కరోనా పైత్యం: అరకిలో పారాసిటమాల్‌ ట్యాబ్లెట్‌ సరిపోతుందా.?

పిచ్చి పీక్స్‌కి వెళ్ళిపోవడమంటే ఇదే మరి.! లేకపోతే, మిల్లీగ్రాముల్లో వుండే పారాసిటమాల్‌ మోతాదుని, గ్రాముల లెక్కల్లో వేసుకోవాలని చెప్పడమేంటి.? పైగా, అది కూడా అర కిలోగ్రాము పైబడి డోస్‌ అంటే మాటలా.? తనను తాను డాక్టర్‌గా చెప్పుకునే ఓ ఉన్నతాధికారి మీడియా ముందుకొచ్చి మరీ చెప్పిన ‘ప్రిస్క్రిప్షన్‌’ ఇది.

ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డి, ఇటీవల కరోనాపై స్పందిస్తూ, ‘పారాసిటమాల్‌ ట్యాబ్లెట్‌ వేసుకుంటే సరి.. బ్లీచింగ్‌ పౌడర్‌ చల్లితే సరి..’ అంటూ చిట్కా వైద్యం చెప్పిన విషయం విదితమే. ముఖ్యమంత్రి, అంత తేలిగ్గా కరోనా వైరస్‌ గురించి మాట్లాడితే, ఆయన కింద పనిచేసే అధికారులు ఇంకెలా వుంటారు.? పైగా, ఆయనగారికి ‘పదవి’ కూడా, ‘నామినేటెడ్‌’ కోటాలో దక్కింది మరి. అదీ అసలు సంగతి.

ఓ ఉన్నతాధికారి అయి వుండీ, పార్టీ కార్యకర్తలా ఇటీవలే సోషల్‌ మీడియాలో ఆయనగారు చేసిన ఓ పోస్టింగ్‌ వివాదాస్పదమయ్యింది. ఇప్పుడేమో, ఏకంగా 650 గ్రాముల పారాసిటమాల్‌ ట్యాబ్లెట్‌.. అంటూ తన అజ్ఞానాన్ని చాటుకున్నారు. ప్రపంచాన్ని కరోనా వైరస్‌ వణికిస్తోంటే, ఆంధ్రప్రదేశ్‌ ప్రభుత్వ పెద్దల్లో ‘చలనం’ ఇంత బాగా కన్పిస్తోంది.

ఎన్నికలే ముఖ్యం, ప్రజారోగ్యంతో మాకేంటి సంబంధం.? అన్నట్లు అధికార పార్టీ వ్యవహరిస్తుండడంపై జాతీయ స్థాయిలో మొట్టికాయలు పడుతున్నా, సదరు ప్రముఖుల తీరు మాత్రం మారడంలేదనడానికి ఇంతకన్నా నిదర్శనం ఇంకేం కావాలి.? రాష్ట్ర ప్రజలకు ధైర్యం చెప్పాల్సిన అధికార యంత్రాంగం (అందరూ కాదు లెండి, ఒకరిద్దరు మాత్రమే) ఇలా వ్యవహరిస్తోంటే, వాళ్ళు కాస్తా ఉన్నత స్థానంలో వుండడం రాష్ట్ర ప్రజలకు శాపం కాక మరేమిటి.? సదరు ప్రముఖుల తీరు చూసి, మిగతా అధికారులు విస్తుపోతున్నారు.

‘పొరపాటున నోరు జారారేమో..’ అని కూడా సమర్థించలేని పరిస్థితి వుందిక్కడ. ఎందుకంటే, కరోనా వైరస్‌ తీవ్రత అలాంటిది. యావత్‌ భారతదేశమే స్తంభించిపోయేలా నిర్ణయాలు జరుగుతున్నాయి కరోనా కట్టడి కోసం. ఈ పరిస్థితుల్లో అధికార పార్టీ నేతలు కావొచ్చు, వారి కనుసన్నల్లో పబ్బం గడుపుకుంటున్న ఒకరిద్దరు ఉన్నతాధికారులు కావొచ్చు.. కామెడీలు ఆపితే మంచిది.