కరోనాతో కాదు.. కొత్త సమస్యతో అట్టుడికిపోతున్న అమెరికా!!

అగ్రరాజ్యంగా ప్రపంచాన్ని శాసించిన అమెరికా కొన్ని నెలలుగా గడ్డు పరిస్థితులు ఎదుర్కొంటోంది. కరోనా వైరస్ తో ఊపిరాడని అమెరికాను ఐదు రోజులుగా ఓ సమస్య అట్టడుకించేస్తోంది. జార్జ్ ఫ్లాయిడ్ అనే నల్ల జాతీయుడి మృతి ఇందుకు కారణం. ఫ్లాయిడ్ ను ఓ తెల్లజాతి పోలీస్ తన మోకాలితో మెడపై బలంగా తొక్కిపెట్టి అతని మృతికి కారణమయ్యారు. ఈ ఉదంతం అమెరికాను అల్లకల్లోలం చేసేస్తోంది. ఫ్లాయిడ్ ను ఆ పోలీస్ తొక్కిపెట్టిన వీడియో బాగా వైరల్ అయిపోయింది.

ఆ వీడియోలో ఫ్లాయిడ్ ఊపిరాడడం లేదు.. వదలండి అంటున్నా పోలీసులు వినిపించుకోకపోవడం మరింత అలజడికి కారణమైంది. దీంతో ఐదు రోజులుగా అమెరికా నిరసనల హోరుతో రగిలిపోతోంది. ప్రజలంతా రోడ్ల మీదకు వచ్చి నిరసనలు తెలియజేస్తున్నారు. అసలే కరోనా వ్యాప్తిపై ఆందోళన చెందుతున్న ప్రభుత్వానికి వీరిని ఎలా ఆపాలో అర్ధం కావటం లేదు. ప్రజలంతా కరోనాకు కూడా భయపడకుండా రోడ్ల మీదకు వచ్చి పోలీసుల దౌర్జన్యంపై నినదిస్తున్నారు.

చాలా నగరాల్లో పోలీసులపై రాళ్లు రువ్వుతున్నారు. మినియాపోలీస్ లో పోలిస్ స్టేషన్ ను తగులబెట్టారు. అట్లాంటాలో నేషనల్ గార్డ్స్ ను రంగంలోకి దించినా ప్రయోజనం లేకపోతోంది. డెట్రాయిట్ లో పోలీసులు జరిపిన కాల్పుల్లో ఓ 19ఏళ్ల యువకుడు ప్రాణాలు కోల్పోయాడు. దీంతో పరిస్థితి మరింత అదుపు తప్పింది. ఈ ఘటనకు కారణమైన పోలీసులను ప్రభుత్వం సస్పెండ్ చేసినా ప్రజలు శాంతించటం లేదు.

‘మాకు ఊపిరి ఆడటం లేదు.. రేపు నేనే కావొచ్చు’ అంటూ నినాదాలతో హోరెత్తిస్తున్నారు. అమెరికాలో జత్యాహంకార దాడులపై 2014 నుంచి నిరసనలు జరుగుతున్నాయి. ‘బ్లాక్‌ లైవ్స్ మ్యాటర్‌’ పేరుతో ఉద్యమాలు జరుగుతున్నాయి. జార్జ్ ఫ్లాయిడ్ ను నకిలీ నోట్లు సరఫరా చేస్తున్నాడనే అనుమానంతో పోలీసులు అడ్డుకున్నారు. ఫ్లాయిడ్ ఎదురు తిరిగాడని పోలీసులు చెబుతున్నారు. అందుకు సాక్ష్యం లేదు.