కోవాగ్జిన్ కమ్మ వ్యాక్సిన్ అయితే, కోవిషీల్డ్ ఏ కులానిది.?

ప్రస్తుతానికి దేశంలో రెండే రెండు వ్యాక్సిన్లు కరోనా వైరస్ మీద పోరాటం కోసం మనకు అందుబాటులో వున్నాయి. అందులో ఒకటి కోవిషీల్డ్. మన దేశంలోనే ఈ వ్యాక్సిన్ తయారవుతున్నా, ఇది విదేశీ వ్యాక్సిన్. మరొకటి కోవాగ్జిన్. ఇది నిఖార్సయిన స్వదేశీ వ్యాక్సిన్. ప్రస్తుతానికి దేశంలో అత్యధిక సంఖ్యలో కోవిషీల్డ్ వ్యాక్సిన్ ఉత్పత్తి అవుతోంటే, సంఖ్యా పరంగా కోవాగ్జిన్ కాస్త వెనకబడి వుంది.

మొదటి డోసు కోవాగ్జిన్ వేసుకున్నవాళ్ళకి రెండో డోస్ దొరకడం గగనంగా మారిపోయింది. అదే కోవిషీల్డ్ వ్యాక్సిన్ విషయానికొస్తే ఆ సమస్య లేదు. ఇక, కోవాగ్జిన్ విషయంలో ‘కుల పరమైన’ ఆరోపణలు వినిపిస్తున్నాయి. దీన్ని కమ్మ వ్యాక్సిన్ అని మొదటినుంచీ చాలామంది విమర్శిస్తున్నారు. ఈనాడు గ్రూపు సంస్థల అధినేత రామోజీరావుకి, కోవాగ్జిన్ తయారీ సంస్థ భారత్ బయోటెక్ ఎండీతో సంబంద బాంధవ్యాలుండడమే అందుక్కారణం.

పైగా, రాష్ట్రంలో టీడీపీ అనుకూల మీడియా మొదటి నుంచీ కోవాగ్జిన్ విషయంలో అత్యుత్సాహం చూపడం, ప్రత్యేకంగా ఆ వ్యాక్సిన్ ప్రమోషన్ బాధ్యతలు భుజానికెత్తుకోవడం.. సహజంగానే, ఈ తరహా ఆరోపణలకు తావిస్తుంటుంది. అసలు ఈ పరిస్థితుల్లో వ్యాక్సిన్ మీద కుల పరమైన ఆరోపణలు ఏంటి.? అంటే, అదంతే.. రాష్ట్రంలో దేన్నయినా ప్రధాన రాజకీయ పార్టీలు కులపరమైన కోణంలోనే చూడటం పరిపాటిగా మారిపోయింది.

సుప్రీంకోర్టు చీఫ్ జస్టిస్ ఎన్వీ రమణ విషయంలోనూ అదే జరుగుతోంది. ఆయన కమ్మ కులానికి చెందిన వ్యక్తి కాబట్టే, టీడీపీ అను‘కుల’ మీడియా భజన చేస్తోందన్న విమర్శలున్నాయి. ఆ అనుమానాలు రేకెత్తిస్తున్నది బులుగు మీడియా కావడం మరో ఆసక్తికరమైన అంశం. బులుగు కార్యకర్తలే, ఇప్పుడు వ్యాక్సిన్లకీ కులాల్ని ఆపాదిస్తున్నారు. కరోనా వైరస్ కంటే కూడా ఈ కుల వైరస్ అత్యంత ప్రమాదకరమైనది సుమీ.