హత్రాస్.. అర్ధరాత్రి అంత్యక్రియలపై సుప్రీంకు యూపీ ప్రభుత్వం నివేదిక

ఉత్తర్ ప్రేదేశ్ లోని హత్రాస్ లో అత్యాచారానికి గురైన 19 ఏళ్ల దళిత యువతి ఢిల్లీలోని సప్తర్ జంగ్ ఆసుపత్రిలో మరణించిన విషయం తెలిసిందే. అయితే.. ఆమె మృతదేహాన్ని స్వగ్రామానికి తరలించి అదే రోజు అర్ధారాత్రి 2:30 నిముషాలకు పోలీసులు ఆమెకు అంత్యక్రియలు నిర్వహించారు. ఈ క్రమంలో బాధితురాలి కుటుంబసభ్యులు ఎవరూ లేకుండా ఈ కార్యక్రమాన్ని పూర్తి చేసారు. దీంతో యూపీ ప్రభుత్వంపై తీవ్ర విమర్శలు వచ్చిన సంగతి తెలిసిందే.

ముఖ్యంగా అర్ధరాత్రి అంత్యక్రియలు జరపపడంపై తీవ్ర దుమారం రేగింది. దీంతో సుప్రీంకోర్టుకు తన వాదన వినిపించింది యూపీ ప్రభుత్వం. ’19 ఏళ్ల యువతిపై అత్యాచారం జరిగిందనే విషయంపై తీవ్ర ఆగ్రహజ్వాలలు వ్యక్తమయ్యాయి. దీంతో ఈ అంశంపై కుల, మత వర్ణం ఆధారంగా స్వప్రయోజనాలతో రాజకీయం జరుగుతోందని నివేదిక అందింది. అప్పటికే సప్తర్ జంగ్ ఆస్పత్రి వద్ద తీవ్ర ఆందోళనకర పరిస్థితులు నెలకొన్నాయి. గ్రామంలో కూడా ఇదే స్థాయి గొడవలు జరిగేంత ఉద్రిక్తత పరిస్థితులు నెలకొన్నాయని నిఘా వర్గాలు నివేదిక ఇచ్చాయి’.

‘ఈమేరకు సెప్టెంబర్ 29న జిల్లా యంత్రాంగానికి నివేదికలు వచ్చాయి. ఈ సంఘటనలు జరుగకుండా ఆపేందుకు.. పరిస్థితులను అదుపులో ఉంచేందుకే అర్ధరాత్రి అంత్యక్రియలు నిర్వహించాం’ అని యూపీ ప్రభుత్వం సుప్రీంకు వివరించింది. అయితే.. ఈ ఘటనకు కారకులైన వారికి పలుకుబడి ఉండటం కారణంగా వారిని రక్షించేందుకే ఇలా చేశారని యూపీ ప్రభుత్వం ఆరోపణలు ఎదుర్కొంది. దీంతో సుప్రీంకు ఈమేరకు నివేదిక అందించింది. ఈ కేసును సీఎం యోగి ఆదిత్యనాధ్ సీబీఐ విచారణకు సిఫార్సు చేసిన సంగతి తెలిసిందే.