న్యాయవాది కళ్యాణ్ దిలీప్ సుంకర, జనసేన పార్టీ సింపతైజర్.! ఆయన జన సేన పార్టీ మద్దతుదారుడంతే.! జనసేన పార్టీకి సంబంధించిన నాయకుడు కాదు.! అసలు కళ్యాణ్ దిలీప్ సుంకరకి, జనసేన పార్టీలో ప్రస్తుతం ఎలాంటి పదవీ లేదు.!
కొంత కాలం క్రితం ఆయన జనసేన పార్టీలో వుండేవారు. ఏ కారణాలతో ఆయన జనసేన పార్టీకి దూరమయ్యారన్నది, ఆయనకు సంబంధించిన విషయం. ఆయన ఏనాడూ ఫలానా కారణంతో పార్టీకి దూరమయ్యానని చెప్పలేదు. జనసేన పార్టీ కూడా కళ్యాణ్ దిలీప్ సుంకర విషయమై ఎలాంటి ప్రకటనా ఇటీవలి కాలంలో చేసింది లేదు.
యూ ట్యూబ్ వేదికగా కళ్యాణ్ దిలీప్ సుంకర, జనసేన పార్టీకి మద్దతుగా మాట్లాడుతుండేవారు. కాపు సామాజిక వర్గం తరఫున వకాల్తా పుచ్చుకుని, వైసీపీని విమర్శిస్తుండేవారు. టీడీపీ అను‘కుల’ మీడియాని ఏకిపారేస్తుండేవారు. చంద్రబాబుపైనా మంటెక్కిపోయేవారాయన.!
టీడీపీ – జనసేన – బీజేపీ.. ఈ మూడు పార్టీలూ కూటమి కట్టడం బహుశా కళ్యాణ్ దిలీప్ సుంకరకి నచ్చకపోయి వుండొచ్చు. నచ్చినా, నచ్చి వుండొచ్చు కూడా.! గత కొద్ది రోజులుగా కళ్యాణ్ దిలీప్ సుంకర, వైసీపీకి అనుకూలంగా మాట్లాడుతూ వస్తున్నారు.
గతంలో, వైసీపీ అధినేత వైఎస్ జగన్ మోహన్ రెడ్డి మీద నానా రకాల విమర్శలూ చేసి, ఇప్పుడు వైఎస్ జగన్ పొలిటికల్ గ్రాఫ్ గురించీ, ఆయన పొలిటికల్ ఇమేజ్ గురించీ పాజిటివ్ వ్యాఖ్యలతో కూడిన వీడియోల్ని విడుదల చేస్తున్నారు కళ్యాణ్ దిలీప్ సుంకర.!
జనసేన పార్టీలో కళ్యాణ్ దిలీప్ సుంకర లేరు గనుక, ఆయన తాజా వ్యవహార శైలిపై జనసేన పార్టీ నుంచి ఎలాంటి కామెంట్ వచ్చే అవకాశం లేదు. కానీ, జనసేన సింపథైజర్స్.. మరీ ముఖ్యంగా, ఇన్నాళ్ళూ కళ్యాణ్ దిలీప్ సుంకర వీడియోల్ని అమితంగా మెచ్చుకున్న కొందరు జనసేన మద్దతుదారులు, ఇప్పుడాయన తీరుపై ఆశ్చర్యపోతున్నారు.
సినీ నటుడు అలీ, కోన వెంకట్.. వీళ్ళంతా పవన్ కళ్యాణ్కి ఒకప్పుడు అత్యంత సన్నిహితులు. రాజకీయంగా వాళ్ళంతా వైసీపీ వైపుకు వెళ్ళిపోయారు. కళ్యాణ్ దిలీప్ సుంకర విషయంలోనూ అంతకు మించి ఏమీ అనుకోవడానికి వీల్లేదు. పిఠాపురంలో జనసేన తరఫున కళ్యాణ్ దిలీప్ సుంకర ఎన్నికల ప్రచారం చేస్తారనే ప్రచారం జరిగింది. జనసేన ఈ విషయంలో ఎలాంటి అదికారిక ప్రకటనా చేయలేదు కదా.!
కళ్యాణ్ దిలీప్ సుంకర వ్యవహార శైలిపై సహజంగానే పవన్ కళ్యాణ్ అభిమానుల నుంచి ఘాటైన కామెంట్లు వస్తాయ్. సోషల్ మీడియా యుగం ఇది. ఎవర్నీ ఎవరూ ఆపలేరు. వాటిని పట్టుకుని, జనసేన పార్టీ బాగోతాలేవో బయటపెట్టేస్తానన్నట్లుగా కళ్యాణ్ దిలీప్ సుంకర మాట్లాడటమంటే అంతకన్నా హాస్యాస్పదం ఇంకోటుండదు.
ఒకప్పుడు కళ్యాణ్ దిలీప్ సుంకర, జనసేన రాజకీయ ప్రత్యర్థులపై ఎలా విరుచుకుపడిపోయారో, అలా కళ్యాణ్ దిలీప్ సుంకర వ్యవహార శైలిపై.. ఇతరులూ మండిపడతారు కదా.!
పవన్ కళ్యాణ్ అభిమాని, జనసేన సింపథైజర్.. అన్న గుర్తింపు లేకపోతే, అసలు కళ్యాణ్ దిలీప్ సుంకర ఎవరు.? అన్న ప్రశ్న సహజంగానే తెరపైకొస్తుంటుంది.! అందులో వింతేముంది.? ఏమో, పోతిన వెంకట మహేష్లా ముందు ముందు కళ్యాణ్ దిలీప్ సుంకర కూడా, పవన్ కళ్యాణ్ వ్యక్తిగత జీవితంపై దిగజారుడు వ్యాఖ్యలు చేస్తాడేమో.! నడుస్తున్న రాజకీయం అదే కదా.?