విశ్వక్ సేన్ ‘హిట్’ మూవీ రివ్యూ 

నటీనటులు: విశ్వక్ సేన్, రుహాని శర్మ..
నిర్మాత: ప్రశాంతి త్రిపురనేని
దర్శకత్వం: శైలేష్ కొలను
సినిమాటోగ్రఫీ: మణి కందన్
మ్యూజిక్: వివేక్ సాగర్
ఎడిటర్‌: గ్యారీ బిహెచ్
రన్ టైం: 2 గంటల 06 నిముషాలు
విడుదల తేదీ: ఫిబ్రవరి 28, 2020

నాచురల్ స్టార్ నాని నిర్మాతగా మారి చేసిన మొదటి సినిమా ‘అ!’ విమర్శకుల ప్రశంశలు అందుకుంది. మరోసారి నాని స‌మ‌ర్ప‌ణ‌లో వాల్ పోస్ట‌ర్ సినిమా బ్యాన‌ర్‌పై `ఫ‌ల‌క్‌నుమా దాస్` వంటి స‌క్సెస్‌ఫుల్ మూవీతో హీరోగా త‌న‌కంటూ గుర్తింపు తెచ్చుకున్న విశ్వ‌క్ సేన్ హీరోగా నటించిన క్రైమ్ థ్రిల్లర్ `హిట్‌`. `ది ఫ‌స్ట్ కేస్‌` ట్యాగ్ లైన్‌. నూతన దర్శకుడు శైలేష్ కొల‌ను ద‌ర్శ‌క‌త్వంలో ప్ర‌శాంతి త్రిపిర్‌నేని ఈ చిత్రాన్ని నిమించారు. ఒకసారి థియేటర్ లోకి వస్తే మధ్యలో వెళ్లలేరని విశ్వక్ సేన్ ప్రమోషన్స్ లో చెప్పాడు. మరి ఆ స్టేట్మెంట్ నిజం చేసేలా ఈ హిట్ మూవీ ఉందా లేదా అనేది ఇప్పుడు చూద్దాం..

కథ:

విక్రమ్ రుద్రరాజు(విశ్వక్ సేన్) ఒక సక్సెసఫుల్ ఇన్వెస్టిగేటివ్ ఆఫీసర్. కానీ కొద్దీ రోజులుగా తన గతం వలన మెంటల్ స్ట్రోక్స్ కి లోనవుతూ ఉంటాడు. అదే టైంలో ప్రీతీ మిస్సింగ్ కేసు వస్తుంది. ఆ కేసు డీల్ చేసే ఆఫీసర్ సరిగా లేకపోవడం, అలాగే తనతోటి ఫోరెన్సిక్ డిపార్ట్ మెంట్ ఆఫీసర్ నేహా(రుహాని శర్మ) కూడా మిస్ అవ్వడం వలన అందరికీ విక్రమ్ మీద అనుమానాలు మొదలవుతాయి. దాంతో విక్రమ్ స్వయంగా ప్రీతీ, నేహాల కేస్ ఇన్వెస్టిగేషన్ చేయడం మొదలు పెడతాడు. ఇక అక్కడి నుంచి ఆ కేసు సాల్వ్ చేయడంలో విక్రమ్ ఎదుర్కున్న సవాళ్లేంటి.? విక్రమ్ ఎలా ఆ కేసుని సాల్వ్ చేసాడు? ప్రీతి – నేహా ల మిస్సింగ్ వెనుక ఉన్న కథేంటి? అసలు విక్రమ్ ని ఎందుకు సస్పెక్ట్ చేశారు అనే ప్రశ్నల సమాధానమే ఈ హిట్ సినిమా..

తెర మీద స్టార్స్..   

ఒక్క విక్రమ్ రుద్రరాజు అలియాస్ విశ్వక్ సేన్ తప్ప మిగతా అందరూ తెర మీద మనకు కనిపించే టైం తక్కువే.. విశ్వక్ సేన్ మైండ్ బ్లోయింగ్ నటనతో ప్రేక్షకులతో ఏం చేసిండు మామా.. మస్త్ చేసాడు అని అనుకోకుండా ఉండరు. మెంటల్లీ డిస్టర్బ్ అయిన షేడ్స్ చూపిస్తూనే ఇన్వెస్టిగేటివ్ ఆఫీసర్ గా తను చేసిన పెర్ఫార్మన్స్ సింప్లీ సూపర్బ్. విశ్వక్ సేన్ లోని టాలెంట్ ని మరో కోణంలో ప్రూవ్ చేసుకునే సినిమా హిట్ అని చెప్పచ్చు. ‘చిలసౌ’ ఫేమ్ రుహాని శర్మ ఉన్నంతలో తన పాత్రకి పూర్తి న్యాయం చేసింది. విశ్వక్ సేన్ – రుహాని శర్మల లవ్ ట్రాక్ చాలా బాగుంది. ఈ సీరియస్ థ్రిల్లర్ లో వీరిద్దరి లవ్ ట్రాక్ ద్వారా ఆడియన్స్ కి కొన్ని నవ్వులు పంచారు. భాను చందర్, మురళి శర్మ, హరితేజ తదితర నటీనటులు వారి వారి పాత్రలకి పూర్తి న్యాయం చేశారు.

