సర్కారువారి ‘బుకింగ్’: ప్రైవేటు స్కూళ్ళు, ఆసుపత్రులు కూడానా.?

సినిమా టిక్కెట్ల కోసం ఆంధ్రప్రదేశ్‌లోని వైఎస్ జగన్ ప్రభుత్వం ఓ ప్రత్యేక వెబ్ సైట్ రూపొందించనున్న సంగతి తెలిసిందే. ఈ వెబ్ సైట్ ద్వారా మాత్రమే సినిమా టిక్కెట్లను ప్రేక్షకులు బుక్ చేసుకోవాల్సి వుంటుందట.. వెబ్ సైట్ అందుబాటులోకి వస్తే. సినిమా అనేది ప్రైవేటు వ్యవహారం.. వ్యాపారం. ప్రభుత్వానికి సినీ పరిశ్రమ నుంచి పన్నులు వచ్చిపడుతుంటాయి. కానీ, పన్ను ఎగ్గొట్టేందుకు థియేటర్ల యాజమాన్యాలు, డిస్ట్రిబ్యూటర్లు, నిర్మాతలు కుమ్మక్కవుతున్నారన్న ఆరోపణ ఈనాటిది కాదు.

సినిమా థియేటర్ల సంగతి పక్కన పెడదాం, ప్రైవేటు విద్యా సంస్థల మాటేమిటి.? ప్రైవేటు ఆసుపత్రుల మాటేమిటి.? చిన్నపాటి జ్వరానికే కొన్ని ప్రైవేటు ఆసుపత్రులు లక్షల్లో వసూలు చేస్తున్నాయి. ప్రైవేటు విద్యా సంస్థల సంగతి సరే సరి.. ఎల్కేజీకి కూడా లక్షల్లో ఫీజులు వసూలు చేస్తున్న సందర్భాల్ని చూస్తున్నాం. సినిమా అనేది అత్యవసరం కాని విషయం. అదో వినోదం. విద్య, వైద్యం అలా కాదు. విద్యా రంగంలో, వైద్య రంగంలో ఫీజుల్ని నియంత్రించగలిగితే.. సమాజానికి ఎంతో మేలు చేసినట్లవుతుంది.

అలా నియంత్రించేందుకు ప్రభుత్వమే ఓ వెబ్‌సైట్ పెట్టేసి, అక్కడే రోగులు రిజిస్టర్ చేసుకుని.. ఆయా ఆసుపత్రుల్లో చేరి వైద్య చికిత్స పొందితే.? విద్యార్థులు ఆయా విద్యా సంస్థల్లో చేరేందుకు ప్రభుత్వ వెబ్ సైట్ ద్వారా ఫీజులు చెల్లిస్తే.. నిజంగానే, అదొక అద్భుతం అవుతుంది. ఇంతకీ, ఇసుక వ్యవహారమేంటి.? ప్రభుత్వం తీసుకొచ్చిన కొత్త ఇసుక విధానంలో ఎన్నెన్నో మార్పులు జరుగుతున్నాయి. కానీ, సామాన్యుడికి సరైన ధరికి నాణ్యమైన ఇసుక మాత్రం లభించడంలేదు. నల్ల బజారులో ఇసుక ధర, అసలు ధరకంటే పదింతలు ఎక్కువగా వుంటోంది.

అతి భవన నిర్మాణాలకు సంబంధించి అత్యవసరమైనది. ఖచ్చితంగా చేయాల్సిన పనుల్లో నిర్లక్ష్యం, అసమర్థత.. అత్యవసరం కాని విషయాల్లో అత్యుత్సాహం.. అసలేం జరుగుతోంది ఆంధ్రప్రదేశ్ రాష్ట్రంలో.? ఇక, ఏపీ ప్రభుత్వం తెరపైకి తీసుకురాన్న బుకింగ్ వెబ్‌సైట్ విషయమై సినీ పరిశ్రమలో ఆసక్తికరమైన చర్చ జరుగుతోంది. ఓ దర్శకుడు, ప్రభుత్వ నిర్ణయాన్ని సోషల్ మీడియా వేదికగా ఇప్పటికే ప్రశ్నించాడు. అతనెవరో కాదు, దేవ్ కట్టా. ‘రిపబ్లిక్’ సినిమాని తెరకెక్కిస్తున్నాడాయన. అన్నట్టు, ‘టక్ జగదీష్’ సినిమా ఆంధ్రప్రదేశ్ ప్రభుత్వం తీరుని భరించలేక, ఓటీటీ డైరెక్ట్ రిలీజ్ అవుతున్న విషయం విదితమే.