జగన్‌ ‘రెడ్డీ’.. వీళ్ళని ‘కులం’ పేరుతో ప్రశ్నించగలవా.?

ఆంధ్రప్రదేశ్‌లో రాజకీయాలు కులం చుట్టూనే తిరుగుతున్నాయి. ఎవరు ఔనన్నా ఎవరు కాదన్నా ఇది నిజం. అంత మాత్రాన కులం పేరుతో ఓ అధికారిపై ఆరోపణలు చేయడమా.? తెలుగుదేశం పార్టీ అధినేత నారా చంద్రబాబునాయుడు ‘కమ్మ’ సామాజిక వర్గానికి చెందినంతమాత్రాన, ఆ సామాజిక వర్గమంతా ఆయన వెంట నడుస్తోందనే భ్రమల్లో వైఎస్‌ జగన్‌ మోహన్‌రెడ్డి వుండడం హాస్యాస్పదమే.

వైసీపీకి చెందిన కొడాలి నానిది ఏ కులం.? వైసీపీ పంచన చేరేందుకు టీడీపీని వీడిన వల్లభేని వంశీది ఏ కులం.? ఓ సీనియర్‌ అధికారి విషయంలో వైఎస్‌ జగన్‌ మాట తూలారు. ఇందులో ఇంకో మాటకు తావు లేదు. సాక్షాత్తూ ఓ ముఖ్యమంత్రి ‘కులం’ పేరుతో ఓ ఐఏఎస్‌ అధికారిని అవమానించడం చారిత్రక తప్పిదం. ఇక, స్థానిక సంస్థల ఎన్నికల వాయిదా విషయానికొస్తే, తెరవెనుకాల చాలా పెద్ద కథ నడిచింది.

బీజేపీ ఎంపీలు (రాజ్యసభ సభ్యులు) జీవీఎల్‌ నరసింహారావు, టీజీ వెంకటేష్‌, సీఎం రమేష్‌.. కేంద్ర హోంశాఖ మంత్రికి, రాష్ట్రంలోని పరిస్థితుల్ని వివరిస్తూ, స్థానిక సంస్థల ఎన్నికల రద్దు దిశగా చర్యలు తీసుకోవాలని రాసిన లేఖ ఒకటి వెలుగు చూసింది. ఆ లేఖని ఆధారంగా చేసుకుని, కేంద్రం రాష్ట్రానికి తగిన సూచనలు చేసిందా.? అన్నది వేరే చర్చ.

ఇప్పుడు లేఖ బయటకు వచ్చింది కాబట్టి, జీవీఎల్‌ నరసింహారావుని కులం పేరుతో దూషించగలరా.? మొన్నీమధ్యనే వైఎస్‌ జగన్‌ని కలిసి అభినందించిన టీజీ వెంకటేష్‌ని కులం పేరుతో దూషించేంతటి సాహసం వైఎస్‌ జగన్‌ చేస్తారా.? సాక్షాత్తూ ముఖ్యమంత్రే, రాష్ట్రంలో కులాల కుంపటిని రాజేస్తే.. ఇక రాష్ట్రానికి దిక్కెవరు.?

ఎన్నికల కమిషనర్‌ తీసుకున్న నిర్ణయాన్ని ఓ రాజకీయ పార్టీ అధినేతగా ప్రశ్నించే హక్కు వైఎస్‌ జగన్‌ మోహన్‌రెడ్డికి వుంది. అదే సమయంలో, ప్రభుత్వం తరఫున.. తమ ఆలోచనల్ని స్పష్టంగా చెప్పడంతోపాటు, అవసరమైతే కోర్టుని కూడా ఆశ్రయించవచ్చు ముఖ్యమంత్రి వైఎస్‌ జగన్‌. వాటన్నిటికంటే ముందు ‘కులం ముద్ర’ వేయడంలో జగన్‌ ఉద్దేశ్యం ఏమిటి.? ఇదే ఇప్పుడు దేశవ్యాప్తంగా జరుగుతోన్న చర్చ.