మెడికల్‌ మాఫియా.. కరోనా ఈ కేటుగాళ్ళకి రాదెందుకు.?

ప్రపంచం కరోనా దెబ్బకు విలవిల్లాడుతోంటే, ‘మెడికల్‌ మాఫియా’ శవాల మీద పేలాలు ఏరుకుంటోంది. ఔను, నిజ్జంగా నిజమిది. కరోనా వైరస్‌ బారిన పడ్డవారికి ఆరోగ్యం విషమించిన పరిస్థితుల్లో దివ్యౌషధంగా చెప్పబడుతూ కొన్ని మందులు మార్కెట్‌లోకి వచ్చాయి. గ్లెన్‌మార్క్‌, హెటిరో తదితర సంస్థలు ఈ మందుల్ని తయీరు చేసిన విషయం విదితమే. ధర అటూ ఇటూగా 5 వేల రూపాయలు పలుకుతున్నాయి సాధారణ రేటు ప్రకారం అయితే. కానీ, మనది ‘మెడికల్‌ మాఫియా’ ప్రపంచం కదా.! ఆ ఐదు వేల రూపాయల విలువ చేసే మెడిసిన్‌ ఏకంగా 40 నుంచి 50 వేల దాకా పలుకుతోంది.

నిజానికి, ఈ మెడిసిన్స్‌ని తక్కువ మొత్తంలోనే తయారు చేస్తున్నారు. పైగా, ఇవి సాధారణ మార్కెట్‌లో దొరకవు. కానీ, డబ్బులు ఎక్కువ పెడితే చాలా తేలిగ్గా దొరికేస్తాయి.. దొరికేస్తున్నాయి కూడా.! హైద్రాబాద్‌లో ఇప్పటికే ఈ ‘మెడికల్‌ మాఫియా’కి సంబంధించి పలువురు అరెస్ట్‌ అయ్యారు కూడా. ఆక్సిజన్‌ సిలెండర్ల సంగతి సరే సరి. సాధారణ మందులదీ ఇదే పరిస్థితి. ఇంతకీ, కరోనా సోకినవారికి ఇచ్చే మెడిసిన్స్‌ ఎలా పక్కదారి పడుతున్నాయి.? కంపెనీలే ‘బ్లాక్‌ మార్కెట్‌’కి తరలిస్తున్నాయని అనుకోవాలా.? కంపెనీల నుంచి బయటకు వచ్చాక.. పక్కదారి పడుతున్నాయని అనుకోవాలా.? కొన్ని కార్పొరేట్‌ ఆసుపత్రులు అవసరానికి మించి మందులు తెప్పించి, వాటిల్లో కొన్నింటిని వినియోగించి, మిగతావాటిని బ్లాక్‌మార్కెట్‌కి పంపిస్తున్నాయని అనుకోవాలా.? ‘నేరం ఎక్కడ జరుగుతోంది.?’ అన్నది విచారణలో తేలుతుంది.

కానీ, ఇలాంటి ఘటనల్లో నిందితులకి సాధారణ శిక్షలు, జరీమానాలు సరిపోవు. మందులు దొరక్క చాలామంది ప్రాణాలు కోల్పోతున్న నేపథ్యంలో ‘మెడికల్‌ మాఫియా’కి తెరలేపిన అక్రమార్కులపై హత్యకేసులు నమోదు చేసినా తప్పు లేదేమో.! సాధారణ పరిస్థితులు కావివి. దాదాపుగా హెల్త్‌ ఎమర్జన్సీ పరిస్థితులు. ప్రభుత్వాలు ఏం చేస్తున్నట్లు.? అన్ని విభాగాలపైనా నిఘా వుంచాల్సిన అధికార యంత్రాంగం నుంచే కొందరు ఈ మాఫియాకి సహకరిస్తున్నారేమోనన్న అనుమానాలూ కలుగుతున్నాయి మందులు దొరక్క తమవారిని కోల్పోయిన వారి నుంచి. ప్రపంచాన్ని కుదిపేస్తోన్న కరోనా సంక్షోభాన్ని కూడా ‘క్యాష్‌’ చేసుకుంటున్నారంటే, ఈ మెడికల్‌ మాఫియాని మింగేయడానికి కరోనా వైరస్‌ కంటే ఇంకా పెద్దదేదో రావాలేమో.!