గ్రౌండ్ రిపోర్ట్: వంగా గీతకి డిపాజిట్లు కూడా దక్కవా.?

రాజకీయాల్లో ఈక్వేషన్స్ ఎప్పటికప్పుడు మారిపోతుంటాయి. ఓటరు నాడి ఏంటన్నది పసిగట్టడం రాజకీయ పార్టీలకు, నాయకులకు అంత తేలిక కాదు. బంపర్ విక్టరీ సాధిస్తారని సర్వేల్లో తేలితే, ఫలితం అత్యంత దారుణంగా వుండొచ్చు. రాజకీయాల్లో గెలుపోటములకు సంబంధించి, కింది స్థాయిలో అనేక వ్యవహారాలు నడుస్తుంటాయ్.

కాకినాడ ఎంపీ వంగా గీత, పిఠాపురం అసెంబ్లీ నియోజకవర్గం నుంచి ఎందుకు పోటీ చేస్తున్నారు.? అసలు, ఆమెను లోక్ సభ నుంచి అసెంబ్లీకి వైసీపీ అధినేత వైఎస్ జగన్ ఎందుకు దించారు.? అంటే, పిఠాపురంలో పవన్ కళ్యాణ్ పోటీ చేస్తారు గనుక.. అన్నది అప్పట్లోనే వినిపించిన వాదన.

భీమవరం, గాజువాక, తిరుపతి.. ఇలా మూడు నియోజకవర్గాల చుట్టూ నానా రకాల ఈక్వేషన్స్ వేసుకుని, చివరికి పిఠాపురం నియోజకవర్గాన్ని ఖరారు చేశారు జనసేన అధినేత పవన్ కళ్యాణ్. పైకి కనిపించిన వ్యవహారమిది. తెరవెనుక ఎప్పటినుంచో.. అంటే, 2019 ఎన్నికల సమయంలోనే పిఠాపురం నియోజకవర్గం నుంచి పోటీ చేయాలని ఆలోచన చేసిన జనసేనాని, అప్పటికి కుదరకపోయినా.. ఆ తర్వాత నుంచీ పిఠాపురంపై స్పెషల్ ఫోకస్ పెడుతూ వచ్చారు.

సరే, అదంతా గతం. పోలింగ్ డేట్ సమీపించేస్తోంది. పిఠాపురంలో జనసేనాని గెలుపు అంత తేలిక కాదు.. అనే వైసీపీ ప్రచారం నుంచి, పవన్ కళ్యాణ్‌కి 30 వేల ఓట్ల మెజార్టీ రావొచ్చని వైసీపీ నేతలే చెప్పే పరిస్థితి వచ్చింది. దీన్ని పిఠాపురం స్థానిక ప్రజలు ఎలా చూస్తున్నారంటే, ‘వంగా గీతకి డిపాజిట్లు కూడా రావు’ అనేంతలా.

ఎందుకిలా జరిగింది.? ఇదే నిజమవుతుందా.? ఇలా చాలా ప్రశ్నలు వైసీపీ శ్రేణులకు కంటి మీద కునుకు లేకుండా చేస్తున్నాయి. వంగా గీత ఎన్నికల ప్రచారానికి వెళుతోంటే, ‘ఎంపీగా ఏనాడూ మా సమస్యల్ని పట్టించుకోలేదు. ఇప్పుడెందుకు వస్తున్నావ్.?’ అంటూ జనం నిలదీస్తున్నారు.

రోడ్లు బాగా లేవు.. అభివృద్ధి లేదు.. ఇలా సమస్యలు ఏకరువు పెడుతూ, దానికి కారణం వైసీపీ పాలనేనని జనం నిలదీస్తుండడంతో, ఎలా సమాధానం చెప్పాలో అర్థం కావడంలేదు వంగా గీతకి. ‘కాపు మహిళ’ అన్న కోణంలో తనకు కాపు సామాజిక వర్గం అండగా వుండాలనే స్థాయికి వంగా గీత రాజకీయం పడిపోయింది.

అయితే, ఇక్కడా ముద్రగడ పద్మనాభం ‘ప్రాపర్టీ’ వ్యాఖ్యలతో, వంగా గీత పేరు మరింత పలచనైపోయింది పిఠాపురం రాజకీయాల్లో. డిపాజిట్లు రానంత ఘోర పరాజయం వుండకపోవచ్చుగానీ, వంగా గీతకి మాత్రం పరాజయం తప్పదు. ఓడిపోయాక, వంగా గీత వైసీపీని వీడి, జనసేనలో చేరిపోవేడమే మంచిదన్న వాదన పిఠాపురంలో.. అందునా, కాపు సామాజిక వర్గంలో ప్రముఖంగా వినిపిస్తోంది.