‘రెడ్డి’గారి ‘కులం’ కుంపటి: రెడ్లకే నచ్చట్లేదా.?

రాజకీయ విమర్శలు ఎప్పుడో హద్దులు దాటేశాయి. అయితే, కీలకమైన పదవుల్లో వున్న వ్యక్తులు మాత్రం, ఆచి తూచి వ్యవహరిస్తుంటారు. తాము చెప్పదలచుకున్నది, తమ పార్టీ నేతలతో చెప్పించడం అనేది అధికారంలో వున్నవారికి వెన్నతో పెట్టిన విద్య. కానీ, ఇప్పుడు ట్రెండ్‌ మారింది.

సాక్షాత్తూ ముఖ్యమంత్రి వైఎస్‌ జగన్‌ మోహన్‌రెడ్డి, సాక్షాత్తూ రాష్ట్ర ఎన్నికల ప్రధాన అధికారి నిమ్మగడ్డ రమేష్‌కుమార్‌పై ‘కులం’ పేరుతో వివాదాస్పద వ్యాఖ్యలు చేశారు. దాంతో, తెలుగు నాట మాత్రమే కాదు, దేశవ్యాప్తంగా ఈ అంశం చర్చనీయాంశమవుతోంది. వైఎస్‌ జగన్‌ స్వయంగా కుల రాజకీయాల్ని తెరపైకి తెచ్చినప్పుడు, వైసీపీలో ఇతర నేతలు ఆగుతారా.? మంత్రులు, ఎమ్మెల్యేలు, ఇతర ముఖ్య నేతలే కాదు, స్పీకర్‌ తమ్మినేని సీతారాం కూడా హద్దులు దాటేశారు. అయితే, ఈ మొత్తం వ్యవహారంపై అధికార పార్టీ తీవ్రాతి తీవ్రమైన విమర్శలు ఎదుర్కోవాల్సి వస్తోంది.

‘రెడ్డి’ సామాజిక వర్గం సైతం, వైఎస్‌ జగన్‌ తెరపైకి తెచ్చిన ‘కుల పంచాయితీ’ని తప్పుపడుతోంది. ‘కమ్మ’ సామాజిక వర్గాన్ని వైఎస్‌ జగన్‌ టార్గెట్‌ చేసిన మాట వాస్తవం. ఇది ఆయన మాటల్లోనే స్పష్టమయ్యింది. వైసీపీలో కమ్మ నేతలు, ముఖ్యమంత్రి వైఎస్‌ జగన్‌పై అసహనం వ్యక్తం చేయడం సహజమే. అయితే, వారంతా లోలోపల గింజుకోవాల్సి వస్తోంది. మరోపక్క, రెడ్డి సామాజిక వర్గ ప్రముఖులు, వైఎస్‌ జగన్‌ తీరుని తీవ్రంగా ఖండిస్తున్నారు. ‘ఇలాగైతే, భవిష్యత్‌ రాజకీయాలు మరింత ప్రమాదకరంగా మారతాయి..’ అని రెడ్డి సామాజిక వర్గానికి చెందిన ఓ ప్రముఖ పొలిటీషియన్‌ అభిప్రాయపడ్డారు.

‘ఇప్పుడు కమ్మ సామాజిక వర్గాన్ని టార్గెట్‌ చేశారు.. రేప్పొద్దున్న కాపు సామాజిక వర్గంపై విరుచుకుపడ్తారు..’ అంటూ కాపు సామాజిక వర్గంలోనూ అలజడి షురూ అయ్యింది. ఈ వ్యవహారంపై ఇప్పటికే, రెడ్డి సామాజిక వర్గానికి చెందిన వైసీపీ పెద్దలు, ముఖ్యమంత్రికి నచ్చజెప్పే ప్రయత్నం చేస్తున్నారట. ‘కుల ప్రస్తావన తీసుకు రాకుండా వుంటే బావుండేది..’ అంటూ ఆఫ్‌ ది రికార్డ్‌గా వైసీపీ నేతలు కొందరు, మీడియా వద్ద తమ అభిప్రాయాల్ని స్పష్టం చేస్తున్నట్లు తెలుస్తోంది.