తెర వెనుక టాలెంట్..   

బడ్జెట్ పరంగా చిన్న సినిమానే కావచ్చు కానీ టెక్నికల్ స్టాండర్డ్స్ పరంగా తెర వెనుక టీం వెరీ హై బడ్జెట్ ఫిల్మ్ రేంజ్ కి తీసుకెళ్లారు. మణి కందన్ విజువల్స్ ఒక డార్క్ క్రైమ్ థ్రిల్లర్ కి పర్ఫెక్ట్ గా మ్యాచ్ అయ్యేలా ఉంది. ఇలాంటి విజువల్స్ మన సినిమాల్లో చాలా రేర్ గా చూస్తుంటాం కానీ ఈ జానర్ ఫిల్మ్ కి పర్ఫెక్ట్ విజువల్స్ ఇచ్చాడు. ఆ విజువల్స్ ని నెక్స్ట్ లెవల్ కి తీసుకెళ్లింది మాత్రం వివేక్ సాగర్ మ్యూజిక్. క్రైమ్ థ్రిల్లర్ అంటే ఆధ్యంతం ఉత్కంఠ రేకెత్తించే ఫీల్ ని కలుగ చేయాలి. ఆ విషయంలో వివేక్ సాగర్ 200% సక్సెస్ అయ్యాడు. అలాగే గ్యారీ ఎడిటింగ్ కూడా టాప్ లెవల్ అని చెప్పాలి. ఎడిట్ కట్ ఈ సినిమాని ఆడియన్స్ కి మరింత ఎంగేజ్ అయ్యేలా చేసింది.

ఇక కెప్టెన్ అఫ్ ది షిప్ శైలేష్ కొలను విషయానికి వస్తే.. పర్ఫెక్ట్ క్రైమ్ థ్రిల్లర్ తీయాలంటే కథ కంటే కట్టిపడేసే స్క్రీన్ ప్లే చాలా ముఖ్యం. ఆ విషయంలో ది బెస్ట్ అనిపించుకున్నాడు అనడంలో ఎలాంటి అతిశయోక్తి లేదు. అలాగే డైరెక్టర్ గా కూడా అన్ని డిపార్ట్ మెంట్స్ నుంచి బెస్ట్ తీసుకోవడంలో, ఆర్టిస్టుల నుండి బెటర్ పెర్ఫార్మన్స్ తీసుకోవడంలో, ఆడియన్స్ కి కొత్త డైరెక్టర్ అయినా చాలా బాగా తీసాడు అనే పేరు తెచ్చుకునే స్థాయిలో డైరెక్ట్ చేసాడు. ఇక కథ పరంగా సింపుల్ పాయింట్, కథలో థ్రిల్స్ ని బాగానే పెట్టుకున్నాడు కానీ ఎమోషనల్ కనెక్ట్ విషయంలో కొంత ఫెయిల్ అయ్యాడు. క్రైమ్ చుట్టూ అల్లుకున్న అంశాలన్నీ సూపర్ కానీ క్రైమ్ చేయడానికి గల కారణాలే అంత బలంగా లేకపోవడం వలన క్లైమాక్స్ లో ఆడియన్స్ కొంత నిరాశ చెందుతారు. అలాగే హీరో పాత్రలో పానిక్ అటాక్స్ రావడానికి ఏదో కారణం ఉంది అని ఎస్టాబ్లిష్ చేసుకుంటూ వచ్చి చివరికి అదొక డీవియేషన్ లాగానే వాడుకొని వదిలేయడం కూడా చూసే ప్రేక్షకులకి కొంత నిరాశని కలిగిస్తుంది. నాని అండ్ ప్రశాంతి త్రిపురనేని ప్రొడక్షన్ వాల్యూస్ సూపర్బ్.

