Viral News: వాడకం తక్కువ బిల్లు చెల్లింపు ఎక్కువ తరహాలో ఒక్కోసారి తప్పులతో బిల్లులు వచ్చిన సంఘటనలు చూశాం. ఇప్పుడో ప్రయాణికుడికి తాను చెల్లించాల్సిన రూ.72కి బదులు ఏకంగా రూ.7.66కోట్లు బిల్లుగా చెల్లించాలని వస్తే.. ఒక్కసారిగా గుండె అదిరిపోవడమే జరుగుతుంది.
నొయిడాకు చెందిన ప్రయాణికుడికి ఇదే అనుభవం ఎదురైంది. ప్రయాణానికి ఆటో బుక్ చేసుకున్న దీపక్ అనే యువకుడు ప్రయాణ చార్జీగా రూ.62 చూపింది. అయితే.. ప్రయాణం ముగిశాక అదే బిల్లు ఏకంగా రూ.7.66కోట్లుగా చూపించింది. దీంతో దీపక్ ఆశ్చర్యపోయాడు. ఈ విషయాన్ని స్నేహితుడు ఆశిష్ మిశ్రాకు తెలియజేశాడు. ఆయన ఈ విషయాన్ని సోషల్ మీడియాలో పోస్ట్ చేయడంతో వైరల్ అయింది.
నా ఫ్రెండ్ ప్రయాణానికి రూ.7.66కోట్లు బిల్లు వచ్చింది. అయితే.. డిడక్షన్స్ ఇచ్చి రూ.5,99,09,189 కట్టమన్నారు. ఇందుకు ధన్యవాదాలు అని అన్నాడు. దీనిపై సదరు సంస్థ ప్రతిస్పందించి.. జరిగిన తప్పుకు మన్నించాలి. మా టెక్నికల్ టీమ్ తో సరిచేయిస్తామని పేర్కొంది. దీనిపై నెటిజన్లు సరదా కామెంట్స్ చేస్తున్నారు.