మంత్రి పేర్ని నానికి అస్వస్థత..

మచిలీపట్నంలో వైసీపీ నేత మోకా భాస్కర్ రావు దారుణ హత్యకు గురైన విషయంత తెలిసిందే. ఈ విషయంతో షాక్ గురైన మంత్రి పేర్ని నాని అస్వస్థతకు గురయ్యారు. భాస్కర రావు అంత్యక్రియల్లో పాల్గొన్న ఆయన తీవ్ర ఆవేదనకు గురయ్యారు. అనంతరం అక్కడినుంచి వెళ్లిన తర్వాత అస్వస్థతకు గురైనట్టు తెలుస్తోంది. ఆయన మరణవార్త విన్న వెంటనే హుటాహుటిన బయలుదేరిన నాని భాస్కరరావు ఇంటికి వెళ్లి తీవ్ర భావోద్వేగానికి గురయ్యారు. భాస్కరరావు మృతదేహాన్ని చూసిన ఆయన కన్నీటిపర్యంతమయ్యారు.

వైసీపీ నేత మోకా భాస్కర్‌ రావుని ఇద్దరు వ్యక్తులు కత్తులతో పొడిచి హతమార్చారు. కేసును సీరియస్‌గా తీసుకున్న పోలీసులు విచారణ చేపట్టారు. ఈ హత్య కేసులో ముగ్గురు నిందితులు ఉన్నట్టు గుర్తించారు. హత్యకు మూడు రోజుల ముందు నుంచే వీరు రెక్కీ నిర్వహించినట్టు పేర్కొన్నారు. కత్తితో హత్య చేసిన వ్యక్తిని చింత పులిగా గుర్తించారు పోలీసులు. నిందితుల వివరాలు తెలయడంతో వారిలో ఒకరి ఇంటిని భాస్కరరావు అనుచరులు తగులబెట్టినట్టు సమాచారం.

హత్య చేసిన వెంటనే బైక్‌పై నిందితుడిని ఎక్కించికెళ్లిన మరో నిందితుడు చింత చిన్నిగా గుర్తించారు. ఈ కేసులో కీలకంగా ఉన్న సీసీ టీవీ ఫుటేజ్ ను రిలీజ్ చేశారు పోలీసులు. హత్యలో రాజకీయ కోణం ఉందని తెలుస్తోంది. పరారీలో ఉన్న నిందితుల కోసం 4 పోలీసు బృందాలు ఏర్పాటు చేశారు.