ఆంధ్రప్రదేశ్‌ కొత్త రికార్డ్‌: ఒక్క రోజులో 5041 కరోనా పాజిటివ్‌ కేసులు

ఆంధ్రప్రదేశ్‌ రోజురోజుకీ సరికొత్త రికార్డులు సృష్టిస్తోంది కరోనా వైరస్‌ విషయంలో. కరోనాని కట్టడి చేసేశాం.. అని ప్రభుత్వ పెద్దలు కొద్ది రోజులు క్రితం ఘనంగా చెప్పుకున్నారు. కానీ, గ్రౌండ్‌ లెవల్‌లో పరిస్థితులు చాలా దారుణంగా వున్నాయంటూ విపక్షాలు గగ్గోలు పెడుతూనే వున్నాయి. ఆ విపక్షాల వాదనే నిజమయ్యింది. అధికార పార్టీ నేతలు అస్సలేమాత్రం సోషల్‌ డిస్టెన్సింగ్‌ పాటించకుండా పబ్లిసిటీ స్టంట్లు చేశారు. 108, 104 అంబులెన్స్‌లకీ రిబ్బన్‌ కటింగులు చేసి.. ఫొటోలకు ‘గ్రూపులుగా’ పోజులిచ్చిన సందర్భాలున్నాయి. సంక్షేమ పథకాల పేరుతో జన సమీకరణకు దిగి చేసిన పబ్లిసిటీ స్టంట్లు కొంప ముంచేశాయిప్పుడు.

ఒకే ఒక్క రోజులో ఏకంగా 5041 కరోనా పాజిటివ్‌ కేసులు నమోదవడమంటే చిన్న విషయమా.? ‘నిజ్జంగా నిజం చెప్పాలంటే.. ఈ సంఖ్య ఇంకా చాలా ఎక్కువే వుండొచ్చు..’ అనే అభిప్రాయాలు సోషల్‌ మీడియా వేదికగా వెల్లువెత్తుతున్నాయి. గ్రామాల్లోనూ, టౌన్లలోనూ, పట్టణాల్లోనూ పరిస్థితి ఇప్పుడిప్పుడే ప్రజలకూ అర్థమవుతోంది. కానీ, అర్థమయ్యేసరికి.. పరిస్థితి చెయ్యిదాటిపోయింది. ఆ జిల్లా.. ఈ జిల్లా అన్న తేడాల్లేవు.. దాదాపుగా అన్ని జిల్లాల్లోనూ ఇదే పరిస్థితి.

మొదట్లో మర్కజ్‌ మీద తోసేశారు.. కోయంబేడు మీద నెపం మోపేశారు.. ఇప్పుడేమో హైద్రాబాద్‌ నుంచి వచ్చి అంటించేశారంటూ కొత్త పల్లవి అందుకుంటున్నారు. కానీ, సరిహద్దుల్లో కట్టుదిట్టంగా ‘పరీక్షలు’ చేస్తున్నామని ప్రభుత్వం చెబుతున్నదే నిజమైతే, కరోనా వైరస్‌.. ఆంధ్రప్రదేశ్‌లోనే హద్దూ అదుపూ లేకుండా విస్తరించేసిందన్న విషయం సుస్పష్టమవుతోంది. ఎలా.? ఇప్పుడీ పరిస్థితుల్లో ఆంధ్రప్రదేశ్‌ బయటపడేదేలా.?

దక్షిణ భారతదేశంలో ఓ రాష్ట్రం ఒకే రోజు 5 వేల పైచిలుకు కేసులు నమోదు చేయడం ఇదే తొలిసారి. ఆ ఘనత ఆంధ్రప్రదేశ్‌కే దక్కింది. టెస్టుల విషయంలో ‘రికార్డుల’ గురించి మాట్లాడుతున్న వైఎస్‌ జగన్‌ సర్కార్‌, ఈ 5 వేల పైచిలుకు కేసుల రికార్డ్‌ గురించి ఏం చెప్పగలుగుతుంది.? ‘టెస్టులు కాదు మహాప్రభో.. కరోనా వైరస్‌ని కట్టడి చేయడం గురించి మాట్లాడండి..’ అంటూ సగటు ఆంధ్రప్రదేశ్‌ ప్రజలు నెత్తీ నోరూ బాదుకుంటున్నారు. ప్రభుత్వానిదే కాదు.. ఇక్కడ ప్రజలదీ బాధ్యతారాహిత్యం వుంది. కరోనా వైరస్‌ని లైట్‌ తీసుకోవడంతోనే ఈ దుస్థితి.