శుక్రవారం ప్రత్యేకం.. టీడీపీ నేత ధూళిపాళ్ళ అరెస్ట్.!

‘శుక్రవారం అంటే, ఇకపై వైసీపీ మీద సెటైర్లు వేయడం కాదు.. పచ్చ చొక్కాలకి వెన్నులో వణుకు పుట్టాలి..’ అంటూ సోషల్ మీడియాలో కొన్నాళ్ళుగా ఓ చర్చ జరుగుతోంది. ఈ చర్చలో విషయం నిజమే అయితే, అధికార వైసీపీ, పనిగట్టుకుని కక్ష పూరితంగా ప్రతిపక్షం తెలుగుదేశం పార్టీకి చెందిన ముఖ్య నేతల మీద కేసులు బనాయించి, అరెస్టులు చేయిస్తోందని అనుకోవాలేమో.

నేడు శుక్రవారం.. టీడీపీ మాజీ ఎమ్మెల్యే ధూళిపాళ నరేంద్ర అరెస్టయ్యారు. ప్రస్తుతం ఆయన సంగం డెయిరీ ఛైర్మన్ హోదాలో వున్నారు. గత కొంతకాలంగా సంగం డెయిరీ మీద అధికార వైసీపీ ఆరోపణలు చేస్తోంది. సంగం డైరీ అక్రమాలకు సంబంధించి ఏసీబీ, ఈ రోజు ఉదయం ధూళిపాళ్ళ నరేంద్రను అరెస్ట్ చేసిందన్నది అధికార పార్టీ నుంచి ప్రభుత్వ వర్గాల నుంచి అందుతోన్న సమాచారం.

మరోపక్క, శుక్రవారం వచ్చింది కదా.. అధికార వైసీపీకి వెన్నులో వణుకు మొదలైంది.. అందుకే, టీడీపీ నేతల్ని అరెస్ట్ చేయించి పైశాచికానందం పొందుతోంది.. అంటూ సోషల్ మీడియా వేదికగా గుసగుసలు వినిపిస్తున్నాయి. కాగా, ధూళిపాళ్ళ అరెస్టు విషయమై టీడీపీ నేతలు తీవ్రంగా స్పందిస్తున్నారు. అధికార పార్టీ అరాచకాలకు ఇదొక నిదర్శనం మాత్రమే. ఇలాంటివి చాలానే జరిగాయి, జరుగుతూనే వున్నాయి, జరుగుతూనే వుంటాయి.. అంటోంది టీడీపీ.

‘ఒక్క కేసులో కూడా మమ్మల్ని దోషులుగా నిరూపించలేకపోతున్నాయి బులుగు చొక్కాలు. ఖాకీలు కూడా అధికార వైసీపీ కార్యకర్తల్లా వ్యవహరిస్తున్నారు..’ అంటూ టీడీపీ నేతలు మండిపడుతున్నారు. కొన్నాళ్ళ క్రితం మాజీ మంత్రి, టీడీపీ సీనియర్ నేత కింజరాపు అచ్చెన్నాయుడు అరెస్టయ్యారు ఈఎస్ఐ మెడికల్ స్కాంకి సంబంధించి. జైలుకెళ్ళారు, బెయిల్ మీద విడుదలయ్యారు. ఆ తర్వాత ఆ కేసు విచారణ ఎక్కడిదాకా వచ్చిందో ఎవరికీ తెలియదు.

మరో మాజీ మంత్రి కొల్లు రవీంద్రను ఏకంగా హత్యకేసులో అరెస్ట్ చేశారు. ఆ కేసు కూడా అంతే.. అలా అలా సాగుతోంది. అన్నట్టు లిస్టులో మాజీ మంత్రి దేవినేని ఉమామహేశ్వరరావు, టీడీపీ అధినేత చంద్రబాబు కూడా వున్నారు. చంద్రబాబుకి హైకోర్టు స్టే ఇచ్చింది.. మాజీ మంత్రి దేవినేని ఉమ, ఈ నెల 29న సీఐడీ ముందు విచారణకు హాజరు కానున్నారు. కొసమెరుపేంటంటే, ఈ రోజు ఏప్రిల్ 23. 23వ సంఖ్యకీ.. టీడీపీకీ – బులుగు రాజకీయానికీ ప్రత్యేకమైన లింక్ వుందండోయ్. ఫిరాయింపులు, నోటీసులు, అరెస్టులు.. ఈ సంఖ్యకి ప్రత్యేకమైన గుర్తింపును తెస్తున్నాయ్.