Poonam Kaur: లైంగిక వేధింపుల ఆరోపణలు ఎదుర్కొంటున్న భారత్ రెజ్లింగ్ సమాఖ్య అధ్యక్షుడు బ్రిజ్ భూషణ్ శరణ్ సింగ్ (Brij Bhushan Sharan Singh) ను అరెస్టు చేసి జైల్లో పెట్టాలని రెజ్లర్లు (Wrestlers) డిమాండ్ చేస్తున్న సంగతి తెలిసిందే. వారికి కపిల్ దేవ్ (Kapil dev), సానియా మీర్జా (Sania Mirza) వంటి వారి నుంచి మద్దతు కూడా వచ్చింది. ఇప్పుడు వీరికి నటి పూనమ్ కౌర్ (Poonam Kaur) సైతం మద్దతు ప్రకటించారు. ఇందుకు సంబంధించి ఓ వీడియో విడుదల చేశారు.
‘రెజ్లింగ్ లో భారత కీర్తిని ప్రపంచానికి చాటి మనల్ని గర్వపడేలా చేసిన రెజ్లర్లు ఇప్పుడు వారి భద్రత కోసం పోరాడుతున్నారు. బీజేపీ ఎంపీ, రెజ్లింగ్ ఫెడరేషన్ అధ్యక్షుడు బ్రిజ్ భూషణ్ దోపిడీపై నిరసిస్తున్నారు. మహిళల భద్రత కోసం పోరాడాల్సిన సమయమిది. దేశంలో మహిళల భద్రత, రక్షణ రాజకీయ ఒత్తిళ్లకు అతీతంగా ఉండాలి. రెజ్లర్లకు కపిల్ దేవ్ తోసహా ఎందరో మద్దతిచ్చారు. నేనూ మద్దతిస్తున్నా’ అని పేర్కొన్నారు. మరోవైపు.. బ్రిజ్ భూషణ్ ను అరెస్ట్ చేసేవరకూ తమ పోరాటం కొనసాగుతుందని రెజ్లర్లు అంటున్నారు.