నయా సోషల్‌ పోకడ: ప్రశ్నిస్తే ‘గ్యాంగ్‌ రేప్‌’ చేసేస్తాం.!

ఏదన్నా విషయమ్మీద సెలబ్రిటీలు స్పందిస్తే, ‘గ్యాంగ్‌ రేప్‌ చేసేస్తాం..’ అంటూ నెటిజన్లు కొందరు విరుచుకుపడటం ఈ మధ్య సర్వసాధారణమైపోయింది. కొన్నాళ్ళ క్రితం హీరోయిన్‌ మీరా చోప్రా విషయంలో ఇదే జరిగింది. ఆమె పోలీసులకు ఫిర్యాదు చేశారు కూడా. అదీ ఓ తెలుగు హీరో అభిమానుల నుంచి ఆమెకు ఆ స్థాయిలో బెదిరింపులు వచ్చాయి.

తెలుగునాట అనసూయ భరద్వాజ్‌ తదితర సెలబ్రిటీలకు ఈ తరహా ‘రేప్‌’ బెదిరింపులు సోషల్‌ మీడియా వేదికగా ఎక్కువైపోయాయి. పోలీసులకు ఆయా సెలబ్రిటీలు ఫిర్యాదులు చేయడం, కేసులు నమోదైనా.. ఆయా కేసుల్లో నిందితులకు సరైన శిక్షలుపడకపోవడం.. ఈ పైత్యం మరింత పెరిగిపోయింది. హీరోయిన్ల నుంచి ఇప్పుడు హీరోలు, ఇతర సెలబ్రిటీల కుమార్తెలకూ ఈ తరహా బెదిరింపులు ఎక్కువైపోవడం గమనార్హం.

ఇటీవల క్రికెటర్‌ మహేంద్రసింగ్‌ ధోనీ కుమార్తెపై గ్యాంగ్‌ రేప్‌కి పాల్పడతామంటూ కొందరు నెటిజన్లు రెచ్చిపోయారు. కేసు నమోదయ్యింది.. ఈ కేసులో ఓ మైనర్‌ బాలుడ్ని అరెస్ట్‌ చేశారు పోలీసులు.

తాజాగా, తమిళ నటుడు విజయ్‌ సేతుపతి కుమారెను రేప్‌ చేస్తామంటూ నెటిజన్లు రెచ్చిపోతున్నారు. శ్రీలంక క్రికెటర్‌ మురళీధరన్‌ బయోపిక్‌లో విజయ్‌ సేతుపతి నటిస్తుండడమే ఇందుకు కారణం. వివాదం ముదిరి పాకాన పడింది. మురళీధరన్‌ స్వయంగా విజయ్‌ సేతుపతిని అభ్యర్థించాడు, సినిమా చేయొద్దని. దాంతో విజయ్‌ సేతుపతి ఆ సినిమా నుంచి తప్పుకున్నా, ఆయన కుమార్తెకు మాత్రం సోషల్‌ మీడియా వేదికగా లైంగిక వేధింపులు తప్పడంలేదు.

ఈ మధ్య ఓ కామెడీ ప్రోగ్రాంలో వైసీపీ అధినేత వైఎస్‌ జగన్‌ని అనుకరించారన్న అరోపణలతో, ఆ కామెడీ ప్రోగ్రాంకి హోస్ట్‌గా వ్యవహరించిన నాగబాబు కుమార్తె నిహారికపైనా జుగుప్సాకరమైన వ్యాఖ్యలు వైసీపీ మద్దతుదారులు కొందరు చేశారు. సోషల్‌ మీడియా అంటే ఎలాంటి వెర్రి రాతలైనా రాసుకోవచ్చా.? నారా లోకేష్‌ సతీమణినీ, వైఎస్‌ జగన్‌ సోదరినీ.. ఇలా ఎవర్నీ వదలట్లేదు.

ఆయా పార్టీలు ఇలాంటి వాళ్ళని ప్రోత్సహిస్తున్నాయని అనలేం. ఆయా హీరోల అభిమానులూ, ఇలాంటివి ప్రోత్సహిస్తారని అనడం సబబు కాదు. పార్టీల ముసుగులోనో, ఆయా సెలబ్రిటీల అభిమానుల ముసుగులోనో ఈ తరహా ‘రేప్‌’ వార్నింగ్‌లు సోషల్‌ మీడియా వేదికగా ఇవ్వడం అత్యంత జుగుప్సాకరం. ఇలాంటి వాటిపై పోలీసులు చర్యలు తీసుకోవడం సంగతెలా వున్నా, ఇలాంటివాటిని ఆయా సోషల్‌ మీడియా సంస్థలు ‘సెన్సార్‌’ చేయడం మంచిదేమో.!