అమూల్ వైపుగా సంగం.. ప్రభుత్వ పరిధిలోకి ఇందుకేనా.?

టీడీపీ సీనియర్ నేత, మాజీ ఎమ్మెల్యే ధూళిపాళ్ళ నరేంద్ర, సంగం డెయిరీ ఛైర్మన్ పదవిలో కొనసాగుతున్న విషయం విదితమే. ఇటీవల ఆయన్ని ఏపీ ఏసీబీ అరెస్ట్ చేసింది. సంగం డెయిరీలో అక్రమాలు చోటు చేసుకున్నాయనీ, ఆ అక్రమాలకు కారణం ధూళిపాళ్ళ నరేంద్ర అనీ ఏసీబీ ఆరోపిస్తోంది. ప్రస్తుతం ధూళిపాళ్ళ నరేంద్ర ‘రిమాండ్’లో వున్నారు. ఆంధ్రపదేశ్ రాష్ట్రానికి సంబంధించినంతవరకు సంగం డెయిరీ ఓ ప్రతిష్టాత్మకమైన సంస్థ. ఇప్పుడది వివాదాల్లోకెక్కింది. దాంతో, సంగం డెయిరీ భవిష్యత్తుపై రకరకాల అనుమానాలు వ్యక్తమవుతున్నాయి.

సరిగ్గా ఈ సమయంలోనే సంగం డెయిరీని గుంటూరు పాల ఉత్పత్తిదారుల సహకార సంస్థకు అప్పగిస్తూ రాష్ట్ర ప్రభుత్వం జీవో జారీ చేసింది. ఏమయ్యిందోగానీ, ఆ వెంటనే ఆ జీవోని రద్దు చేస్తూ, ప్రభుత్వ పరిధిలోకి సంగం డెయిరీని తీసుకొస్తూ, బాధ్యతల్ని తెనాలి సబ్ కలెక్టర్ కు అప్పగిస్తూ ఆదేశాలు జారీ చేసింది రాష్ట్ర ప్రభుత్వం. ఇకపై ఏపీ డెయిరీ డెవలప్మెంట్ కార్పొరేషన్ పరిధిలోకి సంగం డెయిరీ వెళుతుందన్నమాట.

కార్యకలాపాలకు ఎవరైనా అడ్డు తగిలితే సబ్ కలెక్టర్ తగిన చర్యలు తీసుకుంటారని ప్రభుత్వం చెబుతోంది. ఇంతవరకూ బాగానే వుంది. ప్రభుత్వం, అమూల్ సంస్థతో ఒప్పందం కుదుర్చుకుని, రాష్ట్రానికి సంబంధించిన మొత్తం పాడి పరిశ్రమను దెబ్బ తీస్తోందనీ, పాల ఉత్పత్తిదారుల్ని మోసం చేస్తోందనీ విపక్షాలు విమర్శిస్తోన్న విషయం విదితమే.

అమూల్ ద్వారా పాల ఉత్పత్తిదారులకు లాభం చేకూరుతుందన్నది ప్రభుత్వం వాదన. అదంతా తూచ్.. అన విపక్షాలు అంటున్నాయి. ఏది నిజం.? ప్రభుత్వ పరిధిలోకి సంగం డెయిరీని తీసుకురావడమంటే, పరోక్షంగా దాన్ని అమూల్ సంస్థకు అప్పగించినట్లేనన్న విమర్శలకు ప్రభుత్వ పెద్దలు ఏం సమాధానం చెబుతారో ఏమో. టీడీపీ నేతల ఆర్థిక మూలాల్ని దెబ్బ తీయడం, అమూల్ లాంటి సంస్థలకు ఆర్థిక పరిపుష్టి కలిగించడంలో ప్రభుత్వ పెద్దల ఉద్దేశ్యమేంటో అర్థం కావడంలేదని రాజకీయ విశ్లేషకులు అభిప్రాయపడుతున్నారు.