నారా లోకేష్ హీరోయిజం.. ‘ఎలివేషన్స్’ చేస్తున్నదెవరు.?

టీడీపీ జాతీయ ప్రధాన కార్యదర్శి, మాజీ మంత్రి, ఎమ్మెల్సీ నారా లోకేష్.. ప్రజా సమస్యలపై తనదైన స్టయిల్లో గళం విప్పుతున్నారు. ప్రజల తరఫున నిలబడేందుకు ప్రయత్నిస్తున్నారు. ప్రభుత్వాన్ని నిలదీసేందుకు ఏ అవకాశాన్నీ వదులుకోవడంలేదాయన. సరే, లోకేష్ మాటల్ని జనం విశ్వసిస్తారా.? టీడీపీకి ఆయన వల్ల లాభమెంత.? అన్నది వేరే చర్చ.

నారా లోకేష్ ఎక్కడికి వెళ్ళినా టీడీపీ కార్యకర్తలు హంగామా చేయడంలో వింతేమీ లేదు. కానీ, చిత్రంగా నారా లోకేష్‌కి ఎలివేషన్ ఇచ్చేందుకోసం అధికార వైసీపీ నానా పాట్లూ పడుతోంది. కొద్ది రోజుల క్రితం.. అదీ స్వాంత్ర్య దినోత్సవం రోజున, గుంటూరులో ఓ యువతి దారుణ హత్యకు గురైంది. బాధిత కుటుంబాన్ని పరామర్శించేందుకు నారా లోకేష్ వెళ్ళారు. అంతే, అక్కడికి ‘బులుగు మూకలు’ దూసుకొచ్చేశాయి. ఇంకేముంది.? పచ్చ దండుకీ, బులుగు మూకకీ మధ్య నానా యాగీ చోటు చేసుకుంది.

బులుగు మూకలు అక్కడికెందుకు వెళ్ళాయి.? అన్నదానిపై ఆరా తీయాల్సిన పోలీసు యంత్రాంగం, నారా లోకేష్‌ని అరెస్టు చేసి.. ఎక్కడెక్కడో తిప్పి.. హైడ్రామా క్రియేట్ చేయడం అప్పట్లో వివాదాస్పదమయ్యింది. పోలీసులు శాంతిభద్రతలు కాపాడేందుకోసం పనిచేస్తారు. లోకేష్ రాకతో, యాగీ జరుగుతుంది గనుక, ఆయన్ని అదుపులోకి తీసుకున్నారనే అనుకుందాం. మరి, వైసీపీ మూకల్ని ఎందుకు పోలీసులు అదుపులోకి తీసుకోలేదన్న ప్రశ్న తెరపైకొస్తుంది.

ఆ హౌస్ అరెస్టులేవో వైసీపీ మూకల విషయంలో ప్రయోగించి వుంటే, అసలు సమస్యే వచ్చేది కాదు. ఇప్పుడు తాజాగా ఇంకోసారి గుం‘టూరు’ వెళుతున్నారు. గుంటూరు జిల్లా నరసరావు పేట పర్యటనకు లోకేష్ వస్తున్నారన్న సమాచారంతో పోలీసులు ముందస్తుగానే అల్టిమేటం జారీ చేశారు. కోవిడ్ నిబంధనల నేపథ్యంలో లోకేష్ పర్యటనకు అనుమతి లేదని హెచ్చరించేశారు పోలీసు అధికారులు. ఓ రాజకీయ నాయకుడు, పైగా ప్రతిపక్షానికి చెందిన నాయకుడు, ఓ ప్రజా ప్రతినిథి.. పోలీసుల అనుమతి తీసుకుని, ప్రజల వద్దకు వెళతారా.? రాష్ట్రంలో ప్రజా ప్రతినిథులంతా అలానే చేస్తున్నారా.?

లోకేష్ విషయంలో ప్రభుత్వ పెద్దలు చూపుతున్న అత్యుత్సాహమే ఆయనకి డబుల్ ఎలివేషన్ దక్కేలా చేస్తోంది రాజకీయంగా. చూస్తోంటే, ఇదంతా లోకేష్ మీద రాజకీయ కక్ష కాదు, లోకేష్ మీద అమితమైన ప్రేమ.. అని అనుకోవాలేమో.! ప్రభుత్వం ఇంతలా లోకేష్ విషయంలో కఠినంగా వ్యవహరించి వుండకపోతే.. లోకేష్ గురించి అంతలా జనంకూడా పట్టించుకునే పరిస్థితి వుండకపోవచ్చు.