సెప్టెంబర్ 5న పాఠశాలలు పునఃప్రారంభం.. కేంద్రానికి ఏపీ నివేదిక

ఏపీలో పాఠశాలలు పునఃప్రారంభం కానున్నాయి. ఈమేరకు రాష్ట్ర ప్రభుత్వం తన నిర్ణయాన్ని కేంద్రానికి నివేదించింది. సెప్టెంబర్ 5 నుంచి పాఠశాలలు ప్రారంభించడానికి ఏర్పాట్లు చేస్తున్నట్టు కేంద్రానికి తెలపింది. ఈనెల జూలై 15న రాష్ట్రాలు, కేంద్రపాలిత ప్రాంతాలతో కేంద్రం వీడియో కాన్ఫరెన్స్ నిర్వహించింది. ఈ సమీక్షపై రాష్ట్రాల అభిప్రాయాలు కూడా కోరింది. పాఠశాలలు ఎప్పుడు తెరిచేది చెప్పాలని కోరింది. ఈమేరకు ఏపీ తన నిర్ణయాన్ని కేంద్రానికి తెలిపింది. ఇప్పటికే బీహార్, ఢిల్లీతో సహా పలు రాష్ట్రాలు ఆగష్టులో స్కూళ్లు తెరవనున్నామని ప్రకటించాయి. తెలంగాణ, తమిళనాడు రాష్ట్రాలు ఇంకా ఏ నిర్ణయం తీసుకోలేదు.

నిజానికి ఏపీలో ఆగష్టు 3నుంచి స్కూళ్లు తెరుస్తామని తొలుత ప్రకటించారు. అయితే.. కరోనా తీవ్రత పెరగడంతో మళ్లీ వాయిదా నిర్ణయం తీసుకున్నారు. స్కూళ్లలో అన్ని జాగ్రత్తలు తీసుకునేలా చర్యలు తీసుకుంటామని కూడా ప్రభుత్వం తెలిపింది. ఇప్పటికే ఆ చర్యల దిశగా ఏర్పాట్ల ప్రారంభించింది. ప్రతి స్కూల్, కాలేజీలో ఒక ఐసొలేషన్ గదిని ఏర్పాటు చేయాలని భావిస్తోంది. తరగతులను కూడా విడతల వారీగా నిర్వహించాలని ప్రణాళికలు సిద్ధం చేస్తోంది. దీంతో కరోనా నేపథ్యంలో విద్యా సంవత్సరం ప్రారంభానికి నోచుకోని స్కూళ్లు తెరుచుకోబోతున్నాయి.