మధ్యప్రదేశ్ లో కాంగ్రెస్ కథ ముగిసింది

మధ్యప్రదేశ్ లో గత వారం, పది రోజులుగా సాగుతున్న రాజకీయ పరిణామాలకు శుక్రవారం ఫుల్ స్టాప్ పడింది. 15నెలల కమల్ నాథ్ సర్కారు కుప్పకూలింది. బలపరీక్ష కంటే ముందుగానే సీఎం కమల్ నాథ్ తన పదవికి రాజీనామా చేశారు. ఈ సందర్భంగా బీజేపీపై తీవ్ర విమర్శలు చేశారు. తమ సర్కారుపై బీజేపీ కుట్ర పన్నిందని, అత్యాశపరులైన తమ ఎమ్మెల్యేలతో చేతులు కలిపి ప్రభుత్వాన్ని కూల్చివేసిందని దుయ్యబట్టారు.

15 ఏళ్లలో బీజేపీ చేయలేని పనులు తాను 15 నెలల్లోనే చేశానని పేర్కొన్నారు. తమపై కుట్ర పన్ని, తమ ప్రభుత్వాన్ని కూల్చడం ద్వారా బీజేపీ ప్రజల నమ్మకాన్ని వమ్ము చేసిందని విమర్శించారు. జ్యోతిరాదిత్య సింధియా కాంగ్రెస్ ను వీడటంతో ఆయనకు మద్దతుగా మరో 22 మంది ఎమ్మెల్యేలు కూడా రాజీనామా చేసిన సంగతి తెలిసిందే. దీంతో కమల్ నాథ్ సర్కారు మైనార్టీలో పడింది.

230 మంది సభ్యుల కలిగిన మధ్యప్రదేశ్ అసెంబ్లీలో ప్రస్తుతం 228 మంది ఎమ్మెల్యేలు ఉన్నారు. వీరిలో 22 మంది కాంగ్రెస్ ఎమ్మెల్యేల రాజీనామాలు ఆమోదం పొందడంతో ఎమ్మెల్యేల సంఖ్య 206కి తగ్గింది. దీంతో మ్యాజిక్ ఫిగర్ 104కి చేరింది. ప్రస్తుతం బీజేపీ బలం 107 ఉండగా.. కాంగ్రెస్ బలం 114 నుంచి 92కి పడిపోయింది.

ఈ నేపథ్యంలో బలపరీక్ష గెలవడం అసాధ్యమని తెలియడంతో కమల్ నాథ్ ముందుగానే రాజీనామా చేశారు. దీంతో మాజీ సీఎం శివరాజ్ సింగ్ చౌహాన్ నేతృత్వంలో బీజేపీ ప్రభుత్వం ఏర్పాటుకు మార్గం సుగమమైంది. ఇప్పటికే దేశంలో ప్రాభవం కోల్పోతున్న కాంగ్రెస్ కు ఇది నిజంగా శరాఘాతమే.