స్పెషల్ స్టోరీ: ఏపీ నేతల్లో టెన్షన్.. ఇదే కారణం..

ఆంధ్రప్రదేశ్ లో స్థానిక సంస్థల ఎన్నికలు వాయిదా పడటంతో తెలుగుదేశం పార్టీ నేతలు ఒక విధంగా సంతోషం వ్యక్తం చేస్తున్నారు. అధికారంలో ఉన్న వైకాపా మాత్రం కొంత ఆందోళన చెందుతున్నది. దీనికి అనేక కారణాలు ఉన్నాయి. ఇప్పటికే వైకాపా ఎంపిటిసి, జెడ్పీటిసి స్థానాలు అనేకం ఏకగ్రీవంగా గెలుచుకుంది. అధికారంలో ఉన్న పార్టీ సహజంగానే ఎక్కువ స్థానాల్లో విజయం సాధిస్తుంది.

అయితే, వైకాపా నేతలు మిగతా వాళ్ళను నామినేషన్ దాఖలు చేయనీకుండా అడ్డుకున్నారని, దాడులు చేశారని తెలుగుదేశం పార్టీ నేతలు కంప్లైంట్ చేసిన సంగతి తెలిసిందే. ఈ కంప్లైంట్ తో పాటుగా కరోనా ప్రభావం కూడా ఉండటంతో ఎన్నికలను వాయిదా వేశారు. మాచర్ల, తిరుపతి, పుంగనూరు ప్రాంతాల్లో మరలా ఎన్నికల ప్రక్రియను మొదటి నుంచి చేపట్టే అవకాశాలు ఉన్నట్టుగా తెలుస్తోంది. ఇదే ఇప్పుడు ఆ పార్టీ నేతలను టెన్షన్ పెడుతున్నది.

ఎందుకంటే, ఎన్నికలు అంటేనే ఖర్చుతో కూడుకొని ఉంటాయి. ఎన్నికల్లో ప్రజల కోసం ఖర్చు పెట్టకపోయినా, కనీసం ఎన్నికల సమయంలో పక్కన ఉన్న కార్యకర్తల కోసం డబ్బులు ఖర్చు పెట్టాలి. ఎన్నికల ప్రచారం కోసం డబ్బు ఖర్చు చేయాలి. ఎన్నికల నోటిఫికేషన్ విడుదలయ్యి ఎన్నికలు పూర్తయ్యే వరకు ఒక్కో అభ్యర్థి ఎన్నికల ప్రచారం కోసం భారీగా ఖర్చులు పెడుతుంటారు. గెలుస్తారో లేదో కూడా నమ్మకం ఉండదు.

స్థానిక ఎన్నికల్లో ఏకగ్రీవం అయినప్పటికీ హింసాత్మక సంఘటనలు జరిగిన ప్రాంతాల్లో ఎన్నికల మొదటినుంచి జరిగే అవకాశం ఉందనే సంకేతాలు వస్తుండటంతో ఎన్నికల్లో పోటీ చేసే అభ్యర్థులు ఆలోచనలో పడిపోయారు. అధికార పార్టీ పరిస్థితే ఇలా ఉంటె, ప్రతిపక్షంలో ఉన్న తెలుగుదేశం పార్టీ పరిస్థితి ఇంకెలా ఉంటుందో అర్ధం చేసుకోవచ్చు.

ఎన్నికల్లో పోటీ చేసే అభ్యర్థులకు పార్టీ నుంచి డబ్బులు అందే పరిస్థితి కనిపించడం లేదు. ఎన్నికల్లో పోటీ చేసే అభ్యర్థులు ఎవరి డబ్బులు వాళ్లే పెట్టుకోవాల్సిన అవసరం ఏర్పడింది. ఇప్పటికే అభ్యర్థులు ఎన్నికల కోసం చాలా ఖర్చు పెట్టారు. ఎన్నికలు వాయిదా పడటంతో వారంతా నిరాశా చెందుతున్నారు.

ఆరు వారాల తరువాత ఎన్నికలు జరిగితే, అప్పటి వరకు ఎన్నికల్లో పోటీ చేసే అభ్యర్థుల సంఖ్య తగ్గిపోయే అవకాశం ఉంటుంది. రాజధాని ప్రభావం ఎక్కువగా ఉన్న గుంటూరు, కృష్ణా, ప్రకాశం జిల్లాలో ఎలాగైనా అధిక స్థానాల్లో విజయం సాధించాలని వైకాపా చూస్తున్నది. ఇది జరగాలి అంటే అభ్యర్థులంతా చురుగ్గా వ్యవహరించాలి. కార్యకర్తలకు చేతులు, జేబులు తడుపుతూనే ఉండాలి. ఇదంతా జరగాలి అంటే పోటీ చేస్తున్న అభ్యర్థుల వద్ద పుష్కలంగా డబ్బు ఉండాలి. అంతిమంగా డబ్బున్న వ్యక్తులే ఎన్నికల్లో విజయం సాధిస్తారు అని చెప్పడానికి ఏపీ ఎన్నికలు ఒక ఉదాహరణగా మారబోతున్నాయి.