విజిల్ మోమెంట్స్:  

– స్పీడ్ అండ్ గ్రిప్పింగ్ స్క్రీన్ ప్లే
– ఫస్ట్ హాఫ్
– విశ్వక్ సేన్ మైండ్ బ్లోయింగ్ పెర్ఫార్మన్స్
– సూపర్బ్ టెక్నికల్ స్టాండర్డ్స్ (సినిమాటోగ్రఫీ, మ్యూజిక్ అండ్ ఎడిటింగ్)
– ఇంటర్వల్  అండ్ ప్రీ క్లైమాక్స్
– ఊహించలేని ట్విట్స్

బోరింగ్ మోమెంట్స్:  

– సెకండాఫ్ మధ్యలో డ్రాగ్ చేయడం
– బెటర్ గా ఉండాల్సిన క్రైమ్ పాయింట్
– ఎమోషనల్ కనెక్ట్ మిస్ అవ్వడం

విశ్లేషణ: 

నూతన దర్శకుడు శైలేష్ కొలను విశ్వక్ సేన్ ని ఇన్వెస్టిగేటివ్ పోలీస్ ఆఫీసర్ గా చూపిస్తూ చేసిన ‘హిట్’ సినిమాలో, హిట్ అనిపించుకునే ఒక క్రైమ్ థ్రిల్లర్ లో ఉండాల్సిన అన్నీ ఉన్నాయి. అలాగే ప్రేక్షకులని నిరాశ పరిచే కొన్ని అంశాలు కూడా ఉన్నాయి. విశ్వక్ సేన్ ఇంటెన్స్ పెర్ఫార్మన్స్, గ్రిప్పింగ్ ఫస్ట్ హాఫ్, ప్రీ క్లైమాక్స్ లో వచ్చే క్రైమ్ రివీలింగ్ పాయింట్స్ మీ చేత వావ్ అనిపించుకుంటే, సెకండాఫ్ లో ఒక స్టేజ్ తర్వాత డ్రాగ్ అనిపించే ఇన్వెస్టిగేషన్ సీన్స్, క్రైమ్ రీజన్ బెటర్ గా లేకపోవడంతో పరవాలేదు బాగానే ఉంది అనే ఫీలింగ్ తో ఆడియన్స్ బయటికి వస్తారు. ఓవరాల్ గా ‘హిట్’ సినిమా థియేటర్ కి వచ్చిన ఆడియన్స్ ని పూర్తిగా డిజప్పాయింట్ చేయదు, అలా అని ఫెంటాస్టిక్ అని కూడా అనిపించుకోదు. ఓకే బాగుంది అనే ఫీలింగ్ అయితే పక్కాగా ఇస్తుంది.

ఇంటర్వల్ మోమెంట్: వావ్.. బ్రేక్ ఎందుకబ్బా సెకండాఫ్ వేసేయండి.!

ఎండ్ మోమెంట్: అంతా బాగా తీసుకొచ్చి క్లైమాక్స్ వీక్ చేసేశాడబ్బా.. జస్ట్ ఓకే క్రైమ్ థ్రిల్లర్.!

చూడాలా? వద్దా?: క్రైమ్ థ్రిల్లర్స్ ఇష్టపడే వాళ్ళు పక్కాగా చూడచ్చు.

బాక్స్ ఆఫీస్ రేంజ్:

పర్ఫెక్ట్ క్రైమ్ థ్రిల్లర్స్ కి ఇప్పుడిప్పుడే తెలుగులో మార్కెట్ పెరుగుతోంది. గతంలో వచ్చిన ‘క్షణం’, ‘ఎవరు’ తరహాలో గ్రిప్పింగ్ స్క్రీన్ ప్లే లో శైలేష్ సక్సెస్ అవ్వడం వలన ఒక డీసెంట్ సినిమా చూసాం అనే ఫలియింగ్ ని ఇస్తుంది. ఏ సెంటర్, మల్టీ ప్లేస్ ఆడియన్స్ కి నచ్చే సినిమా ‘హిట్’. మాస్ సెంటర్స్ లో కొంతవరకూ డౌట్ అని చెప్పచ్చు. బి, సి సెంటర్స్ లో క్రౌడ్ రాబట్టుకోవడానికివిశ్వక్ సేన్ గత సినిమా ఎఫెక్ట్, నాని ట్యాగ్ మాత్రమే హెల్ప్ కానుంది. ‘అ!’ తర్వాత అదే తరహాలో బెస్ట్ స్క్రీన్ ప్లే మూవీతో నాని చేసిన ఈ హిట్ ఈ సారి బాక్స్ ఆఫీస్ వద్ద కూడా కొన్ని పైసలు తెచ్చి పెట్టే అవకాశం ఉంది. ఈ సినిమా థియేటర్స్ లో డీసెంట్ అనిపించుకుని ఓటిటి ప్లేట్ ఫామ్ లో మాత్రం పక్కాగా హిట్ అనిపించుకుంటుంది.

గమనిక: మా బాక్స్ ఆఫీస్ రేంజ్ అనేది సినిమా రేటింగ్ మీదే పూర్తిగా డిపెండ్ అవ్వకుండా హీరో స్టార్డం, భారీ రిలీజ్ మరియు రిలీజ్ అయిన సీజన్ ని కూడా కలుపుకొని చెబుతాం.

తెలుగుబుల్లెటిన్.కామ్ రేటింగ్: 2.75/5