీసుకుంటోంటే, తమ ప్రభుత్వాధినేత ‘తేలిక’ వ్యాఖ్యలు చేయడాన్ని రాష్ట్ర ప్రజలు జీర్ణించుకోలేకపోతున్నారు.