తిరుపతి ఉప ఎన్నిక: జనసేనాని పవన్ అనుమానమే నిజమవుతోందా.?

‘తిరుపతి ఉప ఎన్నికకు సంబంధించి బీజేపీ అభ్యర్థి గనుక బరిలోకి దిగితే, బీజేపీ జాతీయ నాయకత్వం.. తిరుపతి ఉప ఎన్నికను అత్యంత సీరియస్‌గా తీసుకుని, గెలుపు కోసం కృషి చేయాలి.. అదే, జనసేన పార్టీ గనుక బరిలోకి దిగితే.. ప్రతి నియోజకవర్గంలోనూ స్వయంగా నేనే పర్యటించి, పార్టీ గెలుపు కోసం కృషి చేస్తాను..’ అంటూ కొన్నాళ్ళ క్రితం జనసేన అధినేత పవన్ కళ్యాణ్ వ్యాఖ్యానించిన విషయం విదితమే.

తిరుపతి ఉప ఎన్నికను ప్రతిష్టాత్మంగా తీసుకోకపోతే, ప్రజల్లోకి బీజేపీ – జనసేన కూటమిపై తప్పుడు సంకేతాలు వెళతాయనే అనుమానాన్ని గతంలోనే జనసేన అధినేత వ్యక్తం చేశారు. అయితే, బీజేపీ జాతీయ నాయకత్వం.. తిరుపతి ఉప ఎన్నికను అంత ప్రతిష్టాత్మకంగా తీసుకుంటున్నట్లు కనిపించడంలేదు.

దేశంలోని వివిధ రాష్ట్రాల్లో జరుగుతున్న అసెంబ్లీ ఎన్నికల కారణంగా కావొచ్చు, మరో కారణం వల్ల కావొచ్చు.. జాతీయ నాయకత్వం.. అంటే కేంద్ర మంత్రి అమిత్ షా, ప్రధాని నరేంద్ర మోడీ.. తిరుపతి ఉప ఎన్నికపై ప్రత్యేకమైన దృష్టి పెట్టలేకపోతున్నారన్నది నిర్వివాదాంశం. బీజేపీ జాతీయ అధ్యక్షుడు జేపీ నడ్డా తిరుపతి ఉప ఎన్నిక ప్రచారంలో భాగంగా ఓ బహిరంగ సభలో పాల్గొననున్నారు. ఆ కార్యక్రమానికి పవన్ కళ్యాణ్ కూడా హాజరు కావాల్సింది.. కానీ, పవన్ సెల్ఫ్ క్వారంటైన్‌లోకి వెళ్ళడంతో అది సాధ్యపడటంలేదు.

ఇక, తాజా రాజకీయ పరిణామాల గురించి మాట్లాడుతూ, జనసేన నేత నాదెండ్ల మనోహర్ ఆసక్తికరమైన వ్యాఖ్యలు చేశారు. ‘తిరుపతి ఉప ఎన్నిక వార్మప్ మ్యాచ్ లాంటిది’ అన్నది నాదెండ్ల ఉవాచ. ఇక్కడ ‘వార్మప్’ అంటే, జనసేన – బీజేపీ మధ్య కార్యకర్తల స్థాయిలో సమన్వయం.. అని అనుకోవాలేమో. జమిలి ఎన్నికలొచ్చినా, అంతకు ముందే రాష్ట్రంలో అసెంబ్లీ ఎన్నికలు జరిగినా.. బీజేపీ – జనసేన మధ్య సమన్వయం అవసరం. ఆ సమన్వయం అయితే వుండాల్సిన స్థాయిలో లేదనేది నిర్వివాదాంశం.

అలా సమన్వయం వుండాలంటే, ముందుగా బీజేపీ అగ్రనాయకత్వం, వైఎస్సార్ కాంగ్రెస్ పార్టీని రాజకీయ ప్రత్యర్థిగా చూడాలి. పూటకో మాట మార్చే ఏపీ బీజేపీ నేతలు వైసీపీ మీద ఏం మాట్లాడినా అది నమ్మేలా వుండదు. ఇవన్నీ జనసేనాని పరిగణనలోకి తీసుకునే, బీజేపీకి ముందస్తు హెచ్చరిక చేశారు. కానీ, ఆయన అనుమానమే నిజమైంది.. తాటాకు చప్పుళ్ళలా తప్ప, వైసీపీ అదిరిపడేలా తిరుపతి ఉప ఎన్నికను బీజేపీ ప్రతిష్టాత్మకంగా తీసుకోలేకపోతోంది.