Ram Charan: మెగా ఫ్యామిలీ హీరోలకు మాస్ ఇమేజ్ ఓ వరం. దశాబ్దాలుగా మెగాస్టార్ చిరంజీవి సాధించిన క్రేజ్ అది. తనదైన శైలి నటన, డైలాగులు, హావభావాలతో చిరంజీవి ప్రేక్షకుల్లో చెరగని ముద్ర వేశారు. దీంతో ఆయన కుటుంబం నుంచి వచ్చే హీరోలపై అదేస్థాయి అంచనాలు ఉండటం సహజం. రామ్ చరణ్ కూ తప్పలేదు. డెబ్యూ మూవీగా కాలేజీ, ప్రేమకు భిన్నంగా మాస్ మూవీ చేసి ప్రేక్షకులను తనపై ఓ అంచనాకు రప్పించేశారు. అయితే.. పూర్తి మాస్ జోనర్లోనే వెళ్లేందుకు చరణ్ ఇష్టపడలేదు. కథ, నటనకు పూర్తి ప్రాధాన్యం ఇస్తూ కల్ట్ మూవీస్ కూడా చేశాడు. ఆకోవలో వచ్చిందే ఆరెంజ్. 2010లో ఫ్లాప్ అయితే 2023లో సూపర్ హిట్టయి రామ్ చరణ్ స్క్రిప్ట్ సెలక్షన్ ఏంటో నిరూపించింది.
ఈక్రమంలో తమ ఆస్థాన ఇమేజ్ అయిన మాస్ నూ వదల్లేదు. రచ్చ, నాయక్, ఎవడు, బ్రూస్ లీ, వినయ విధేయ రామ వంటి సినిమాలు చేశారు. కథను నమ్మి రంగస్థలం చేశారు. సినిమాలో చెవిటి పాత్రను సవాల్ గా తీసుకున్నారు. సరైన సినిమా పడితే రామ్ చరణ్ రేంజ్ తెలుస్తుందని సుకుమార్ చెప్పిన మాటను నిజం చేశాడు. తనదైన నటనతో ప్రేక్షకుల మనసుల్లో ముద్ర వేసుకున్నాడు. చరణ్ కెరీర్ ను రంగస్థలంకు ముందు.. తర్వాతగా మార్చేసిందీ సినిమా. చిరుతతో హీరో డెబ్యూ మూవీస్ ఎలా ఉండాలి, మగధీరతో హై బడ్జెట్ సినిమాలు చేయొచ్చని, రంగస్థలంతో తమిళంలో ఎక్కువగా వచ్చే రస్టిక్ మూవీస్ తెలుగులోనూ తీయోచ్చని నిరూపించాడు. ధృవ సినిమాతో యాక్షన్ కథను అద్భుతంగా రక్తి కట్టించాడు. ఆర్ఆర్ఆర్ లో భిన్నమైన వేరియేషన్స్ ఉన్న పాత్రలో రామ్ చరణ్ తన నటనతో అబ్బురపరిచాడు.
కథల ఎంపికలో ఫ్యాన్స్ ఉద్దేశాల్ని కాకుండా వారిని మెప్పించేలా కథలు ఎంపిక చేస్తానని చెప్పి తన ఐడియాలజీని చెప్పాడు. కేవలం కథల ఎంపిక, సినిమాలు మాత్రమే కాదు.. కలెక్షన్లు, సెంటర్లు వంటి అంశాల్లోనూ తనదైన మార్క్ సెట్ చేశాడు. నిజానికి రంగస్థలం సృష్టించిన ప్రభంజనానికి పోస్టర్స్ లో వారం వారం కలెక్షన్లు.. 100 రోజుల సెంటర్లు దర్జాగా వేసుకోవచ్చు. కానీ.. తనకు అవేమీ ఇష్టం ఉండదని నాడే ఫుల్ స్టాప్ పెట్టించాడు. ఫ్యాన్ వార్స్ కి దూరంగా అభిమానుల్ని ఉంచాలనే ఉద్దేశం ఇది. రాజమౌళి చెప్పినట్టు క్లీన్ స్లేట్ గా సెట్ కు వెళ్లే రామ్ చరణ్ తన పాత్రకి తనదైన నటనతో సరికొత్త అధ్యాయాన్నే లిఖిస్తున్నాడు. అందుకే మెగా సామ్రాజ్యంలో రామ్ చరణ్ సమ్ థింగ్ స్పెషల్.